. . . og megum við þá ekki vera með í Eurovision?

Stefán Ólafsson, prófessor í félagsvísindum með meiru, stakk niður penna á dögunum og leiddi að því félagsvísindaleg rök að ef Íslendingar létu eiga sig að ganga inn í Evrópusambandið þá yrði ein af hinum voðalegu afleiðingum þess útilokun frá þátttöku í söngvakeppni þeirri sem venjulega er kölluð Júróvisjón!

Hafði prófessorinn, sem vonlegt er, af þessu töluverðar áhyggjur enda félagsvísindalegt viðfangsefni sú dæmalausa múgsefjun sem hér verður í hvert sinn sem þessi keppni stendur yfir svo ekki sé nú minnst á aðdragandann.

Mér að meinalausu mætti hætta öllu Júróvisjón standi og stjörnuleik í því sambandi en ekki hef ég þó trú að svo verði í bráð - enda þjóðin ánetjuð þessum fjanda og sjálfsagt félagsvísindalegt viðfangsefni að gogga hana úr því neti.

Hitt er annað - og þessu, eðlilega, óskylt - og það er sú staðreynd að við sem berjumst gegn innlimun Íslands í Evrópusambandið höfum ekkert á móti menningarsamskiptum við Evrópuþjóðirnar, einar sér eða í stærri hópum, þótt svo sumum ESB-agentum líki vel að ljúga öðru upp á okkur. Við fögnum menningarlegum margbreytileika - ólíkt mörgum þeim sem halda að Evrópa sé nafli alheimsins - og við getum jafnvel, fyrir siðasakir og -umburðarlyndis, kinkað kolli í átt að Júróvisjón og étið snakk úr poka á meðan Evrópuþjóðirnar gefa hverri annarri stig eftir fyrirfram gefinni formúlu.

Formúlu sem lýsir þó einhverri rest af þjóðartaug sem enn bærist og finnur sér helst útrás í þessari sykurhúðuðu söngvakeppni. Sú þjóðartaug er herpt og klemmd þegar aðrar veigameiri ákvarðanir eru teknar í sameinaðri Evrópu - þar ráða þeir sem alltaf hafa ráðið, og nota bene, ráða Júróvisjón. 

- gb.

 

Pistill Stefáns:

http://blog.pressan.is/stefano/2013/05/10/verdur-eurovision-bonnud-a-islandi/ 

Athugasemdir

[Anna Sigríður Guðmundsdóttir, 18.5.2013 kl. 14:56]

Júróvision snýst um að auðga Evrópu með samvinnu um list. Allt sem eflir frið, samvinnu og sátt er mikils virði fyrir heildina, hvar sem er í heiminum. 

Sumir vilja skapa sundrungu um allt sem fallegt er og gott. Svo helteknir geta sumir áróðursmeistarar orðið í sinni rætnu rökleysu, að nota allt mögulegt og ómögulegt,  eins og vanþroska kjánar, til að skapa úlfúð, sundrungu illindi og  mannskemmandi umtal. 

Þeir veljast til skítadreifara-stjórnunarinnar, sem eru yfirmáta vanþroskaðir, rætnir, gráðugir og sundrungar-sinnaðir.

Það er takki á sjónvarpinu sem hægt er að nota, ef ekki er áhugi á júróvision og fótbolta-fréttatímum/leikjum.

Gangi öllum þessum flottu söngvurum vel í kvöld, og almættið algóða verndi friðinn og kærleikann.

M.b.kv.

[Kolbrún Hilmars, 18.5.2013 kl. 16:42]

Júróvisjón er ESB algjörlega óviðkomandi.  Þessi söngvakeppni býður öllum Evrópuríkjum, utan og innan ESB (og jafnvel utan Evrópu) upp í dans - í boði evrópskra sjónvarpsstöðva.  Bara gaman að því.

Hitt er svo verra mál þegar ESB sinnar vilja meina að þetta sé eitthvert sérstakt fyrirmyndardæmi um hina góðu fjölmenningu sem viðgengst í álfunni.

[Elle_, 19.5.2013 kl. 17:01]

Allar blekkingar reyna nú ESB-sinnar til að fá fram fullveldisframsal.  En heil þjóð er ekki fífl.  Og ætti lærður prófessor ekki að vita að Eurovision kemur hinu svokallaða 'Evrópu'sambandi ekkert við?  Prófaðu annan, Stefán.