Það verður enginn samningur við ESB í boði meðan þjóð og þing eru andvíg inngöngu

Baráttan gegn afturköllun ESB-umsóknar er sjálfsblekking. Augljóst er að ESB gerir ekki aðildar­samning við ríki, þar sem bæði ríkisstjórn og meiri hluti þings og þjóðar eru andvíg því að ganga inn. Hamagangur ESB-sinna á þingi er því hreinn skrípaleikur.

 

Hávaðinn og stóryrði þingmanna Samfylkingar og Bjartar framtíðar í umræðum um afturköllun aðildarumsóknar með sífelldum svikabrigslum og upphrópunum þar sem varaformaður Samfylkingarinnar kallaði formann Sjálfstæðismanna „helvítis dóna“ eru fyrst og fremst til vitnis um mikla örvæntingu ESB-liðsins á þingi.

 

Samfylkingarmenn þóttust hneykslaðir á því þegar bent var á þá augljósu staðreynd að þegar aðildarumsóknin var samþykkt 16. júlí 2009 með 33 atkvæðum gegn 28, kom skýrt fram í atkvæðaskýringum að þeir 8 þingmenn VG, sem greiddu atkvæði með því að aðildarumsókn yrði send, lýstu sig jafnframt andvíga inngöngu í ESB. Til dæmis sagði Steingrímur J. Sigfússon í skýringu á atkvæði sínu að „það þjóni ekki hagsmunum Íslands að gerast aðili að ESB“ og Árni Þór Sigurðsson lagði áherslu á að „hagsmunum Íslands sé best borgið utan ESB“.

 

Það er því ómótmælanleg staðreynd að í raun var ekki meirihluti fyrir því á Alþingi í júlí 2009 að Ísland gengi í ESB, enda þótt meiri hluti væri fyrir því að sækja um aðild.

 

ESB-liðið á Alþingi hamaðist þó tímunum saman á utanríkisráðherra nú í vikunni gegn því að þessi staðreynd sem blasir við í þingtíðindum frá árinu 2009 sæist aftur á prenti í þingskjali, þar sem ráðherrann gerði grein fyrir tillögu ríkisstjórnarinnar um afturköllun umsóknarinnar, og að lokum kaus ráðherrann að láta prenta þingskjalið upp á nýtt og sleppa því að nefna þessa nöturlegu staðreynd í von um að ESB-liðið gæfi þá þinginu frið til að halda þingstörfum áfram og ráðherrann fengi tóm til að mæla fyrir tillögunni.

 

Að sjálfsögðu er þetta skrípaleikur. En ráðherrann gerði þó rétt í því að fella niður þessa setningu úr greinargerðinni í þeim tilgangi að greiða fyrir þingstörfum.

 

Eins er það með kröfuna um „áframhald viðræðna“. Það er að sjálfsögðu öllum ljóst að þótt ákveðið verði að halda viðræðum áfram mun engu að síður ekkert gerast. Framkvæmdastjórn ESB eyðir ekki tíma sínum í viðræður sem fyrirfram er vitað að engum árangri geta skilað, vegna þess að þeim er ljóst að íslenska þjóðin, þing og ríkisstjórn munu örugglega ekki samþykkja inngöngu í ESB á þessu kjörtímabili og sennilega ekki á komandi árum.

 

Þess vegna er þetta upphlaup um „þjóðaratkvæði um áframhald viðræðna“ bein sjálfsblekking og sýndarmennska. - RA   

68% vilja halda viðræðum opnum

Athugasemdir

[Ásthildur Cesil Þórðardóttir, 28.2.2014 kl. 12:51]

Já ég er alveg gáttuð á þessum hamagangi, í ljósi sögunnar og þessir lýðræðiselskandi forystumenn stjórnarandstöðunnar, gerðu nákvæmlega sama hlutinn árið 2009. Og aftur og aftur og aftur.

[Guðbjörg Snót Jónsdóttir (IP-tala skráð) 28.2.2014 kl. 15:24]

Sammála. Það er hreint með ólíkindum, hvernig þetta lið lætur. Fyrir nú utan þjóðaratkvæðagreiðsluna, sem alltaf er verið  að kalla eftir. Til hvers? spyr ég. Versta er, að Ríkisútvarpið skuli sífellt vera að demba þessarri vitleysu yfir mann í hverjum einasta fréttatíma, og er jafnvel með hreinan ESB-áróður, og talar ekki við aðra en ESB-sinnaða fræðimenn. Maður getur varla orðið hlustað á fréttatíma útvarps og sjónvarps þess vegna, og þegar ESB-sinnar á Alþingi fara að væla og emja, þá loka ég nú yfirleitt fyrir hljóðið, nenni ekki að hlusta á röflið í þeim, eins þreytandi og það er. Það er samt aldrei nema satt, að þeim líður greinilega alveg óskaplega illa, og líða miklar sálarkvalir, þegar þeir sjá, að þeir eru að tapa leiknum. Það er alveg greinilegt.

[Ásthildur Cesil Þórðardóttir, 28.2.2014 kl. 18:33]

Enda er ég hætt að hlusta og horfa á Rúv fréttir, er farið að ofbjóða hvernig hlutleysinu er stungið undir stól á þeim bænum.

[Elle_, 1.3.2014 kl. 12:00]

Alveg lýsandi pistill, takk fyrir hann.  Nú mun heiftin og ólætin í alþingi koma fram í skjölum um aldur og ævi, þessu ESB-liði og aðallega samfylkingum, til ævarandi skammar.  Skiptir kannski ekki miklu máli fyrir þau, flokkurinn er hverfandi og svoleiðis lúbarinn af kjósendum.  Vonandi kemur fram í öðrum skjölum, um aldur og ævi líka, það sem Gunnar Bragi skrifaði fyrst.

[Elle_, 1.3.2014 kl. 12:20]

Það sem ég skrifaði þarna hvarf, kemur væntanlega aftur inn núna með þessu commenti, galli í kerfi mbl og gerist nokkuð oft.