Æ fleiri brestur þolinmæði gagnvart ESB-daðri VG

Meiri hluti þjóðarinnar er andvígur inngöngu í ESB og vill afturkalla umsóknina. Enginn samningur er í augsýn og enginn árangur sjáanlegur af þessum rándýra leiðangri. Samfylkingin er í raun ein á báti, og æ fleiri stuðningsmenn VG brestur þolinmæði til að bíða eftir því að forysta VG sjái sig um hönd.

 

Kannanir sýna að það stefnir í hrun hjá VG í komandi kosningum, eitt mesta hrun sem íslenskur stjórnmálaflokkur hefur mátt þola. ESB-leiðangur flokksins þvert á fyrirheit í seinustu kosningum á stóran þátt í þeim hrakförum sem við blasa. Samkvæmt könnunum fengi flokkurinn 11-12% fylgi í næstu kosningum og 7 – 8 þingmenn sem er talsvert minna fylgi en flokkurinn fékk í kosningunum 2007, hvað þá árið 2009 þegar flokkurinn fékk tæp 22% og 14 þingmenn. Jafnframt bendir margt til þess að hrun VG gæti orðið enn meira en kannanir á þessu hausti bera vott um.

 

Sé kjósendahópur í seinustu könnun skoðaður nánar kemur í ljós, að þótt ESB-andstæðingar hafi umvörpum flúið flokkinn á seinustu árum er enn mikill meirihluti kjósenda VG andvígur ESB-aðild. Í þeim hópi eru vafalaust fjölmargir sem enn doka við til að sjá hvort forystan sjái sig ekki um hönd og minni Samfylkinguna á að VG gaf Össuri einungis tækifæri á þessu kjörtímabili til að sýna hvað í boði sé. Þar sem það er margyfirlýst stefna VG að það samrýmist ekki hagsmunum Íslendinga að ganga í ESB hlýtur umboðið sem VG veitti Össuri til að sækja um aðild að renna út á þessum vetri. Aðildarviðræður ætti ekki að hefja á ný nema því aðeins að landsmenn leggi blessun sína yfir áframhaldandi umsóknar- og aðlögunarferli í sérstakri þjóðaratkvæðagreiðslu.

 

Ýmsir þingmenn VG vöktu vonir um það snemma í haust að umsóknarferlið yrði nú tekið til endurskoðunar. Síðan þá hefur ekkert frá þeim heyrst. Þúsundir stuðningsmanna VG spyrja sig að því í aðdraganda forvala til undirbúnings framboða hvort forystan ætli að láta Samfylkinguna draga sig inn í komandi kosningar sem hækjuflokk ESB-aðildar á sama tíma og allar kannanir sýna að þjóðin vill ekki ganga í ESB og enn síður hugsanlegir kjósendur VG. Sjáist engin merki um stefnubreytingu í forystuliði VG munu margir telja tímabært að styðja önnur framboð með skýrari stefnu í komandi kosningum.

 

Samkvæmt nýlegri könnun Capacent Gallup kom í ljós að um 54% þjóðarinnar vilja beinlínis afturkalla umsóknina, rúm 36% vilja halda henni til streitu og 9,9% voru hlutlaus. Af þeim sem taka afstöðu vilja því tæp 60% afturkalla umsóknina. Spurning dagsins er því: hversu lengi ætlar VG að ganga í berhögg við vilja meiri hluta þjóðarinnar og vilja kjósenda sinna? Eða ætla forystumenn VG að fórna flokki sínum í þágu ESB-aðildar sem þeir segjast þó andvígir?

 

Athugasemdir

[Ásthildur Cesil Þórðardóttir, 15.11.2012 kl. 14:12]

Flottur pistill, vona að VG átti sig á hvað er að gerast og snúi við þessu blaði og ógeðsdrykk.

[Ásmundur (IP-tala skráð) 15.11.2012 kl. 15:29]

Sjálfstæðismenn voru stór hluti þeirra sem studdu VG í síðustu kosningum vegna ESB-andstöðunnar. Eins og skoðanakannanir sýna hefur fylgi Sjálfstæðisflokksins vaxið gífurlega frá kosningum. Stór hluti þess vaxtar kemur frá VG.

Þetta var auðvitað tímabundið fylgi út af einu máli enda eru sjálfstæðismenn almennt mjög andsnúnir stefnu VG. Þeir koma ekki aftur, hversu vel sem er boðið. Sjálfstæðisflokkurinn er nú harðasti ESB-andstæðingurinn í hópi stjórnmálaflokka.

