Himinn og haf er á milli sjónarmiða Íslands og ESB og óraunsætt að undanþágur fáist

Gunnar Haraldsson, forstöðumaður Hagfræðistofnunar, telur hugmyndir um varanlegar undanþágur í sjávarútvegi og landbúnaði ekki raunsæjar. Himinn og haf sé á milli sjónarmiða Íslands og ESB.

 

Í viðtali sem birt er í Mbl. í dag segir Gunnar Haraldsson í framhaldi af skýrslu sem Hagfræðistofnun Háskóla Íslands sendi frá sér í vikunni um stöðu aðildarviðræðna Íslands og ESB að óraunsætt sé að Ísland geti fengið varanlegar undanþágur frá reglum ESB á sviði sjávarútvegs og landbúnaðar í aðildarviðræðum við sambandið. Í frétt blaðsins segir orðrétt:

 

„Gunnar var spurður að því hvort raunsætt væri að hans mati að Ísland gæti fengið varanlegar undanþágur eða einhvers konar varanlegar sérlausnir frá reglum ESB á sviði sjávarútvegs og landbúnaðar.

 

»Nei. Þrátt fyrir að tæknilega sé hægt að fá varanlegar sérlausnir í aðildarsamningi verður það að teljast mjög ólíklegt að slíkar undanþágur fáist, sérstaklega hvað varðar landbúnað og sjávarútvegsmál. Í því aðildarferli sem Ísland gengur í gegnum er áhersla lögð á aðlögun að reglum sambandsins en ekki á að veita undanþágur,« segir Gunnar.

 

Aðrar aðstæður

 

Spurður um umræðuna um mögulegar undanþágur og sérlausnir segir hann að þær undanþágur sem stundum sé vísað til í umræðu um þessi mál séu annað hvort ekki varanlegar, eða til komnar við allt aðrar aðstæður en nú ríki.

 

»Eins og fram kemur í skýrslunni hafa engar undanþágur fengist í landbúnaði og sjávarútvegi í fortíðinni og með breyttum áherslum hjá Evrópusambandinu sjálfu verður það að teljast enn ólíklegra en áður að undanþágur fengjust á þeim sviðum. Ef litið er á þær áherslur sem birtast í meirihlutaáliti utanríkismálanefndar sem vegvísi um þær sérlausnir sem Ísland hefði farið fram á í sjávarútvegsmálum, ef sá kafli hefði verið opnaður, og þær bornar saman við áherslur Evrópusambandsins ætti að vera ljóst að himin og haf ber á milli,« segir Gunnar Haraldsson.

Athugasemdir

[Ásthildur Cesil Þórðardóttir, 21.2.2014 kl. 14:08]

Fólki gengur afskaplega illa að skilja þetta því miður.