Flokkurinn og flóttinn frá grasrótinni

Vinstri hreyfingin grænt framboð boðar til fulltrúaráðsfundar sem verður haldinn norður á Hólum í Hjaltadal nú 24.-25. ágúst. Flokksráðið er æðsta stofnun hreyfingarinnar milli Landsfunda og því er þetta veigamikill fundur nú aðdraganda kosninga.

Það er vitaskuld lofsvert að fundurinn skuli haldinn á hefðarsetri Norðlendinga og tíminn til fundahalda er líka vel valinn nú rétt áður en í hönd fer kosningavetur. En hitt vekur nokkra furðu að dagskrá fundarins gerir ekki ráð fyrir almennum umræðum.

Dagskrá
Föstudagur 24. ágúst
17:00-17:20         Katrín Jakobsdóttir setur fund, kynnir dagskrána framundan og drög að reglum um forval og uppstillingu
17:20-17:40         Bjarkey Olsen Gunnarsdóttir kynnir umræður og niðurstöður af sveitarstjórnarráðstefnu
17:40-19:00         Pallborð um störf Alþingis og helstu þingmálin
19:00-20:00         Matarhlé
20:00-22:30        Hópastarf:
         1.       Samræmdar forvalsreglur
         2.       Kosningabarátta
         3.       Innri mál
         4.       Sveitarstjórnarmál
22:30                     Fundi frestað til morguns

Laugardagur 25. ágúst 
9:00-11:00           Málefnahópar
     1.       Landbúnaðarstefna
     2.       Utanríkismál og stefna um málefni Íslands og norðurslóða
     3.       Lýðræðisstefna
     4.       Kvenfrelsisstefna og viðbragðsáætlun vegna kynbundins ofbeldis
11:00-12:00        Kynning á niðurstöðum málefnahópa
12:00-12:30        Matarhlé
12:30-14:00        Kynning á niðurstöðum hópastarfs og afgreiðsla 

Eins og sjá má er hér gert ráð fyrir að færa alla umræðu almennra flokksmanna inn í hópastarf. Þaðan komi svo mótaðar tillögur. Þar með tekst að bæla óánægju innan flokksins og koma í veg fyrir að forystan fái á sig gagnrýni. Pallborðsumræður snúa að tilteknu verkefni og afgreiðsla á niðurstöðum hópastarfs sömuleiðis.

Fram til þessa hafa almennar umræður flokksráðfunda verið hinn lýðræðislegi og opni vettvangur grasrótarinnar til að tala til forystunnar. Á síðasta flokksráðsfundi var stigið skref í þessa átt þar sem sitjandi ráðherrar voru framsögumenn með langan ræðutíma í almennum umræðum en almennir flokksmenn fengu örstutt viðtalsbil til andsvara. Þá var foringjaræðið gagnrýnt en engu að síður er gengið enn lengra núna. Jafnvel það að sitja undir örstuttum ræðum almennra flokksmanna er forystu VG of erfitt.

Hversu langt ætlar forystusveit VG að hlaupa með formanni sínum?

Athugasemdir

[Anna Sigríður Guðmundsdóttir, 31.7.2012 kl. 15:20]

Þykist ekki hinn "kjósenda-tryggi" Ögmundur ESB-son vera búinn að slíta sig frá Nubo vini sínum? Þetta var ágætis leikþáttur hjá fjölmiðla-stjórnsýslunni þennan daginn, eins og alla aðra daga.

Nú verða landsmenn að lesa í atburðarrásina, og láta ekki Grænu spillinguna blekkja sig með svona vel æfðu og upp settu fjölmiðlaleikriti. Og ekki síður þurfa landsmenn að gæta sín á öllum hinum "flokka"-leikritunum, sem borin eru á fjölmiðla-borðin fyrir heiðarlegan, saklausan og rændan almenning.

Er almenningur ekki orðinn saddur af "kræsingunum" á lygaborðinu? Eða vill gagnrýni-skertur/heftur fjöldinn láta mata sig endalaust á sama gamla spillingargrautnum?  

M.b.kv.

[Ásmundur (IP-tala skráð) 1.8.2012 kl. 09:31]

Nubo-málið er dæmigert fyrir bágborið andlegt ástand Íslendinga. Stefna ríkisstjórnarinnar er að hvetja til erlendrar fjárfestingar. Loksins þegar einhver er tilbúinn til slíks svo að um munar á heppilegu sviði hafa menn allt á hornum sér.