Raunverulegir stuðningsmenn VG, sem nú hafa snúið baki við flokknum, eru sárafáir. Það var mikilvægt fyrir flokkinn að losa sig við þá til að skapa frið. Aðeins með þeim hætti verður VG valkostur fyrir óákveðna kjósendur.

Ég tel líklegt að nýir kjósendur VG verði í raun fleiri en þeir sem hverfa á braut að sjálfstæðismönnum undanskildum. Að sjálfsögðu eykst fylgið ekki með því að svíkja úrslitaatriði stjórnarsáttmálans. Svik eru atkvæðafæla.

Flokki, sem sýnir eftirminnilega að hann er ekki traustsins verður, verður hafnað. Flokkur, sem eltir rugludalla sem styðja ríkisstjórn en vilja svíkja stjórnarsáttmálann, er ekki tekinn alvarlega og fær lítinn sem engan stuðning.    

[Árni Gunnarsson, 15.11.2012 kl. 17:16]

Líkt og önnur framboð hlaut V.g. framboð, fylgi í samræmi við ályktanir flokksins á landsþingi sem og þær áherslur sem frambjóðendur leiddu fram í kosningabaráttunni.

Ert þú með einhverjar upplýsingar um það Ásmundur að frambjóðendur V g. hafi viðrað við kjósendur væntanlegan stjórnarsáttmála um að sótt yrði um aðild að ESB?

Er þér ekki útlátalaust að segja okkur frá þessu? Ekki er þér svo stamhent við að viðra þinn "eina sannleika og siðferði" í stjórnmálum þjóðar vorrar.

Til að taka af þér ómak vil ég upplýsa þig um að kjósandi á fulla heimtingu á að sá frambjóðandi sem sækir til hans umboð vegna afstöðu í tilteknu pólitísku deilumál standi að því umboði með fullum heilindum og einurð.

Vinstri grænir tóku nefnilega ekki við umboði frá kjósendum Samfylkingar.

Þeirra kjörfylgi byggðist að mjög miklu leyti á einarðri andstöðu við aðildarumsókn. Þetta er ekki flókið og þetta veit öll íslenska þjóðin. Þess vegna er stuðningur V.g. við aðildarumsókn svik við kjósendur. Vinstri grænir þingmenn eru beinlínis óþverralegir svikarar við kjósendur sína sem komið er í ljós að voru frá öllum pólitískum samtökum.

En kannski hefur gleymst að segja þér frá því (eins og því hvað þú heitir réttu nafni) að Alþingi starfar í umboði kjósenda.

Það er kominn tími til að þú

[Ásthildur Cesil Þórðardóttir, 15.11.2012 kl. 18:31]

Fyndið innlegg hjá Ásmundi svokölluðum, þar sem landsfundir Sjálfstæðisflokksins hafa alltaf hafnað inngöngu í ESB, og sterk andstaða hefur verið í þeim flokki með nokkrum ísköldum niðurstöðum.  Frekar að fólk úr Samfylkingunni sem vill ekki inn í ESB hafi treyst á VG til að standa við stóru orðin.  Svo og þeir sem eru ekki svokallað fastafylgi.

[Ásmundur (IP-tala skráð) 15.11.2012 kl. 20:23]

VG eru enn á móti ESB-aðild.

Flokkurinn hefur því ekkert svikið enda er ekki stafkrókur um það í stefnu flokksins að flokkurinn eigi að standa í vegi fyrir að þjóðin fái að kjósa um aðild enda samræmist það ekki lýðræðislegum vinnubrögðum.

Auk þess verða allir flokkar að gefa eftir einhver af sínum stefnumálum til að taka þátt í samsteypustjórn. Annars eru þeir dæmdir til ævarandi áhrifaleysis og eiga því tæpast rétt á sér. 

Aðildarumsókn var verðið sem VG varð að greiða fyrir að komast til áhrifa í ríkisstjórn. Það verður að teljast vel sloppið enda aðeins um það að ræða að veita þjóðinni lýðræðislegan rétt til að kjósa um aðild. 

Að samþykkja myndun ríkisstjórnar með ESB-umsókn á stefnuskránni en berjast síðan gegn umsókninni ber vott um óheiðarleika og spillingu. Greinilega er ekkert mark takandi á slíku fólki.

Slík vinnubrögð eiga sér varla nokkur fordæmi. Samningamenn ESB höfðu aldrei kynnst öðru eins.

