ESB einangrar Ísland

Talsverð umræða er nú um innflytjendur og pólitíska flóttamenn og sitt sýnist hverjum. Stjórnvöld hér standa frammi fyrir miklum vanda því að ef við hleypum örfáum inn kemur holskefla á eftir um leið og það fréttist að hér sé hlið á þeim mikla og illkleyfa múr sem ESB hefur byggt utan um ríki sitt og EES svæðið. 

Fyrir tíma Schengen samstarfsins var vel fær leið fyrir Íslendinga að bjóða hingað erlendum gestum og vinum. Sá sem ritar þessar blogglínur hjálpaði þannig hörundsdökkum vini frá Afríku til að komast hér að í vinnu í fiski á Hornafirði þar sem hann vann sér fyrir inn háskólanámi í Ameríku á áttunda áratug 20. aldar. Landið var að sönnu ekki galopið en það var heldur ekki harðlæst eins og nú er. Tilraunir þess sem hér skrifar til að sameina hér Úkraníska fjölskyldu á jólum eða hjálpa Suður-Amerískum fjölskylduvinum til að komast inn í landið sem ferðamenn hafa verið algerlega vonlausar. Landið er einfaldlega, þökk sé Evrópusambandinu, harðlokað og einangrað!

Með tilkomu EES var Íslendingum illa stætt á því að taka ekki þátt í Schengen samstarfinu og skapa þannig ókleifan múr fyrir íbúa utan Evrópu. Tæknilega hefur Ísland frelsi til að hleypa hverjum sem er inn í landið en í reynd eru tvær ástæður fyrir því að það er ekki hægt meðan við erum aðilar að Schengen.

Sú fyrri og veigameiri er sú að með því opnast sem fyrr segir glufa á Evrópumúrinn. Eftir það yrðum við að kosta miklu til við eftirlit og umsjón með þeirri glufu.

Hin ástæðan er praktískari út frá íslenskum hagsmunum en veigamikil engu að síðu. Við erum einfaldlega með alla Evrópu undir og allir þar hafa rétt til að koma hér til vinnu og búsetu. Meðan svo er þá er einfaldlega ekki pláss fyrir nokkurn mann frá öðrum heimsálfum. 

Vitaskuld dugar það atvinnulífinu vel að hafa Evrópumenn en með þessari einangrunarstefnu þá drögum við úr þeirri fjölmenningarlegu blöndu sem er samfélagi okkar holl og góð. Afrísk, asísk og Suður Amerísk áhrif á okkar litla einangraða samfélag eru holl og góð innan heilbrigðra marka, rétt eins og þýsk áhrif, pólsk, frönsk og ítölsk. 

Frjálslyndi og mannúð eiga svo að ráða för þegar kemur að afgreiðslu á erindum pólitískra flóttamanna eins og velflestir hafa skilning á.

Nei, í stað þessa þá er landið okkar galopið fyrir öllum af ESB svæðinu þar með talið rumpulýð úr alþjóðlegum glæpaklíkum en engin atvinnustarfssemi hefur haft jafn mikinn hag af hinu alfrjálsa flæði innan Evrópumúrsins. Jú og víst hefur Schengen skilað íslenskum fangavörðum aukinni atvinnu!

En vill einhver hafa þetta svona?/-b.

Haldreipi ESB umsóknarinnar farið

Fram til þessa hefur haldreipi ESB umsóknarinnar verið sú fullyrðing utanríkisráðherra og Fréttablaðsins að meirihluti þjóðarinnar vildi kíkja í pakkann. Þessi fullyrðing hefur verið studd með fremur óvönduðum skoðanakönnunum Fréttablaðsins þar sem blandað hefur verið saman tveimur ólíkum spurningum.

Nú hafa ESB sinnar Alþingis endanlega kveðið þessa goðsögn niður. Með því að fella tillögu Vigdísar Hauksdóttur um að spyrja þjóðina hvort halda ætti ferlinu áfram staðfesta þingmennirnir að ESB umsóknin er ekki í umboði íslensku þjóðarinnar.

