Áhrif smáríkja í ESB fara síminnkandi

Ákafir ESB-sinnar hafa lengi reynt að telja fólki trú um að við Íslendingar getum sætt okkur við afsal sjálfstæðis og fullveldisréttinda á fjölmörgum sviðum vegna þess að í stað skerðingar fullveldisins fengjum við hlutdeild í löggjafarstarfi ESB.

En þá ber að hafa í huga að áhrif smáríkja í ESB fara síminnkandi en völd hinna stóru vaxandi. Ráðherraráðið er tvímælalaust valdamesta stofnun ESB og þar gátu smáríki af svipaðri stærð og Ísland átt 3 atkvæði af um 350 eða tæp 0,9% atkvæðanna. En með nýrri stjórnarskrá ESB skv. Lissabon sáttmálanum er nú stefnt að meirihluta ákvörðunum í stórauknum mæli með hliðsjón af íbúafjölda aðildarríkjanna.

Atkvæðamagn Þýskalands vex úr rúmum 8% í rúm 16%, Frakklands úr rúmum 8% í tæp 13% og atkvæðastyrkur Bretlands og Ítalíu úr rúmum 8% í rúm 12%. Staða miðlungsstóru ríkjanna, Spánar, Póllands og Rúmeníu breytist lítið. En atkvæðamagn tuttugu fámennari ríkja minnkar að sama skapi. Mest minnka áhrif Möltu sem er fámennasta ríkið með um þriðjungi fleiri íbúa en Ísland; áhrif Möltuverja hrapa úr 0,9% í 0,08%, Áhrif Möltu verða sem sagt innan við 1/10 af því sem áður var. Og hlutur Íslands við aðild yrði enn smærri.

Af þessu má ljóst vera að því fámennari og áhrifa­minni sem aðildarríki eru þeim mun meiri verður skerðing sjálfstæðisins og hvergi yrði sú skerðing jafn tilfinnanleg og hér vegna fámennis þjóðarinnar en einnig vegna þess hve mikil afskipti ESB myndi hafa af stjórn landsins, þar eð sjávarútvegur vegur svo þungt í efnahagslífi okkar. Jafnframt þarf að hafa í huga að hér eru miklar orkuauðlindir sem orkusoltið ESB á vafalaust eftir að girnast.

Íslenska ríkið yrði lítið annað en hreppur á jaðri risaríkis þegar fram liðu stundir og sjálfstæð rödd Íslands myndi að mestu þagna á vettvangi Sameinuðu þjóð­anna.

Ragnar Arnalds

Athugasemdir

[Valdimar Samúelsson, 8.6.2011 kl. 15:09]

Þótt það sé ekki komment á þessa grein hér að ofan þá spyr ég hvernig það getur verið að menn á Alþingi fái að brjóta stjórnarskránna og fremja landráð samkvæmt kafla X grein 86 þegar þessi umsókn um aðild að ESB var send inn. Ég jafnvel tel að allir á Alþingi séu sekir sekir þar sem maður heyrði í beinni frá alþingi upphróp að þetta væru landráð en engin gerði neitt. Þetta voru og eru landráð að hæstu gráðu. Ég hef sjálfur reynt að kæra en ríkissaksóknari er á annarri skoðun eða kannski er hann samsekur.

[Jón Ríkharðsson, 9.6.2011 kl. 12:27]

Þetta er góð og vönduð samantekt hjá þér Ragnar.

Fólk þarf nefnilega að fara að kynna sér staðreyndir í þessum málum, það þýðir ekki stöðugt að tala í innihaldslausum frösum eins og ESB sinnar gera alltaf.

[Óskar Helgi Helgason (IP-tala skráð) 9.6.2011 kl. 14:51]

Sæll Ragnar; sem og aðrir ágætir gestir, vaktar þinnar !

Vönduð samantekt; en,......... hyggilegra væri ykkur síðuhöfum, að kippa út vinstri tilvísuninni, þó ekki væri nema upp á trúverðugleikann - enda; á daginn komið, að svokallaðir vinstri menn, eru einna mestu skemmdar vargar, gjörvallrar Íslandssögu.

Með beztu kveðjum; öngvu að síður, úr Árnesþingi /

Óskar Helgi Helgason

[Eggert Guðmundsson, 9.6.2011 kl. 15:41]

Sammála flestu hérna í "kommentum".

Ég er þó sérstaklega sammála Valdimari um sekt Alþingis. Alþingi var veittur möguleiki á því að leita samþykkis þjóðarinnar, en hundsaði það . Alþingi tók sér vald, umboðslaust til að leita leiða til að koma Íslandi undir yfirráð annarra.