[Ásthildur Cesil Þórðardóttir, 15.11.2012 kl. 20:43]

Þú segir fréttir Ásmundur!  ef þeir vilja ekki þarna inn, af hverju samþykkja þeir þá að eyða milljónum í samningaferli sem þeir vilja ekki?

[Ásmundur (IP-tala skráð) 15.11.2012 kl. 20:48]

Ásthildur, ýmsir hátt settir sjálfstæðismenn voru greinilega opnir fyrir ESB-aðild fyrir kosningar, þar á meðal formaður og varafornaður flokksins. Fyrrverandi varaformaður og Illugi Gunnarsson voru einnig í þessum hópi.

Margir harðir ESB-andstæðingar í Sjálfstæðisflokknum treystu því þess vegna ekki að Sjálfstæðisflokkurinn myndi ekki eiga þátt í að sækja um aðild. Þeir treystu VG einfaldlega betur í þessum efnum.

Þeir urðu fyrir vonbrigðum. Þeir geta aðeins sjálfum sér um kennt enda hafa VG engar skyldur gagnvart slíkum tækifærissinnum. 

[Valdimar Samúelsson, 15.11.2012 kl. 20:51]

Ásmundur. Að svíkja þjóð fyrir hagsmuna pólítík er ekki rétt. Sumir flokkar gera þetta. Svona lagað á aldrei að gleymast.

[Ásthildur Cesil Þórðardóttir, 15.11.2012 kl. 20:53]

Formaðurinn var ekki hliðhollur ESB fyrir kosningar, með samþykkt landsfundar á bakinu, aftur á móti snérist hann eins og vafningur með sitt ískalda mat seinna á alþingi.  Aftur á móti voru þarna ESB sinnar Þorgerður Katrín, Ragnheiður Ríkarðsdóttir, Illugi, sem  nú hefur aftur skipt um skoðun, eftir opinni línu á Dv að dæma. 

[Ásmundur (IP-tala skráð) 15.11.2012 kl. 20:56]

Ásthildur, þeir vildu að þjóðin fengi að ráða. Kemur það á óvart að einhverjir skuli bera virðingu fyrir lýðræðinu?

Allir þeir sem voru hlynntir aðild fyrir kosningar en greiddu atkvæði gegn umsókninni eru meira áhyggjuefni.

[Ásmundur (IP-tala skráð) 15.11.2012 kl. 21:02]

Valdimar, það getur aldrei verið svik við þjóðina að leggja sitt af mörkum til að hún fái að kjósa um jafnmikilvægt málefni og ESB-aðild. 

[Ásthildur Cesil Þórðardóttir, 15.11.2012 kl. 21:08]

Ráða hverju Ásmundur.  Þetta er ekki að kíkja í pakka, heldur innlimun, ef þeir vildu að þjóðin fengi að ráða, áttu þeir að spyrja ÁÐUR EN ÞEIR SÓTTU UM.  En málið er að samkvæmt orðum í skýrslu ESB er ekki reiknað með því að þjóð sæki um aðild til að kíkja í pakka, þjóð sækir um af því að það er einlægur vilji til að vinna að inngöngu.  Á þessu er regin munur. 

[Ásmundur (IP-tala skráð) 15.11.2012 kl. 21:44]

Ásthildur, ráða hverju? Að sjálfsögðu hvort við göngum í ESB.

Það er heimskulegt að láta fólk kjósa um eitthvað sem það veit ekki hvað er enda hefur engin ESB-þjóð viðhaft slík vinnubrögð.

Það er ekki tímabært að kjósa fyrr en samningur liggur fyrir. Þá fyrst er hægt að taka upplýsta ákvörðun.

Atkvæðagreiðsla áður en samningur liggur fyrir myndi að miklu leyti snúast um blekkingaráróður og væri því móðgun við lýðræðið.

Leikur með orð eins og að "kíkja í pakkann" skiptir engu máli. Það sem skiptir máli er að þjóðin ákveður í atkvæðagreiðslu hvort af aðild verður.

[Elle_, 15.11.2012 kl. 22:13]

Vinstrivakt, ýmsir alþingismenn VG vöktu ekki vonir um neitt í haust að ég viti.  Vitað var að það væri eintómt fals sem fyrr og bent var á það af nokkrum.  Þar var Kata fremst í flokki og ætlaði að fara yfir málið og skoða málið og skoða vandlega, man ekki orðalagið, nema orðið ´heildstætt´ sem var endutekið og síendurtekið. 

