Hagsmunir Íslands og yfirlýsingar um aumingjaskap

Hart er nú tekist á um samningsafstöðu Íslands í 12. kafla viðræðnanna um ESB um matvælaöryggi og heilbrigði í plöntun og dýrum. Í utanríkismálanefnd er ekki meirihluti að baki þeirri útgáfu textans sem liggur fyrir og telja fimm af níu nefndarmönnum að textinn sé ekki í samræmi við hagsmuni Íslands. Þar með er komin upp ný staða í viðræðunum og málið allt er einnig athyglisvert í ljósi strákslegra orðaskipta um sama mál á Alþingi í vor.

27. apríl spurði Ásmundur Einar Daðason fyrrum formann sinn Steingrím J. hvort staðið yrði á hagsmunum Íslands í landbúnaðarkafla ESB mála. Ráðherra svaraði þá á þá leið að hann yrði að hryggja háttvirtan þingmann sem væri „...greinilega á höttunum eftir að ég játi það á mig að ég sé aumingi og það muni allt leka niður í mínum höndum og það hafi verið munur þegar hetjan Jón Bjarnason reið um héruð, en ég verð að hryggja háttvirtan þingmann, það stendur ekki til að gefa neitt eftir sem mikilvægt er til að geta staðið við grundvallarhagsmuni landbúnaðarins...“

(Fréttin flaug víða síðastliðið vor undir fyrirsögninni Ég er ekki aumingi, segir Steingrímur. Aðeins fáum mánuðum síðar kom sami ráðherra því að vegna Grímsstaðamála að hann væri ekki skúrkur og mun fátítt að stjórnmálamönnum sé svo hugstætt að hrópa á sig hinar verstu sakir.)

En í ESB málum er nú svo komið að meirihluti utanríkismálanefndar telur að ráðherra atvinnumála hafi gefið eftir í þessu máli. Utanríkismálanefnd ber ábyrgð á ferlinu fyrir hönd Alþingis og ef ekki næst sameiginleg lending nefndarinnar og framkvæmdavaldsins er sjálfgert að Alþingi taki það til afgreiðslu. Það er löngu tímabært og upphrópanir um það hverjir séu eða séu ekki aumingjar, skúrkar eða svikarar breyta þar engu um. /-b.

http://vinstrivaktin.blog.is/blog/vinstrivaktin/entry/1267403

http://www.ruv.is/sarpurinn/hadegisfrettir/27042012/althingi-asmundur-og-steingrimur-um-landbunad

http://www.ruv.is/frett/ekkert-fast-i-hendi-hja-huang-nubo