Þarf þjóðin að hafa ESB viðræður hangandi yfir sér í mörg ár enn?

Össur og forysta ESB þora ekki að leyfa þjóðinni að kjósa um ESB, a.m.k. ekki meðan kannanir sýna að mikill meirihluti er andvígur aðild. Þess vegna er nú reynt að draga viðræðurnar á langinn í von um að ESB hressist eða þá að örvæntingin grípi þjóðina á ný eins og fyrst eftir hrunið.

Því til sönnunar að viðræðurnar eru dregnar á langinn nægir að benda á að þegar áætlun um ESB-viðræður var kynnt í utanríkisráðuneytinu veturinn 2010 var reiknað með að sjávarútvegskaflinn yrði opnaður þá um haustið. En nú tveimur árum síðar hafa engar formlegar viðræður átt sér stað um sjávarútvegskafla fyrirhugaðs samnings þótt legið hafi fyrir frá upphafi að sá kafli yrði einn sá erfiðasti. Svo á að heita að þennan kafla sé ekki einu sinni búið að „opna“ eins og það heitir á tungumáli kommissaranna í ESB, og það verður ekki gert fyrr en í fyrsta lagi í árslok að sögn stækkunarstjórans sem hér var á ferð nýlega.

 Hins vegar hefur Össur átt leynilegar viðræður við ýmsa forystumenn ESB. Hann hefur fengið „að kíkja í pakkann“ þótt hann vilji ekki gefa neitt upp um þau svör sem hann hefur fengið.

Ýmsir talsmenn Samfylkingarinnar héldu því stíft fram þegar aðildarumsóknin var samþykkt og þjóðaratkvæði hafnað 2009  að viðræður við ESB myndu ganga hratt fyrir sig og þjóðin fengi að kjósa um niðurstöðuna á árinu 2011.

Síðan eru brátt liðin þrjú ár og enn hefur þjóðin enga aðkomu fengið að þessu máli þótt skýrt liggi fyrir í öllum könnunum sem fram hafa farið að mikill meirihluti vill ekki ganga í ESB. Ljóst er orðið að Össur og stækkunarstjórinn eru vísvitandi að draga það að niðurstaðan sjái dagsins ljós í örvæntingarfullri von um aðstæður skáni eitthvað á næsta kjörtímabili Alþingis.

Eins og kunnugt er kostar aðildarferlið skattgreiðendur stórfé á hverju ári. Hitt er þó langtum verra að aðildarumsóknin er alvarlegasta aðför sem gerð hefur verið að fullveldi þjóðarinnar. Jafnframt er aðildar- og aðlögunarferlið einstök og svívirðileg aðför að lýðræði í landinu. Það er stjórnmálalegt hneyksli sem lengi verður í minnum haft ef þingmenn ríkisstjórnarflokkanna ætla öllu lengur að una því að unnið sé að framsali fullveldisréttinda þjóðarinnar á fjölmörgum sviðum með undirbúningi og aðlögun fyrir inngöngu Íslands í fyrirhugað risaríki án þess að þjóðin fái nokkurn tíma, fyrr en allt er frá gengið, að segja hug sinn til þess hvort hún sé samþykk þessari stefnumörkun, einkum þegar ljóst er af könnunum að mikill meirihluti þjóðarinnar er beinlínis andvígur inngöngu í ESB.

VG getur ekki látið það viðgangast með hliðjón af stefnu sinni og hugsjónum að svo ósvífnum skollaleik sé áfram haldið enn eitt ár í viðbót  í nafni ríkisstjórnar, sem flokkurinn á aðild að, án þess að þjóðin fái tækifæri til að segja hug sinn. Vera má að það geti þjónað Samfylkingunni ágætlega að hafa málið ófrágengið fram yfir næstu kosningar. En fyrir VG er óhugsandi og nánast dauðadómur að sigla inn í kosningabaráttu komandi vetrar með ESB-málið í lausu lofti, enda er nú svo komið að almennir kjósendur botna hvorki upp né niður í því fyrir hvað flokkurinn stendur í þessu máli.

Það sem flokksforystan hafði sér til afsökunar fyrir þremur árum að heppilegt væri fyrir landsmenn „að kíkja í pakkann og sjá hvað í boði er“ var kannski brúkleg viðbára fyrir einhverja í skamman tíma. En sá tími er löngu liðinn. Að þremur eða fjórum árum liðnum getur enginn haldið því fram að hann sé enn „að kíkja í pakkann“.

