Þjóðin hafnaði óráðsdraumum Samfylkingarinnar um aðild að ESB

Össur og Árni Páll ráku stífan áróður fyrir því á endaspretti kosningabaráttunnar að aðildar­umsókn­inni yrði haldið til streitu. Afhroð Samfylkingarinnar felur í sér skýr skilaboð frá þjóðinni, ekki síst þegar við bætist að flokkar sem boðuðu að aðildarferlinu yrði hætt nú þegar fengu ótvíræðan meiri hluta á þingi til að fylgja fram þeirri stefnu.

 

Kosningaúrslitin í nótt endurspegla afstöðu þjóðar sem stöðugt hefur látið þann vilja sinn í ljós í öllum könnunum frá því að umsóknin um ESB-aðild var send til Brussel að hún vilji ekki ganga í ESB. Allt að tveir af hverjum þremur aðspurðum í könnunum hafa lýst þessum vilja sínum. En forystulið Samfylkingarinnar hefur látið þá staðreynd sem vind um eyru þjóta.

 

Framsóknarflokkurinn hefði ekki unnið þann mikla sigur, sem nú blasir við, ef flokkurinn hefði ekki nánast dauðhreinsað sig af öllu daðri við ESB-aðild sem lengi einkenndi flokkinn á árunum fyrir hrun. Sjálfstæðisflokkurinn hefur einnig gengið í gegnum mikinn hreinsunareld. Landsfundur flokksins heimtaði jafnvel í vetur að dyrum áróðursstofu ESB á Íslandi yrði endanlega skellt í lás, og þótti þá ýmsum nóg um. En kjarni málsins er sá að þessir tveir stóru flokkar nutu þess vel í kosningabaráttunni að stefna þeirra var í góðum takti við vilja mikils meiri hluta þjóðarinnar.

 

Hins vegar varð eindregin afstaða stóru flokkanna í afstöðu sinni til ESB-aðildar og fyrirsjáanleg sigurganga þeirra þess valdandi að langflestir kjósendur litu nánast á það sem afgreitt mál að aðildarferli landsins í faðm ESB væri lokið og ekki þyrfti frekar að hafa áhyggjur af þeirri ólukkulegu vegferð. Þess vegna varð hlutur Regnbogans sem helgaði sig þessu máli stórum rýrari en ella hefði verið.

 

Baráttunni gegn ESB-aðild er þó langt í frá lokið. Kjósendur þekkja það af dapurri reynslu að kosningasigrar eru eitt og efndir á kosningaloforðum annað. Þessum ótvíræða sigri andstæðinga ESB-aðildar sem meðal annars felst í úrslitum kosninganna verður nú að fylgja eftir af fullum þunga. Væntanlega verður efnt til þjóðaratkvæðis á komandi kjörtímabili um ESB-málið. Þá má spurningin ekki verða óljós og snúast t.d. um „að klára viðræðurnar“. Loðið orðalag af þessu tagi hefur óspart verið notað í skoðanakönnunum til að töfra fram sem jákvæðasta afstöðu svarenda í könnunum, því að  auðvitað getur það „að klára viðræður“ bæði þýtt að ljúka viðræðunum með þeirri niðurstöðu að Ísland eigi ekki heima í ESB en líka hitt að ljúka viðræðum með formlegum samningi við 27 ríki um inngöngu Íslands í ESB. Niðurstaða í þjóðaratkvæði, ef spurningin er óljós, segir nánast engum eitt né neitt.

 

Þjóðin verður að fá að svara spurningu sem ekki verið misskilin og felur það eitt í sér að kjósendur svari því afdráttarlaust hvort þeir vilji ganga inn í ESB eða ekki.

 

Við látum þetta nægja að sinni um úrslit kosninganna, en höldum umræðunni áfram síðar í dag og fjöllum þá um útkomu VG. - RA

„Gamalkunnugt mynstur“

Athugasemdir

[B.N. (IP-tala skráð) 28.4.2013 kl. 13:23]

Bíddu,bíddu það verða kannski tvær ríkisstjónir á kjörtímabilinu.

Eg sé fyrir mér Sjálfstæðisflokkinn og Framsókn núna í byrjun og svo ESB ríkistjórn undir stjórn Framsóknar með Samfylkingu og Bjarta Framtíð innan borðs þegar fer að líða á tímabilið.

Nú svo er aldrei aðp vitahvort við fáum strax ESB ríkisstjórn undir þessum merkjum sem ég talaði um síðast

Baldvin Nielsen

[Kristbjörn Árnason, 28.4.2013 kl. 19:42]

Þetta er e.t.v. ekki rétt ályktun Ragnar minn.

En þjóðin hafnaði Regnbogaframboðinu algjörlega.

Það framboð fékk um 1% fylgi.

Hvernig á að túlka þá úreið?

Ég held að þessi ESB - mál hafi bari ekki efst í huga kjósenda