Joschka Fischer: Aðeins með Bandaríkjum Evrópu má komast hjá stórslysi!

Það verður æ ljósara með hverjum mánuðinum sem líður að hvorki Jóhanna né Össur né neinn annar getur vitað um í hvers konar ESB þau eru að leiða okkur. Fyrrverandi varakanslari Þýskalands varar leiðtoga ESB við yfirvofandi stórslysi í grein í Morgunblaðinu s.l. miðvikudag:  

 

„Verði pólitísku völdin í Evrópusambandinu ekki evrópuvædd, þannig að núverandi ríkjabandalag verði að sambandsríki, mun evrusvæðið – og allt Evrópusambandið – leysast upp. Pólitíski og efnahagslegi kostnaðurinn af „endurþjóðvæðingu“ yrði gríðarlegur; óttinn úti um allan heim við hrun Evrópusambandsins er ekki ástæðulaus.“

 

„Og við þurfum að gera okkur fulla grein fyrir einu: allt minna en Bandaríki Evrópu verður ekki nógu öflugt til að afstýra yfirvofandi stórslysi.“

 

„Ef myntbandalag Evrópu bregst verður lítið eftir af innri markaðnum, stofnunum Evrópusambandsins og sáttmálum þess. Við myndum þurfa að afskrifa sex áratuga árangursríkan Evrópusamruna, með óþekktum afleiðingum.“

 

„Vandamál Evrópusambandsins stafa ekki af þriggja áratuga frjálshyggju. Orsökin er ekki heldur fasteignabólan sem sprakk, eða brot á skilmálum Maastricht-sáttmálans, stórauknar skuldir eða fégráðugir bankar. Þótt allir þessir þættir séu mikilvægir felast vandamál Evrópusambandsins ekki í því sem gerðist, heldur því sem gerðist ekki: stofnun sameiginlegrar evrópskrar ríkisstjórnar.“

 

Það er ekki ESB-andstæðingur sem þannig talar heldur ákafur stuðningsmaður ESB sem heldur því fram að evrusvæðið hafi staðnað á miðri leið og nú þurfi miklu meiri skerðingu á sjálfstæði aðildarríkjanna en orðið er, miklu meiri samruna og framsal valds  – ef ekki eiga illa að fara.

 

Þeir Íslendingar sem enn hafa ekki áttað sig á því að ESB getur átt eftir að gjörbreytast á næstu árum verða nú að horfast í augu við þá staðreynd hvílíkt ábyrgðarleysi það er að leita eftir inngöngu í ríkjabandalag sem enginn veit nú hvernig lítur út þegar inn verður komið. Morgunblaðsgrein fyrrv. varakanslara Þýskalands er í raun alvarleg áminning til ríkja sem ekki eru gengin inn, ekki síst orðin: „efnahagslegi kostnaðurinn af „endurþjóðvæðingu“ yrði gríðarlegur“. Eða með öðrum orðum: það gæti orðið okkur dýrkeypt að ganga inn í ESB og ætla svo að reyna að sleppa skaðlaus aftur út úr glundroðanum eftir flókið alögunarferli.

 

Ragnar Arnalds  

Athugasemdir

[Gunnar Heiðarsson, 4.11.2011 kl. 23:08]

Stofnun Bandaríkja Evrópu er einungis formsatriði, staðfesting á því sem orðið er.

Allar ákvarðanir eru teknar af fámennri klíku stæðstu ríkja ESB og smærri ríkjum er algerlega haldið frá. Þau verða bara að samþykkja það sem fyrir þau er lagt. Þegar einhverjum þjóðarleiðtoga dettur sú fásinna í hug að láta þjóð sína að koma að ákvörðunum er snúa að ESB, er samstundis hafið hart stríð gegn þeim leiðtoga. Ef hann stendur af sér slíka árás, er séð til þess að kosningin fái "réttan" endir. Óendanlegum fjármunum er beitt í áróður og kosið þar til "rétt" niðurstaða fæst.

Það er ljóst að smærri ríki ESB mega sín lítils innan klúbbsins og lýðræðið er ekki í hávegum haft. Því á lýðræðið Ísland lítið erindi þangað inn.

Stofnun Bandaríkja Evrópu er einungis formsatriði, en nauðsynlegt samt. Með því munu línur skýrast og hugsanlega gæti það minnkað áhrif þeirrar kreppu sem evrutilraunin er að valda heimsbyggðinni.

Slík stofnun mun einnig auðvelda Íslendingum valið, þá fer ekki lengur á milli mála hvert haldið er með áframhaldandi aðildarferli.

[Elle_, 4.11.2011 kl. 23:29]

Já, verði sambandið ekki að einu ríki mun skrímslið leysast upp. 

Sovéski andófsmaðurinn og fyrrum fangi gömlu Sovétríkjanna, Vladimir Bukovksy, varaði líka við því fyrir 5+1/2 ári að sambandið væri
SKRÍMSLI SEM YRÐI AÐ EYÐILEGGJA. 

Orðin ´Bandaríki Evrópu´ gera samt lítið úr lýðræðislegu landi Bandaríkjanna og frábærri stjórnarskrá landsins.  Og passa engan veginn við evrópska og ólýðræðislega veldið.  Þó ég og margir aðrir hafi verið sek um að nota orðin saman.