Óttinn, vanmáttarkenndin, útlendingahræðslan og þjóðrembingurinn í bland við lágkúrulega íslenska flokkapólitík mynda alveg skelfilegan kokteil sem getur haft hrikalegar afleiðingar fyrir framtíð þjóðarinnar ef menn sjá ekki að sér. Þjóð í þessu ástandi er tæpast fær um að fara með sín eigin mál.

Óttinn er mikill en alveg er óljóst hvað menn óttast. Reyndar óttast menn að Nubo sé tengdur yfirvöldum í Kína vegna þess að hann var þar opinber starfsmaður fyrir áratugum. En hvaða skelfilegu afleiðingar það gæti haft, ef rétt væri, hafa menn aðeins mjög óljósa og óraunhæfa hugmynd um.

Það er eins og algjör fáfræði ráði ferðinni allt upp í raðir ráðherra. Menn einfaldlega loka augunum fyrir því að hver sem eigandinn er eru allar framkvæmdir háðar skipulags- og byggingarlögum og öll starfsemi er háð leyfisveitingum. Hvað er þá að óttast?

Ein ömurleg hlið þessa máls er hvernig lágkúran í íslenskum stjórnmálinum ræður ferðinni. Sjálfstæðisflokkurinn, sem annars er hlynntur erlendum fjárfestingum, er á móti því að Nubo hasli sér völl hér að því er virðist vegna þess að hann er gamall vinur Hjörleifs eiginmanns Ingibjargar Sólrúnar. Þetta þykja óþolandi tengsl við Samfylkinguna. Hjörleifur er þó ekki einu sinni í Samfylkingunni.

Auðvitað þarf að skoða allar hliðar málsins. En viðbrögðin við málaleitan Nubo hingað til eru með algjörum ólíkindum. Erlend fjárfesting er nauðsynleg Íslendingum til að lágmarka erlenda lántöku. Slík tækifæri ber því að taka jákvæðum og opnum huga. 

Það er fagnaðarefni þegar útlendingur vill fjárfesta í atvinnugrein sem er gjaldeyrisskapandi og með litla orkuþörf. Ferðaþjónustan er auk þess mikill vaxtarbroddur. Það er kominn tími til að erlendum gjaldeyri sé veitt í eitthvað annað en virkjanir og stóriðjuver.

Hér eru sömu öfl að verki og í andstöðunni gegn ESB-aðild Íslands. Enginn virðist hugsa um að slíkur hugsunarháttur leiðir óhjákvæmilega til að Ísland dregst aftur úr öðrum þjóðum og einangrast smám saman meira og meira. Né heldur að hætta á gjaldþroti er veruleg. 

[palli (IP-tala skráð) 1.8.2012 kl. 10:11]

Jón Ásmundur talar um bágborið andlegt ástand annara.

Fyndið.

Einn verst heilaþvegni heimskingi sem sögur fara af.

[Anna Sigríður Guðmundsdóttir, 1.8.2012 kl. 10:59]

Það þarf opna umræðu um þessi mál, eins og öll önnur. Ég velti fyrir mér hvers vegna stjórnvöld vilja ESB en ekki Kína?

Ég fæ það ekki til að passa, að sum stórveldi hafi meiri rétt en aðrir til að framkvæma hér á landi.

Maður sér hvernig verið er að fara með saklausa borgara í Sýrlandi og Líbýu. Þetta er hryllilegt hernám og dráp í þessum löndum, sem ESB-topparnir styðja ásamt USA. Er Kína eitthvað verri?

M.b.kv.

[Ásmundur (IP-tala skráð) 1.8.2012 kl. 15:02]

Anna Sigríður, ESB er ekki ríki, ekki frekar en Norðurlandaráð.

Þetta er samband sem er myndað um samstarf ríkja á vissum sviðum. Það vill svo til að það er eimitt á þeim sviðum sem við þurfum mest á samstarfi að halda vegna smæðar okkar.

Ég myndi fara mjög varlega í alla samninga við Kína enda eru mannréttindi þar fótum troðin. Við getum ekki búist við sömu meðferð hjá þeim og ESB ef við lendum í vanskilum með lán. Nubo er ekki Kína. Auk þess er fjárhagsleg áhætta engin af viðskiptunum við hann enda greiðir hann alla leiguna í einu lagi fyrirfram. 

Mörg ESB-löndin eru mestu lýðræðisríki heims. Þar eru mannréttindi mest í hávegum höfð. Engum ríkjum er betur treystandi en einmitt þeim enda myndi slíkt samstarf ekki ganga upp ef svo væri ekki. 

ESB styður ekki voðaverkin í Sýrlandi og Líbýu.