Grísk reiði á bloggi söngvara

Vinstrisinninn Mikis Theodorakis, stórsöngvari og fyrrverandi ráðherra í Grikklandi, fer mikinn í grein á bloggsíðu sinni þar sem hann fjallar um stöðu Grikklands. Greinin heitir einfaldlega The truth about Greece. Theodorakis sakar Vesturlönd um að eiga sök á óförum Grikkja, nú síðast með samsæri stjórnmálamanna og Alþjóðagjaldeyrissjóðsins. Þessi gamli bloggari er vel þess virði að síðan hans sé heimsótt.

Því fer fjarri að það sé hægt að taka undir allt sem hér er sagt og það fer ekkert milli mála að hér heldur tilfinningaríkur listamaður á penna. Greinin er miklu frekar viðvörun til Evrópu um þær erfiðu tilfinningar sem evrukreppan vekur heldur en að hægt sé að taka allt í henni sem gilt innlegg í samtímaumræðu.

Theodorakis sem er fæddur 1925 verður tíðrætt um að hungursneyðina sem ríkti í landinu undir hernámi Þjóðverja í seinna stríði þegar milljón Grikkir týndu lífi vegna matarskorts og ofsókna hernámsliðsins. Í dag séu Þjóðverjar aftur komnir og aftur fari þeir ránshendi, hafi í burtu verðmæti þjóðarinnar og skilji hana eftir í sárum.

They are threatening to throw us out of Europe. If Europe doesn’t want Greece to be a part of it, Greece, for her part, is 10 times more unwilling to be a part of this Merkel- Sarkozy Europe.

Þegar við horfum á söguna er meira en ósanngjarnt að leggja ásetning Merkels og Sarkozys að jöfnu við hin djöfullegu plön nasismans. Ef við tökum ásetning og vilja gerenda í burtu verður myndin svolítið öðruvísi þó enn muni hér miklu. Enginn heiðarlegur stjórnmálamaður á það skilið að vera líkt við þá sem fara með vígaferlum, pyntingum og útrýmingum kynþátta sem og öskrandi forherðingu um lönd. Einnig þann þátt verðum við að taka út fyrir myndina og hvað er þá eftir, kann einhver að spyrja? Er það nokkuð sem máli skiptir?

Eða getur verið að utan alls þessa sé einhver sameiginlegur kjarni Þriðja ríkisins og ESB. Eitthvað það sem drífur áfram reiði Mikis Theodorakis og fjölmargra annarra, kjarni sem við getum einfaldlega kallað Evrópska heimsvaldastefnu. Hún hefur birst okkur í stórveldum eins og því rómverska, því franska, austurríska, þýska, sovéska og nú síðast því brusselska.

Nánar um stórríkið í næsta bloggi á morgun...

Athugasemdir

[Ásmundur Harðarson (IP-tala skráð) 14.3.2012 kl. 13:39]

Mikis Theodorakis er heimsfrægur lagasmiður eða tónskáld. Sennilega er hann þekktastur fyrir  tónlistina í kvikmyndinni Zorba.

Ég hef aldrei vitað til að hann væri söngvari. Ég fletti því upp á honum í Wikipedia. Þar er hvergi getið söngferils hvað þá að hann sé stórsöngvari. 

[palli (IP-tala skráð) 14.3.2012 kl. 14:09]

Er lagasmiðurinn og tónskáldið söngvari eða ekki????

Hefðurðu virkilega ekkert betra að segja, Ásmundur?

Get ....    a   .....    life!!!

[Ásmundur Harðarson (IP-tala skráð) 14.3.2012 kl. 15:53]

Vinstrivaktin hefur verið iðinn við að kenna evru og ESB um ófarir Grikkja. Sú skoðun fær þó engan stuðning í þessari grein Theodorakis.

Theodorakis kennir fyrst og fremst fyrrverandi forsætisráherra Grikkja, Papandreou og gríska fjármálaráðuneytinu um ófarirnar.

Thedorakis segir allt hafa verið í góðu gengi í Grikklandi 2009 þegar Papandreou hafði í skjóli nætur samband við Strauss-Kahn hjá AGS.

Papandreou og gríska fjármálaráðneytið leiðréttu viðskiptahallann til mikillar hækkunar og héldu úti áróðri í Evrópu um að Grikkland væri sökkvandi skip, segir Theodorakis. Afleiðingin varð að vextir stórhækkuðu. Það var banabitinn.

Thedorakis gagnrýnir Bandaríkin, Bretland, Frakkland og Þýskaland vegna mála fyrir 2009 og talar reyndar um alþjólegt samsæri gegn Grikkjum allt frá 1975.

En hvorki ESB né evru er kennt um neitt.

[Ásmundur Harðarson (IP-tala skráð) 14.3.2012 kl. 23:29]

Papandreou og gríska fjármálaráðuneytið hækkuðu fjárlagahallann en ekki viðskiptahallann eins og fram kemur ranglega í síðustu athugasemd minni.

Það væri fróðlegt að vita hvort eitthvað sé til í þeirri kenningu Theodorakis að Grikkir hefðu komist heilu og höldnu í gegnum kreppuna ef ekki hefði verið haft samband við AGS og ef Papandreou og gríska fjármálaráðuneytið hefðu ekki rætt frjálslega um slæma stöðu Grikklands við erlenda fjölmiðla.

Almennt var Papandreou talinn heiðarlegur maður. Það var altalað fyrir kreppu að Grikkir hefði falsað bókhaldið  til að komast inn í ESB og sjálfur viðurkennir Theodorakis spillingu stjórnmálamanna og fjármálapressunnar fyrir kreppu.

Kannski var Papandreou of heiðarlegur fyrir grískan veruleika og kannski ætlaði hann sér of mikið. Það er athyglisvert að þó að Theodorakis  gagnrýni harðlega að leitað var til AGS þá virðist hann ekkert hafa út á þá stofnun að setja eða störf hennar fyrir Grikkland.

Theodorakis hefur greinilega ekki dottið í hug að evran kunni að eiga hlut að máli. Kannski að íslenskir andsinnar ættu að láta hann vita af niðurstöðu sinni.