Þeir sem kusu VG urðu fyrir þjófnaði Kötu og Steingríms, og fjölmargra annarra í flokknum, líka vegna ICESAVE.  Þar með talinn allur flokkurinn eins og hann lagði sig í ICESAVE1 og fjöldi í flokknum í ICESAVE2, Ásmundur líka.

[Ásmundur (IP-tala skráð) 16.11.2012 kl. 08:03]

Að hætta umsóknarferlinu í miðjum klíðum væri svo ótrúlegt rugl að ég er viss um að það yrði mjög illa séð af ESB og umheiminum.

Mér finnst ekki ólíklegt og reyndar mjög eðlilegt að við myndum þá vera látinn greiða allan áfallinn kostnað enda hefði öll vinnan fram að þessu verið unnin fyrir gýg.

Allt öðru máli gegnir um að hafna aðild þegar samningur liggur fyrir. Þá liggja allar upplýsingar fyrir til að taka ákvörðun. Sá kostnaður sem þá hefur verið stofnað til var nauðsynlegur til að taka upplýsta ákvörðun.

Ástandið á evrusvæðinu núna er alls ekki ástæða til að hætta við ferlið enda stendur ekki til að kjósa um aðild fyrr en eftir einhver ár. Þá gæti ástandið verið allt annað og betra.

Við verðum að haga okkur eins og þjóð meðal þjóða en ekki eins og þroskahömluð þjóð. Það þýðir að við hlaupum ekki frá hálfköruðu verki með gífurlegum kostnaði. Slíkur hringlandaháttur einkennir eingöngu sturlaðar þjóðir.

Það var fyrirséð áður en ferlið hófst að fylgi með því færi upp og niður meðan á því stendur. Það er því ótrúlegt rugl að hætta ferlinu þegar það gerist að þeir sem styðja það lenda í minnihluta skv skoðanakönnun.

Þá er verið að sólunda stórfé til einskis því að það var fyrirséð í upphafi að þetta myndi gerast. Þess vegna væri eðlilegt að við greiddum allan áfallinn kostnað. Þjóð sem hagar sér þannig kann augljóslega ekki fótum sínum forráð.

[Kolbrún Hilmars, 16.11.2012 kl. 14:09]

Ég er nú þeirrar skoðunar að ef Ísland drægi ESB aðildarumsókn sína til baka á þessu stigi, yrði það verst fyrir ESB sjálft.  Slæm auglýsing - og gæti skapað fordæmi.

Umheiminum gæti ekki verið meira sama.

[Ásthildur Cesil Þórðardóttir, 16.11.2012 kl. 15:21]

Þegar það liggur fyrir að byrjunin á ferlinu var röng, þ.e. ekkert ríki sækir um aðild nema ætla sér inn.  Þá segir það sig  sjálft að eftirleikurinn verður líka bull.  Það var nefnilega byrjað á fölskum forsendum að " kíkja í pakka", það var ekki það sem var meiningin með umsókn um aðild samkvæmt ESB.  Einhverjum gengur illa að skilja þetta.

[Ásmundur (IP-tala skráð) 16.11.2012 kl. 16:03]

Kolbrún, að hætta við núna er eins og að hætta við sólarlandaferð með margra mánaða fyrirvara vegna þess að það kom vont veður einn daginn.

Það er afskaplega heimskulegt og því vont til afspurnar. Segir það ekki sitt að ekki ein einasta önnur þjóð hefur hagað sér þannig þó að eflaust hafi oft aðeins minnihluti þjóðarinnar verið fylgjandi umsókninni eða aðild?

Finnst þér ekki sanngjarnt að ef við slitum viðræðunum þá myndum við greiða allan kostnað við umsóknina og endurgreiða alla styrki tengda henni?

[Kolbrún Hilmars, 16.11.2012 kl. 16:43]

Ásmundur minn, ef einhver þarf að greiða skaðabætur fyrir að draga einhvern á asnaeyrunum dettur mér fyrst Össur utanríkis í hug.  Hann sótti ekki aðeins um einu sinni heldur tvisvar!

Bretarnir myndu kætast ef þessir umdeildu styrkir fengjust endurgreiddir, en ég svona prívat og persónulega er ekki til í að leggja í það púkk.

En þú?

[Ásmundur (IP-tala skráð) 16.11.2012 kl. 17:23]

Kolbrún, varst þú ekki ein af þeim sem mótmæltu harðlega þessum styrkjum og kölluðu þá jafnvel mútur? Ég hélt þess vegna að þú yrðir himinlifandi að fá að greiða þá tilbaka.

