Áframhaldandi pólitískur geðklofi og svik í ESB málum orðinn að stefnu VG !

Eftir mikinn kosningasigur VG árið 2009 gekk flokkurinn til stjórnarsamstarfs við Samfylkinguna þar sem einn helsti hornsteinn ríkisstjórnarsamstarfsins var að sækja um aðild að Evrópusambandinu. 

Þrátt fyrir það að stefna VG hefði verið alveg skýr í því að ESB aðild kæmi ekki til greina og formaður flokksins hafði lofað því að ekki yrði sótt um ESB aðild á þeirra vakt.  Með þessu sveik flokksforustan eitt af grunnstefnumálum VG allt frá upphafi. 

Þessi niðurstaða var því mörgum þingmanninum og öðru stuðningsfólki gríðarlegt áfall og vonbrigði. Sumir vildu reyndar í fyrstu afsaka þetta með því að aðstæður væru mjög erfiðar og að ekki hefði verið hægt annað en að gefa aðeins eftir í þessu stórmáli því að öðruvísi hefði alls ekki tekist að nota þetta einstæða tækifæri til að mynda þessa vinstri stjórn.

Með því að VG kæmi að ESB málum með þessum hætti hefði flokkurinn beina aðkomu að þeim samningaumleitunum og gæti haft veruleg áhrif á vinnubröðin og allan frekari framgang málsins, til dæmis það að stærstu hagsmunamálin yrðu skoðuð fyrst eins og lofað var og að ófrávíkjanlegar kröfur yrðu settar fram í ýmsum þjóðarhagsmunamálum. Þetta ætti hvort eð er að klárast á einu til tveimur árum eins og forystumenn samstarfsflokksins höfðu marglofað og þá hefðu erfiðustu málin þegar verið skoðuð fyrst og þá kæmi sjálfssagt fljótlega í ljós að enginn grundvöllur yrði fyrir því að halda þessu áfram og þar með yrðu málin vafalítið úr sögunni, einmitt fyrir tilstilli og tilveru VG, því að flokkurinn fengi eins konar neitunarvald. Flokkurinn fengi líka frjálsar hendur með að berjast áfram gegn ESB aðild og einstakir þingmenn að sýna andstöðu sína.

Fljótlega varð ljóst að VG réði nánast engu um framgang viðræðnanna, þar sem Samfylkingin hélt málinu alveg fyrir sig og sífellt varð augljósara að ESB réð algerlega ferðinni í þessum viðræðum og hér væri ekki um neinar eiginlegar samnigaviðræður að ræða, heldur aðlögunarviðræður eftir harðri forskrift ESB. Andstaða einstakra þingmanna VG var líka barin niður og til þess að strá salti í sárin þá var það látið líðast átölulaust að ESB fengi að opna hér sérstakt sendiráð og hreinræktaða áróðursmálaskrifstofu með ómældum fjárveitingum beint frá Brussel, til þess að reka hér skefjalausan áróður fyrir ESB aðild. 

Óánægjan og tortryggnin óx stöðugt meðal margra þingmanna og trúnaðarmanna flokksins og einnig var vaxandi óánægja meðal grasrótarinnar. 

Engu að síður tókst flossforystunni alltaf að humma þetta endalaust fram af sér með eilífðar frestunum og svo loforðum um endurskoðun og að kæmu tímar og kæmu ráð og ekki yrði tekið við mútufé frá Brussel í þeim ráðuneytum sem flokkurinn stjórnaði og svo framvegis. 

Þetta var reyndar allt jafn óðum svikið eins og annað og enn var teigt á lopanum en enginn sá samt neina minnstu viðspyrnu af hálfu flokksforystunnar. 

Ókyrrð í þingflokknum magnaðist því og stór hluti þingflokks sagði skilið við VG. Aðrir voru hreinlega settir af, einnig sagði fjöldi trúnaðarfólks um land skilið við flokkinn og fylgi flokksins í skoðanakönnunum fór hríðlækkandi.  

