Óþolandi draugagangur í kringum aðildarstyrki ESB

Afstaða forystumanna VG til aðlögunarstyrkja ESB er vægast sagt í þoku þrátt fyrir afstöðu landsfundar VG. Í samþykkt landsfundarins um seinustu helgi var eftirfarandi klausu að finna:  „Þá mun VG tryggja að íslenskt stjórnkerfi verði ekki aðlagað stjórnkerfi ESB á meðan á aðildarviðræðum stendur."

Hjörleifur Guttormsson gerði nánari grein fyrir afstöðu landsfundarins í þessu máli á heimasíðu sinni 31. október s.l: „Eins og fram kemur í samþykkt landsfundarins er forystu VG falið að tryggja að ekki komi til aðlögunar íslensks stjórnkerfis að kerfi Evrópusambandsins á meðan á aðildarviðræðum stendur. Tekið var fram af framsögumanni málefnahópsins sem mælti einróma með samþykktinni að hópurinn væri sammála um að hafna beri sem hluta af aðlögun fjárhagsstyrkjum frá ESB, þ.e. svonefndum IPA-styrkjum (Instrument for Pre-Accession Assistance) og sem sumpart er gert ráð fyrir í fjárlagafrumvarpi fyrir 2012. Var þetta ítrekað sérstaklega í umræðum sem skýring við tillöguna sem síðan var samþykkt. Þetta er aðeins eitt dæmi af mörgum sem sýnir í hverskonar öngstræti Ísland er statt með aðildarumsókn sem aðeins nýtur stuðnings frá Samfylkingunni einum flokka. Í umræðum á landsfundinum var bent á að sáralitlar ef nokkrar líkur væru á að botn fáist í viðræðuferlið fyrir alþingiskosningar 2013. Brýnt sé að VG komi sinni afstöðu gegn aðild á framfæri með skýrum hætti á næstunni og rökum sem að baki liggja."

Gerð var ítarleg grein fyrir því hér á síðunni 27. okt. s.l. að fjórir aðlögunarstyrkir væru nefndir í fjárlagafrumvarpi fyrir næsta ár og eru þeir til 1) Háskólafélags Suðurlands á Selfossi, 2) Fræðslumiðstöð atvinnulífsins, 3) Hagstofunnar og 4) Náttúrufræðistofnunar.

Jafnframt var bent á að í ályktun flokksráðs VG frá haustinu 2010 hafi eftirfarandi setningu verið að finna:  „Þar til þjóðin hefur tekið sína ákvörðun þarf að tryggja að ekki verði gerðar neinar breytingar á stjórnsýslunni eða íslenskum lögum í þeim eina tilgangi að laga íslenskt stjórnkerfi fyrirfram að reglum Evrópusambandsins."

Fjármálaráðherra er sagður hafa vísað til þess á Alþingi í fyrradag í svari við fyrirspurn frá Bjarna Benediktssyni að á landsfundi VG um seinustu helgi hafi breytingartillögu, sem fjallaði um IPA-styrkina og flutt var við ályktun um ríkisfjármál, verið vísað frá.

Tillögur sem teknar voru til afgreiðslu á þessum fundi voru um eitt hundrað og tók marga klukkutíma að greiða atkvæði um þær. Þegar breytingartillagan kom til atkvæða flutti Árni Þór Sigurðsson frávísunartillögu með þeim rökum að þegar hefði verið fjallað um þetta mál með samþykkt fundarins á tillögu utanríkismálahópsins um ESB, og var frávísunin samþykkt á þeirri forsendu en raunar með fremur litlum atkvæðamun.

Af þessu má ljóst vera með hliðsjón af túlkun framsögumanns utanríkismálahópsins, Stefáns Pálssonar, sem enginn andmælti né gerði athugasemd við, að landsfundurinn tók afstöðu gegn aðlögunarstyrkjum ESB.