Þegar við blasir að þeir sem stóðu að umsókninni um ESB-aðild reyna sjálfir hvað þeir geta að tefja tímann í góðri samvinnu við stækkunardeild ESB vegna þess að þeir vita að málið er steindautt um leið og þjóðaratkvæðagreiðsla fer fram, þá er það skylda VG að grípa í taumana og segja við samstarfsflokkinn: Hingað og ekki lengra! Nú er nóg komið! Annað hvort greiðum við atkvæði um það ekki síðar en í haust hvort þjóðin vill ganga í ESB – eða við leggjum málið til hliðar og hreyfum ekki við því aftur nema að undangengnu þjóðaratkvæði.   - Ragnar Arnalds

Athugasemdir

[Ásthildur Cesil Þórðardóttir, 5.6.2012 kl. 12:44]

Eins og talað út úr mínu hjarta, algjörlega sammála, Vg verða að taka á honum stóra sínum og reka út ESB sinnana í ríkisstjórninni og hætta þessari vitleysu ef þeir eiga ekki að þurrkast út vegna Steingríms og Árna Þórs. 

[Kristján B Kristinsson (IP-tala skráð) 5.6.2012 kl. 14:27]

Er ekki orðið of seint fyrir þá, þeir selja okkur kjósendum það aftur að þeir séu á móti inngöngu í ESB? það trúa fáir sömu lyginni oftar en einusinni, allavega ekki þegar þeir vita sannleikann. 

[Valdimar Samúelsson, 5.6.2012 kl. 16:21]

Við verðum að stoppa þennan feril því þegar ESB eru búnir að segja já þá fara inn íslenskir áheyrnarfulltrúar á þing ESB. Þeir munu sitja þar þar til búið er að kjósa sem aftur getur dregist eins og þeim þóknast. ESB gætu sagt Já núna ef þeim þóknaðist það og þeir vita að allar undan þágur eru bara þar til þeir ákveða annað.

[Hilmar (IP-tala skráð) 5.6.2012 kl. 17:23]

Ekki veit ég til hverra þú ert að höfða innan raða Vg, Ragnar. Það er búið að hreinsa út alla andstöðu innan flokksins. Flokksforystan er flokkurinn.

Vinstri flokkurinn grænt framboð er því flokkur sem aðhyllist aðlögun Íslands að ESB.

Samanlegt mælt fylgi Samfylkingar, VG og Bjartrar framtíðar er ca. fylgið við aðild að ESB. Þar eru hinar skýru línur í pólitíkinni, og þar liggur víglínan í næstu kosningum.

Andstæðingar aðildar að ESB koma til með að kjósa flokk sem er andvígur aðild að ESB. Þeir koma ekki til með að kjósa Vg, jafnvel þó svo að Steingrímur hyrfi af sviðinu. Flokkurinn hefur sýnt það og sannað, að hann svíkur kjósendur sína, þeir sem starfa neðar í fæðukeðjunni innan flokksins, láta þessi svik yfir sig ganga, eða eiga þátt í þeim, og eru því lítt fýsilegri kostur en Steingrímur sjálfur.

Vinstri flokkurinn grænt framboð er ónýtur flokkur fyrir vinstrimenn, sem eru andvígir ESB. Þetta veit Steingrímur, og rær að því einhverjum árum, að Vg verði innlimað í Samfylkingu, eða einhverja nýja kennitölu. Hann getur því horfið af sviðinu, án þess að fylgi Vg verði mælt beint í næstu kosningum.

[Seiken (IP-tala skráð) 5.6.2012 kl. 20:18]

Sammála Hilmari.

Það sætir furðu ef að þeir VG liðar eru ennþá til sem halda að flokkurinn sé á móti aðild að ESB. Hver trúir því að Árni Þór sé ESB andstæðingur, eða Björn Valur, eða Katrín eða bara SJS? 

Það hafa alltaf verið til aðildarsinnar innan VG og þeir einfaldlega plötuðu aðildarandstæðinga VG með í þennan leiðangur. Stefnunni er svo viðhaldið með því að hóta að gera ESB andstæðingana ábyrga fyrir falli fyrstu vinstri stjórnarinnar ef þeir halda sig ekki á mottuni.