Ef meirihlutanum væri svo áfram um að kíkja í pakkann þá hefði verið kærkomið tækifæri fyrir utanríkisráðherra að fá það staðfest í atkvæðagreiðslu. Þar með hefði hann getað farið með umsóknina á fulla ferð og í fullum rétti.

En þess í stað afhjúpaði utanríkisráðherra sjálfan sig og ríkisstjórnarmeirihlutann. Í niðurstöðu þingsins liggja mikil sóknarfæri fyrir okkur ESB andstæðinga.

Vandræðagangur vegna ESB-umsóknar - þora ESB-sinnar ekki að spyrja þjóðina um áframhald viðræðna?

Æ fleirum verður það ljóst að enginn vilji er fyrir hendi hjá þjóðinni að ganga í ESB og litlar forsendur fyrir því að leiða Ísland inn í aðlögunarferli að regluverki og stofnunum ESB. Ef ekki væri fyrir þvermóðsku flestra í forystu Samfylkingarinnar og fáeinna fylginauta í mismiklum valdastöðum værum við fyrir löngu laus úr þessari pínlegu klemmu. Boðið hefur verið upp á ótal leiðir til að hverfa frá þessum vandræðagangi, setja viðræðurnar í salt, slíta viðræðum og síðast en ekki síst að leyfa þjóðinni að kjósa um framhald viðræðnanna. ESB-sinnar hafa oft talað fjálglega um hversu ólm þjóðin sé í að halda þessum viðræðum áfram. Það hefur þó fyrir löngu verið afhjúpað að spurningin sem fólk hefur svarað jákvætt í könnunum hefur ávallt fjallað um að a) halda viðræðum áfram OG b) setja síðan niðurstöðuna í þjóðaratkvæði.

Ótti ESB-sinnaðra valdastofnana við að heyra vilja þjóðarinnar varðandi framhald viðræðnanna strax í haust kom glöggt fram í atkvæðagreiðslu dagsins þar sem það var fellt að leyfa þjóðinni að tjá sig um málið. Ef þjóðin er nú svona jákvæð fyrir framhaldi viðræðna, hvernig má það þá vera að ekki þótti óhætt að ,,leyfa“ henni að láta vilja sinn í ljós. Ljóst er að ekkert var því til fyrirstöðu að láta slíka atkvæðagreiðslu fara fram samhliða stjórnarskráratkvæðagreiðslunni og á öðrum kjörseðli. Auðvelt er að láta framkvæmd vera með þeim hætti.

 

Tillaga Vigdísar felld

Áróðursmaður ESB á Íslandi

Það er heldur dapurlegt hlutskipti sem aðalsamningamaður Íslands gagnvart ESB, Stefán Haukur Jóhannesson sendiherra velur sér. Í stað þess að einbeita sér að því verkefni að tala máli Íslands gagnvart ESB er eitt helsta verk hans alveg öndvert að reka áróður fyrir málstað ESB gagnvart Íslendingum.

Það hafa vitaskuld borist tilmæli þess efnis frá stækkunardeild ESB að stjórnvöld eigi að tala fyrir aðild en enn sem komið er þá eru stjórnvöld hérlendis ekki undir Brusselvaldið sett eins og yrði vitaskuld með aðild. Og í öðru lagi þá er fráleitast af öllu að sami maður og á að beita sér fyrir íslenskum hagsmunum gagnvart ESB sé stöðugt að tala fyrir kröfum og niðurstöðum ESB við sína eigin landsmenn. Þessi tvö hlutverk ganga algerlega hvort gegn öðru og eru með öllu ósamrýmanleg. Þetta er svipað og ef forseti ASÍ væri stöðugt að tala fyrir hagsmunum atvinnurekenda! 