Annars er þetta ekki spurning um hvað við viljum heldur hvað okkur ber. Við erum nefnilega ekki ein í heiminum þó að sumir láti sem svo sé.

Umsóknarferlið gengur út á að leiða viðræður til lykta og halda þjóðaratkvæðagreiðslu um samninginn sem þá liggur fyrir.

Aldrei hefur komið til tals að okkur sé frjálst að hætta þessu ferli í miðjum klíðum enda engin fordæmi fyrir slíku. Ef við gerum það samt er eðlilegt að allur kostnaðurinn, þar með taldir styrkir og laun ESB-manna, falli á okkur enda fer þá öll vinna þeirra til spillis af okkar völdum.

Sumir tala um að fresta viðræðunum. Ég veit ekki til þess að það sé í boði. Það er frekar hægt að hægja á þeim og jafnvel draga það að halda þjóðaratkvæðagreiðslu þegar samningurinn liggur fyrir ef heimskreppan er enn að herja á ESB.

Að slíta viðræðunum er auðvitað algjört rugl. Þegar samningurinn liggur fyrir gæti allt verið fallið í ljúfa löð í Evrópu á sama tíma og þjóðin getur ekki lengur horft framhjá því að krónan er ónýt.

Það einkennir ykkur ESB-andstæðinga að horfa algjörlega framhjá vanda krónunnar og hættunni sem fylgir gjaldeyrishöftunum. Þær hættur eru margfalt meiri og alvarlegri en ESB og evra geta nokkurn tímann leitt yfir okkur.

[Kolbrún Hilmars, 16.11.2012 kl. 18:23]

Kæri Ásmundur, þú ert ekki alveg að ná þessu.  Ég sagði "prívat og persónulega" vegna þess að hvorki prívat né persónulega hafa þessir styrkir runnið til mín.  Af hverju ætti ég að vera himinlifandi yfir því að fá að endurgreiða þá?

Þú talar um "hvað okkur ber".  Hvað áttu eiginlega við?

Ber okkur nokkuð að gera annað  en það sem er okkar eigin litla þjóðfélagi fyrir bestu?  Mér er alla vega ekki kunnugt um að við séum lengur nýlenduveldi sem þarf að sæta fyrirmælum að utan.  

Sannir kratar mótmæltu sjálfstæði Íslands á sínum tíma og vildu frekar þjóna danska konungsveldinu um ókomna tíð. 

Hvað er þetta með ykkur ESB sinna - líður ykkur illa ef erlent vald stýrir ykkur ekki í öllum málum?

[Árni Gunnarsson, 16.11.2012 kl. 22:09]

Maður nokkur kaupir farseðil til Borgarness, sest inn í rútuna og sofnar. Vaknar þegar rútan hefur ekið í hálftíma og sér að Hveragerði blasir við. Hann bregst ókvæða við og segist hafa keypt farseðil til Borgarness. Í bílnum situr maður sem nefnir sig Ásmund og hann verður fyrir svörum. Segir farþeganum að í bílnum hafi hópur frekjuhunda krafist þess að bílnum yrði ekið austur í Vík. Farþeginn mótmælir og krefst þess að bílnum sé tafarlaust snúið við og ekið þangað sem farseðillinn kveði á um. Ásmundur biður hann að hafa sig hægan, svona frekju sé ekki hægt að líða, hann verði að sætta sig við að fara austur í Vík því það sé bara lýðræðisleg ákvörðun. Farþeginn segist hafa verið svikinn en Ásmundur segir hann ljúga því og að svona séu bara reglur lýðræðisins.

[Ásmundur (IP-tala skráð) 17.11.2012 kl. 08:36]

Kolbrún, þú talar eins og sannur einangrunarsinni.

Í samskiptum við aðrar þjóðir verðum við að vera heiðarleg og sanngjörn jafnvel þó að við göngum ekki í ESB, nema að við stefnum að algjörri einangrun.

Mér sýnist reyndar að ef við höfnum ESB-aðild að þá munum við óðfluga nálgast slíka einangrun enda samræmast ekki gjaldeyrishöft EES-samningnum til frambúðar.

Gjaldeyrishöft hafa alltaf tilhneigingu til að versna eftir því sem fleiri sjá við glufunum í þeim. Þú manst þegar ferðamannagjaldeyririnn var svo naumt skammtaður, að hann nægði ekki fyrir uppihaldi í tvær vikur, svo að enginn fór í frí til útlanda nema kaupa gjaldeyri á svörtu?