Ein skoðanakönnunin í vikunni sýndi VG í 5% fylgi. Ég geri ekki endilega ráð fyrir að það verði niðurstaðan en ef að fólk vantar einhver fordæmi fyrir afhroði hjá VG í kosningum eftir hrun, þá nægir að minna á að Sóley Tómasdóttir komst inn í borgarstjórn fyrir algjöra hundaheppni kl. 5:00 á kosninganótt. Annars hefði flokkurinn sem á að heita ómengaður af hruninu núllað í höfuðborginni. 

Ætli kjarni málsins sé ekki sá að þetta er ekki rétti tíminn fyrir gamla VG liða til þess að velta því fyrir sér hvenær flokkurinn snýr af villu síns vegar. Það verður búið að jarða flokkinn áður en að svar fæst við þeim vangaveltum. Það eina sem er hægt að gera úr þessu er að keyra ESB andstöðuna undir öðrum flokksmerkjum en "VG".

[Ásthildur Cesil Þórðardóttir, 5.6.2012 kl. 21:03]

Sammála þér eins og oft áður Seiken.  

[Ekkert fjárans esb hér (IP-tala skráð) 6.6.2012 kl. 07:45]

Og hvaða flokk getum við Andstæðingar esb kosið?

[Ásmundur (IP-tala skráð) 6.6.2012 kl. 16:10]

Fáránlegasta tillaga sem hefur komið fram á Alþingi er tillaga Ögmundar og Guðfríðar Lilju um að kosið verði um ESB-aðild fyrir árslok þó að enginn samningur liggi fyrir.

Fróðlegt væri að heyra hvernig þau hafa hugsað sér framhaldið ef þjóðin samþykkir aðild. Væntanlega þannig að ESB ákveði einhliða það sem ekki hefur unnist tími til að semja um. Það væri landráð.

Þessi ótrúlega vitleysa endurspeglar mikla örvæntingu. Ljóst er að þau óttast að samningurinn verði svo hagstæður að þjóðin samþykki hann enda svo langt í að honum ljúki að líkur eru á að ástandið í Evrópu hafi þá lagast.

Með því að kosið verði áður en samningur liggur fyrir þurfa þau heldur ekki að standa reikningsskil gjörða sinna þegar allur blekkingaáróðurinn verður afhjúpaður með samningnum.

Samningaferlið tekur nokkur ár. Stuðningur við aðild sveiflast að sjálfsögðu mikið á þessum tíma. Það var fyrirfram vitað þegar lagt var af stað að það kæmi trúlega að því að fylgið færi vel niður fyrir 50%. Það er því fráleitt tilefni til að slíta viðræðum.

Það er því engin vitglóra í öðru en að klára samninginn. Þegar sú stund rennur upp gæti viðhorfið til ESB verið miklu jákvæðara fyrir utan að samningurinn þyki ákaflega hagstæður.

Reyndar er ekkert mark takandi á skoðanakönnunum (né kosningum) fyrr en samningur liggur fyrir og menn vita um hvað er verið að kjósa.

[palli (IP-tala skráð) 6.6.2012 kl. 16:49]

Vá, páfagaukurinn skrækir og gargar eins og enginn sé morgundagurinn.

Átti ekki að klára samninginn 2010, Ásmundur? Hvar eru annars samningsmarkmiðin?

Æji, sorry, maður á auðvitað ekki að minnast á veruleikann við páfagaukinn, það espir upp í honum geðveiluna. Verst að hann er allt of heimskur til að nokkru sinni átta sig á eigin bága andlega ástandi, þeim sorglega brandara.

[palli (IP-tala skráð) 6.6.2012 kl. 16:52]

"....enda svo langt í að honum ljúki að líkur eru á að ástandið í Evrópu hafi þá lagast."

Hahahahaha!!!!

Þetta er svo rammbilað að það tekur því ekki að leiðrétta fíflið, en fyndið er það.

Hahaha!!

[Elle_, 6.6.2012 kl. 18:28]

Klára hvaða samning og slíta hvaða viðræðum??  Málið hefur aldrei snúist um samning og viðræður.  Málið snýst um ofbeldi og yfirtöku.  Og var alltaf óleyfismál og lýðræðissvipting.  Sættu þig við það, ´Ásmundur´, í þinni örvæntingu.