Auk þess að fara með áróðursfundi vítt og breytt um landið hefur Stefán Haukur nú veitt málgagni Já sinna makalaust viðtal. Í blaði þeirra Sveitinni er drottningarviðtal við samningamanninn þar sem hann leggur sig í líma að útskýra hvað það geti nú verið hagstætt fyrir íslenskan landbúnað að ganga í ESB. Sendiherrann telur að þó svo að gengið sé að kröfum ESB í landbúnaðarmálum muni ekki margt breytast og þær breytingar sem yrðu væru landbúnaðinum allar til góðs.

Styrkjaskógurinn sendiherrann kynnir er óþrjótandi og möguleikar okkar á að fá miklu meira í styrki heldur en við leggjum til ESB borðleggjandi. Þetta gengur lengra en trú Össurar sem hefur þó viðurkennt að Ísland muni borga meira til ESB en við fáum þaðan.

Hvernig getur slíkur heittrúarmaður farið með samningsumboð Íslands? 

(Myndin er forsíðu blaðs Já sinna)

Meirihluti utanríkisnefndar Alþingis krefst þjóðaratkvæðis um ESB

Þau tíðindi gerðust í utanríkismálanefnd Alþingis í morgun að Guðfríður Lilja Grétarsdóttir, þingmaður VG, lét bóka þá skoðun sína að efna þurfi til þjóðaratkvæðagreiðslu hið fyrsta, fyrir lok þess árs, um hvort þjóðin vilji ganga inn í ESB eða ekki. Formenn Sjálfstæðis- og Framsóknarflokks létu þá bóka að Alþingi beri að taka málið til umfjllunar í ljósi andstöðu meiri hluta nefndarinnar við aðildarferlið.

Það hefur lengi legið ljóst fyrir að meirihluti þjóðarinnar er algerlega andvígur inngöngu í ESB. Hins vegar tókst með klækjabrögðum að smygla þingsályktunartilögunni um aðildarumsókn í gegnum þingið sumarið eftir hrunið en fellt var að gefa þjóðinni kost á að segja til um hvort það væri raunverulegur vilji landsmanna að ganga í ESB.

Nú hafa komið fram tillögur úr ýmsum áttum um að efnt verði til þjóðaratkvæðis um ESB. Mestu skiptir að spurningin verði þá afdráttarlaus og snúist ekki um það "hvort viðræðum skuli haldið áfram" eftir að það þóf hefur nú staðið í bráðum þrjú ár heldur fái landsmenn að svara því hreint út hvort þeir vilji ganga inn í ESB eða ekki. Ef svarið er neikvætt er viðræðum sjálfhætt.

Kosið verði um ESB fyrir árslok

Ögmundur: Aldrei verið vitlausara að ganga inn í ESB

Ögmundur Jónasson innanríkisráðherra sagði í óundirbúnum fyrirspurnartíma á Alþingi í gær að aldrei hafi verið vitlausara en nú að ganga í Evrópusambandið. Hann hefði verið því fylgjandi í langan tíma að afgreiðslu þessa máls yrði flýtt.

Vigdís Hauksdóttir, þingmaður Framsóknarflokksins, spurði Ögmund út í ESB-umsóknina og sagði einkennilegt að ríkisstjórnin vilji enn sækja um aðild að sambandinu miðað við þann vanda sem blasi við í álfunni. Vigdís vill draga umsóknina til baka og hvetur til þess að þingið gangi til atkvæðagreiðslu um málið.

Ögmundur vill að afgreiðslu málsins verði flýtt og hann kveðst vilja skjóta málinu til þjóðarinnar en án aðkomu þingsins. „Það hefur verið mín afstaða,“ sagði Ögmundur.

Vigdís sagði aftur á móti að ekki sé hægt að gera þetta án aðkomu þingsins. „Ég vona að ráðherrann átti sig á því að þessu máli verður ekki komið til þjóðarinnar nema með aðkomu þingsins,“ sagði Vigdís. Því sé mikilvægt að þingið fái málið í hendurnar sem fyrst, svo hægt sé að koma því til þjóðarinnar.

„Því spyr ég ráðherrann: Eigum við ekki að láta til skarar skríða í eitt skipti fyrir öll og klára þetta mál hér á þessu vorþingi og koma því í þjóðaratkvæðagreiðslu,“ spurði Vigdís.

