„ESB hannað til að bregðast við krísum‟

Þannig var yfirskriftin á viðtali Ríkisútvarpsins sl. laugardag við Aðalstein Leifsson aðstoðarprófessor hjá Háskólanum í Reykjavík og formann stjórnar Fjármálaeftirlitsins. Það veitir ekki af að eiga góða að til að stappa í menn stálinu þegar heimsbyggðin horfir upp á brotalamir og dauðastríð ósjálfbærs efnahagskerfis. Þar er Evrópusambandið í aðalhlutverki með Evru-myntbandalagið sem að margra mati var hannað til þess að steyta á skeri.  Váboðarnir hafa hrannast upp einn af öðrum síðustu misseri, en viðbrögð ESB verið fálmkennd og fengið einkunnina OF LÍTIÐ - OF SEINT. Hérlendis eru þó enn til sanntrúaðir um ágæti Evrunnar eins og Aðalsteinn sem boðar að ráðin í efnahags- og fjármálum eigi að taka af aðildaríkjunum og miðstýra frá Brussel. Aðeins sá möguleiki sé raunhæfur. Það er munur að hafa slíka leiðsögn frá stjórnarformanni íslenska Fjármálaeftirlitsins. Hann botnaði viðtalið með eftirfarandi söguskýringu: „ESB var stofnað til að takast á við krísur og erfiðleika og þegar menn skoða sögu Evrópusambandsins sjá menn að það er einmitt þetta sem  menn eru bestir í.‟

Hjörleifur Guttormsson

Athugasemdir

[Árni Gunnarsson, 9.8.2011 kl. 09:00]

Írsk-ættaður bóndi vestur í Dölum skopaðist að afli fjöldans við ráðgjöf þegar um heimska menn væri að ræða. En það er orðið fjandi langt síðan.

Nú eru hins vegar uppi öll teikn um að hið viðurkennda hagkerfi sé liðið undir lok. Nú þurfa þjóðir að búa sig undir viðskiptahætti samvinnuhreyfingarinnar.

Við sköpum ekki aðvinnu í heimabyggð með því að sækja iðnaðarstörfin til Asíulandanna.

Heimskan verður aldrei gerð útlæg en okkur ber að reyna að forðast hana eftir megni. Hún má alls ekki verða aflið sem stjónar.