Króatía gengur í ESB með stuðningi þriðjungs þjóðarinnar

Frá því var sagt í gær að 66% Króata hefðu samþykkt inngöngu í ESB en þess var óvíða getið að innan við helmingur kjósenda mætti á kjörstað eða 47%. Það var því í raun innan við þriðjungur kjósenda eða 31% sem samþykkti ESB-aðild eftir mikinn áróður, fjáraustur og mútufé frá ESB.

 

Króatar flykktust á kjörstaði þegar landið hlaut sjálfstæði 1992; þátttakan í þeim kosningum var 84%. En í gær tuttugu árum síðar þegar kosið var um hvort Króatar ættu að framselja ýmsa mikilvægustu þætti fullveldis síns til ESB mættu aðeins 47% á kjörstað samkvæmt upplýsingum ABC fréttastofunnar.

 

Andstæðingar ESB-aðildar lýstu því yfir í gærkvöld að vegna lélegrar kosningaþátttöku væri þjóðaratkvæðið ólögmætt og þeir myndu aldrei viðurkenna þessa niðurstöðu. Forsætisráðherra landsins, Zoran Milanovic, viðurkenndi að þátttakan í kosningunum „hefði mátt vera meiri“ og bætti því við: „Þjóðin er bersýnilega þreytt“ – en fæstir vita hvað hann átti við með því.

 

Áhugaleysi almennings er víðast hvar fastur fylgifiskur ESB-aðildar. Brusselvaldið er afar fjarlægt og framandi í augum flestra Evrópubúa enda á allra vitorði að almennir þegnar í aðildarríkjum ESB hafa lítil sem engin áhrif á afgreiðslu mála í miðstýrðum stofnunum sem lúta í engu eftirlitsvaldi kjósenda. Í þjóðríkjum álfunnar geta kjósendur fellt ríkisstjórnir sem þeim líkar ekki við en í ESB hafa þeir engin áhrif. Yfirleitt er afar dræm þátttaka kjósenda í aðildarríkjum þegar kosið er til þings ESB og sum staðar í kringum 30 %.

 

Áhugaleysi og eftirlitsleysi alþýðu manna með því sem gerist í valdamiðstöðinni í Brussel veikir mjög lýðræði í aðildarríkjunum og er eitt og sér næg ástæða til að hafna ESB-aðild.

 

Ragnar Arnalds   

Um 67% sögðu já við ESB-aðild

Athugasemdir

[V.Jóhannsson (IP-tala skráð) 23.1.2012 kl. 13:05]

Hvers vegna mæta ekki andstæðingar ESB aðildar á kjörstað?

Það er eitthvað mjög rangt við þessar fréttir.

Sannur andstæðingur aðildar er fyrstur á kjörstað!

[Eggert Sigurbergsson, 23.1.2012 kl. 14:01]

"Forseti Króatíu, Ivo Josipovic, hefur lýst því yfir að það sé óábyrgt að greiða atkvæði gegn aðild og utanríkisráðherrann, Vesna Pusic, hvetur fólk til að greiða atkvæði með inngöngu til bjargar efnahag landsins."

Undir þessum orðum sátu flestir Króatar heima með óbragð í muninum enda erfitt að kjósa með gjaldþroti eigin þjóðar. Þetta kallast víst þjóðernisjafnaðamannalýðræði eða ESBlýðræði.

Ef Króatía hefði sagt NEI þá hefði það kostað þjóðina samstundis 1,4miljarð Evra í töpuðum múturgreiðslum frá ESB.

[Ásmundur Harðarso (IP-tala skráð) 23.1.2012 kl. 23:30]

V. Jóhannsson, hvers vegna segirðu að andstæðingarnir hafi ekki mætt á kjörstað?

Ef stuðningsmenn aðildar eru aðeins 31%, eins og Vinstrivaktin heldur fram, þá eru andstæðingar aðildar aðeins 16% þjóðarinnar.

Að sjálfsögðu eiga 16% ekki að ráða. Þess vegna er 31% stuðningur eða 66% greiddra atkvæða ótvíræð niðurstaða.

[Stefán (IP-tala skráð) 24.1.2012 kl. 05:45]

Eftirlitsvald kjósenda?  

Getur þú, Ragnar, sagt mér hvernig þessu eftirliti er háttað á Íslandi?

Hvernig hafa íslenskir kjósendur meira vald á Íslandi en í EBS-ríki?

[Stefán (IP-tala skráð) 24.1.2012 kl. 05:48]

Eitt sem ég gleymdi.  Get ég einhvers staðar lesið hvernig "eftirlitsvaldi kjósenda" er háttað á Íslandi?

Er þetta einhversstaðar í lögum eða stjórnarskránni eða bara flott orð sem hefur enga merkingu nema á fjögurra ára fresti? 

[Vinstrivaktin gegn ESB, 24.1.2012 kl. 12:04]

Eftirlitsvald kjósenda felst því að geta tekið þátt í umræðum á vinnstöðum og gatnamótum, í vinahópi eða heitu pottunum að ekki sé minnst á fjölmiðlana og netið, um það sem efst er á baugi í þjóðmálaumræðunni. hverju sinni Kjósendur rökræða og gagnrýna gerðir stjórnmálamanna og veita þeim ráðningu í kosningum ef þeim mislíkar. Þetta er hluti af lýðræðinu, eftirlitsvaldi fólksins. Fátt eða ekkert af þessu á við um tengsl kjósenda við það sem er að gerast í Brussel. Eftirlitsvald fólksins með því sem þar gerist er nánast ekkert. Sem sagt: verulegur lýðræðishalli eins og líka er sagt. - RA

[Stefán (IP-tala skráð) 24.1.2012 kl. 13:42]

Þetta eftirlitsvald kjósenda er einnig hvað varðar ESB, allavega í Þýskalandi.

Ég get fullvissað þig um það.

En eins og þú veist, þá tölum við mest um það sem gerist í okkar nánasta umhverfi og svo um það sem gerist fjær.

Það er alltaf skemmtilegra að tala um bæjarpólitíkina o.s.frv.