Ögmundur tók fram að afstaða sín gagnvart aðild að ESB væri ekki ný af nálinni. Hún hefði ávallt verið skýr og hann hefði ávallt verið andvígur því að ganga í Evrópusambandið. Að sínu mati sé ekkert því til fyrirstöðu að efna til þjóðaratkvæðagreiðslu um málið hið fyrsta.

„Ég hef alla tíð verið andvígur því að við gengum inn í Evrópusambandið. Og fyrir mitt leyti hefur ekki þurft neinar viðræður til að leiða það í ljós. Það er hins vegar svo, að það er stór hluti þjóðarinnar sem hefur viljað fá skýrari línur í þetta. Fá að vita hvað er í pokanum eins og stundum er sagt. Það er að koma á daginn hvað það er. Og ekkert því til fyrirstöðu að við efnum til þjóðaratkvæðagreiðslu hið fyrsta. Þannig að ég er sammála háttvirtum þingmanni að þessu leyti, að það er mikilvægt að taka þetta mál til afgreiðslu en að það verði þjóðin sem skeri úr um hvert framhaldið verður,“ sagði Ögmundur Jónasson.

Heimild: mbl.is í gær

Mikill meirihluti Breta vill yfirgefa ESB

Norðmenn afneita ESB. Færeyingar og Grænlendingar hafna ESB. Danir og Svíar hafna evrunni. Bretar eru á leið út úr ESB. En flokkur forsætisráðherrans á Íslandi á enga ósk heitari en að troða Íslendingum inn í ESB.

 

Ný könnun í Bretlandi sýnir að 46% breskra kjósenda vilja ganga úr Evrópusambandinu en 30% aðspurðra vilja vera þar áfram. Sé miðað við þá sem afstöðu taka, eins og venja er, sýnir könnunin að 61% Breta vilja út úr ESB en 39% er á móti því. Skoðanakönnunin sem gerð var fyrir bresku blöðin Independent on Sunday og Sunday Mirror þykir sýna að spurningin um áframhaldandi aðild Breta að ESB verði bersýnilega eitt helsta umræðuefnið í næstu þingkosningum í Bretlandi. Könnunin sýnir jafnframt að um 26% kjósenda Íhaldsflokksins hyggjast kjósa Sjálfstæðisflokkinn í Bretlandi (UK Independent Party) og 11% stuðningsmanna Verkamanaflokksins íhuga hið sama svo og 14% Frjálslyndra.

 

Breska blaðið The Observer, fullyrti í gær, að David Cameron sé undir vaxandi þrýstingi í sínum flokki að efna til þjóðaratkvæðagreiðslu um málið. Jafnframt er fullyrt að þrýst sé á Ed Miliband, leiðtoga Verkamannaflokksins  að ná frumkvæðinu af Íhaldsflokknum með því að lofa þjóðaratkvæðagreiðslu um framtíð Bretlands innan ESB í von um að slík atkvæðagreiðsla myndi kljúfa Íhaldsflokkinn í herðar niður, því að leiðandi öfl þar vilji vera innan ESB en grasrótin í flokknum vilji fara út. Að sjálfsögðu eru allir flokkar klofnir í þessu máli en leiðtogar Verkamannaflokkurinn gera sér vonir um að Íhaldsflokkurinn muni fara miklu verr út úr þjóðaratkvæði flokkslega séð en þeirra flokkur.

 

Íslendingar hljóta líka að velta þessari hlið málsins fyrir sér: Það veit enginn hvernig ESB og evrusvæðið munu líta út eftir nokkur ár. Meiri hluti Íslendinga hefur hafnað ESB-aðild í öllum könnunum sem gerðar hafa verið seinustu þrjú árin og engar líkur eru á að meiri hluti verði á Alþingi fyrir aðild. Er þá ekki augljóst að við hljótum annað hvort að leggja ESB-umsóknina til hliðar nú þegar og bíða átekta eða stíga skrefið til fulls og afturkalla umsóknina?