Undanfarin ár hefur það verið mjög gróðavænleg atvinnugrein að stofna fyrirtæki i útlöndum til að lána þeim gjaldeyri frá Íslandi. Þannig hafa hundruð milljarða í gjaldeyri, ef ekki meira, sloppið úr landi framhjá höftum.

Almenningur tapar í formi lægra gengis krónunnar sem leiðir til hærra verðs á innfluttum vörum og hækkun á vísitölu, og þar með lánum. Erlendar skuldir ríkisins hækka á kostnað skattgreiðenda.

Að ógleymdri hættunni á gjaldeyrisskorti með þeim skelfilegu afleiðingum að við getum ekki staðið í skilum með erlend lán.

Þetta er veruleikinn sem ESB-andstæðingar sækjast eftir að halda í í fullkominni afneitun á afleiðingunum.

Áttarðu þig ekki á því að við erum hluti af stórum heimi og að góð samskipti við aðrar þjóðir eru okkar eigin þjóðfélagi fyrir bestu?

Tilhneiging til einangrunar stafar af minnimáttarkennd og vænisýki sem einkennir marga ESB-andstæðinga sbr tal þeirra um fullveldisafsal, innlimun og ESB-skrímslið. Þeir gera sér enga grein fyrir hve hlægilegt svona tal er. 

Vinstrivaktin er sérstaklega illa haldin og Elle er líklega gott dæmi um vonlaust tilfelli. Þetta er í raun óbærilegt hugarástand. Til að halda það út er það upphafið í þjóðrembu über alles. Þess vegna komast áhyggjur af krónunni ekki að.

Finnst þér að Bjarti í Sumarhúsum hafi farnast vel í sinni einangrun?

PS: Víst þurfum við að fylgja fyrirmælum erlendis frá vegna EES-samningsins. Með ESB-aðild verður það liðin tíð því að þá tökum við þátt í öllum ákvörðunum.   

[Kolbrún Hilmars, 17.11.2012 kl. 11:59]

Ásmundur, ef einangrunarsinni, að þínu mati, er það sama og sjálfstæðissinni, þá er ég sek.

Hér fyrir ofan skrifborðið mitt hangir heimskort NGS, The World, í stærðinni 75 x 110 cm.  Í hvert sinn sem ég lít upp sé ég þennan litla part af umheiminum sem heitir ESB.  Sem tekur töluvert minna pláss á kortinu en Grænland.

Ég vísa því hugtakinu einangrunarsinni til föðurhúsanna.

[Ásthildur Cesil Þórðardóttir, 17.11.2012 kl. 13:05]

Einangrunarsinnin talaði hér næst á undan þér Kolbrún mín. 

[Ásmundur (IP-tala skráð) 18.11.2012 kl. 00:59]

Kolbrún, að mínu mati er töluverður blæbrigðamunur á einangrunarsinni og sjálfstæðissinni. Munurinn felst aðallega í því að einangrunarsinni er neikvætt orð, sem hefur ekkert með sjálfstæði að gera, en sjálfstæðissinni er jákvætt orð.

Þeir sem voru á sínum tíma hlynntir að Ísland yrði sjálfstætt ríki voru sjálfstæðissinnar. En þeir sem eru á móti því að Ísland taki þátt í samstarfi við aðrar þjóðir á jafnréttisgrundvelli þeim öllum til hagsbóta eru einangrunarsinnar.

Slíkt samstarf leiðir ekki til missis sjálfstæðis enda eru allar ESB þjóðirnar sjálfstæðar eins og hér má sjá í tilfelli Dana:

Wikipedia:

"Danish foreign policy is based on its identity as a sovereign nation in Europe. As such its primary foreign policy focus is on its relations with other nations as a sovereign independent nation. Denmark has long had good relations with other nations. It has been involved in coordinating Western assistance to the Baltic states."

http://en.wikipedia.org/wiki/Denmark#Foreign_relations_and_military

[Kolbrún Hilmars, 18.11.2012 kl. 12:00]

Ásmundur, Ísland var og er enn aðili að EFTA samstarfinu - er það ekki gott dæmi um erlent samstarf?  Svo ég noti þín orð   "slíkt samstarf leiðir ekki til missis sjálfstæðis".

Þegar bretarnir ganga úr ESB, eins og meirihluti þeirra vill, þá eflist EFTA aftur í fyrra horf.   Eigum við ekki bara að gleyma þessu ESB veseni og láta EFTA duga?