Delors: Sameiginleg mynt án sameiginlegs ríkis gengur ekki upp

Þetta sagði einn helsti forsprakki evrusvæðisins nýlega og bætti við að sjálft evru-kerfið væri stórlega gallað og tilraunir til að bjarga því kæmu of seint og væru máttlausar. Samt vinna Jóhanna, Össur og Gylfi í ASÍ alla daga að því að koma okkur í þetta gallaða kerfi með ESB-aðild!

Gylfi í ASÍ hefur boðað tvo vakningarfundi í þessum mánuði til að vegsama evruna og níða niður krónuna. Á sama tíma játar Jacques Delors, fyrrum forseti framkvæmdastjórnar ESB að mistök í árdaga myntbandalagsins hafi leitt til þeirrar kreppu, sem evrusvæðið sé nú í. Núverandi leiðtogar hafi gert of lítið og of seint. Evrukreppan ógni nú hlutverki Evrópu á heimsvísu og jafnvel grunngildum vestræns lýðræðis og ágallar myntbandalagsins séu að steypa kerfinu í glötun. (Daily Telegraph 3. des s.l.).

Delors bætir því við að leiðtogar Evrópuríkjanna hafi kosið í lok síðustu aldar að líta framhjá efnahagslegum veikleikum nokkurra aðildarríkja bandalagsins og sú ákvörðun sé að koma í bakið á mönnum í dag. Hann gagnrýnir jafnframt Þjóðverja fyrir að koma í veg fyrir að Seðlabanki Evrópu komi til skjalanna og viðurkennir að breskir stjórnmálamenn hafi haft nokkuð til síns máls, þegar þeir héldu því fram að sameiginleg mynt án sameiginlegs ríkis gæti ekki gengið upp.

Þeir sem nú reyna að lokka okkur Íslendinga til að taka upp evru eru um leið að lokka okkur inn í nýtt væntanlegt stórríki þar sem Íslendingar verða valdalitlir um eigin mál, rétt eins og héruð eða sveitarfélög eru hvarvetna í stórum ríkjum.

Joseph Stiglitz nóbelsverðlaunahafi í hagfræði er annað dæmi um heimskunnan hagfræðing sem gagnrýnir evrukerfið og pólitíska leiðtoga þess. Hann segir m.a um vandamál evrunnar í grein sem nú má lesa á heimasíðu Landsbankans:

„Vandamálið er ekki einungis það að ekki er hægt að beita tveimur helstu stýritækjum til að ná jafnvægi í hagkerfinu á ný (stýrivextir og gengisbreytingar) heldur kemur ekkert annað í staðinn. Vandamálið felst einnig í því að helsta verkefni Seðlabanka Evrópu er að hafa stjórn á verðbólgu þegar hin raunverulegu vandamál eru atvinnuleysi, vextir og fjármálastöðugleiki. Skortur á sameiginlegri stýringu efnahagsmála leiddi til kapphlaups á innri markaðnum til lækkunar skatta í þeim tilgangi að laða að fjárfesta og efla framleiðslu til frjálsrar sölu innan ESB."

Hér er Stiglitz að benda á nákvæmlega það sama og andstæðingar ESB-aðildar hafa lengi bent á; ríki eins og það íslenska verður hjálparlaust rekald í stórsjóum frjálsra fjármagnsflutninga um leið og það varpar frá sér yfirstjórn efnahagsmála, þ.á.m. réttinum til að ákveða stýrivexti og gengi í samræmi við aðstæður hér heima fyrir. Ef tekin er upp evra hefur landið ekkert stjórntæki til að ná aftur jafnvægi þegar efnahagsáföll dynja yfir. Það er einmitt meginástæðan fyrir því að efnahagur Ísland er þrátt fyrir allt á uppleið þessa stundina meðan hvert evruríkið af öðru stefnir í ríkisgjaldþrot, að við höfum sjálfstæðan gjaldmiðil.

Til eru þeir sem telja að ástæðulaust sé að hafa áhyggjur af evrunni því að stórríkið sé hvort eð er rétt handan við hornið og allt verði komið í gott lag hjá ESB/evru-ríkinu þegar við göngum þar inn fyrir dyr. En Merkel kanslari hefur einmitt margsagt undanfarnar vikur að óhjákvæmilega muni mörg ár líða þar til fjármálastöðugleika verði náð á evrusvæðinu með sameiginlegri stýringu efnahagsmála. Upptaka evru felur því í sér mikla áhættu sem Íslendingar verða að horfast í augu við. - RA

Ákvörðun Camerons ógnar ekki ríkisstjórninni