Nú í lok kjörtímabilsins er hún Snorrabúð stekkur og margt af besta fólkinu úr þingflokknum farið burt og fylgið er farið veg allrar veraldar og mælist nú aðeins brot af kosningafylgi flokksins. 

Við þessar hroðalegu aðstæður boðaði flokksforystan svo til síðasta Landsfundar þessa kjörtímabils og þá var öllum afgöngum af þessum flokki tjaldað til því að raðirnar voru orðnar býsna þunnar og þúsundir ESB andstæðinga höfðu verið flæmdir brott og gátu auðvitað ekki látið sjá sig á fundinum. Því var nú möguleiki fyrir flokksforystuna að ráðskast með liðið og láta kné fylgja kviði til réttlætingar fyrir langvarandi svikum sínum.

Einhverjir höfðu samt allt fram að þessu leyft sér að lifa enn í voninni um að flokksforystan myndi nú loks á loka metrunum í þessu ríkisstjórnarsamsstarfi sjá að sér og viðurkenna mistök sín í ESB málinu og biðja flokksfólk afsökunar á að hafa svikið stefnuna og að nú yrði reynt að bæta fyrir fyrri mistökin og sameina flokkinn með því að koma til móts við þá hraksmáðu stuðningsmenn sem kannski enn væri von á að halda í.

En hér eftir sem hingað til þá brást það auðvitað því að Landsfundurinn hraksmánaði ESB andstöðuna algerlega, einu sinni sem oftar. Enga auðmýkt eða eftirsjá var heldur að sjá á foringjanum því að hann sagði fullum fetum "að hann sæi ekki eftir einu eða neinu" og flokksforystan reyndi ekkert til raunverulegra sátta því að þess í stað tókst henni með naumindum að láta samþykkja það að í boði VG þá yrði  ESB aðildarbröltinu haldið áfram á næsta kjörtímabili. 

Kosningasvikin voru því greipt í stein og samþykkt sem opinber stefna flokksins og flokksforystan fékk um leið aflátsbréf um að þau hefðu aldrei gert neitt rangt, þau hefðu gert allt rétt, allan tíman. 

Að samþykkja svo jafnframt þá innihaldslausu sýndarmennsku að flokkurinn sé enn andsnúinn ESB aðild, er annað hvort brandari eða lýsir aðeins pólitískri geðklofasýki flokksforystunnar! Það var löngu ljóst að ESB andstæðingar gætu ekki treyst VG í ESB málum, en nú er það fullreynt! /GI

Athugasemdir

[Rafn Guðmundsson, 26.2.2013 kl. 17:27]

svona svona - þetta eru bara GAMLAR þínar skoðanir - horfa frá á veginn

[Ásthildur Cesil Þórðardóttir, 26.2.2013 kl. 18:39]

Hvert orð hér satt og rétt hjá Vinstri vaktinni, eins og  málin hafa gengið fyrir sig.

[Elle_, 26.2.2013 kl. 21:28]

Pistillinn lýsir málinu eins og það var, Rafn.  Og það ýtarlega.  

[Ómar Bjarki Kristjánsson, 26.2.2013 kl. 21:31]

það er bara komið í ljós að stuðningur við málflutning svokallaðrar ,,vinstri" vaktar gegn ESB er enginn í VG.

Stðningurinn er allur í flokki sem samþykkti á dögunum að ,,öll löggjöf yrði ávalt byggð á boðorðunum tíu".

[Elle_, 26.2.2013 kl. 21:58]

Enda allir flúnir úr flokknum nema nokkrar ESB-hræður og 1 eða 2 frumstofnendur sem hafa ekki viljað gefa upp von.  En er pólitískur geðklofi í boðorðunum 10?

[Ásmundur (IP-tala skráð) 27.2.2013 kl. 10:19]

Þrátt fyrir að ábyrgðarmaður Vinstrivaktarinnar sé flokksbundinn í Vg sór Vinstrivaktin nýlega af sér öll tengsl við flokkinn. Var það undirbúningur undir tengsl við Sjálfstæðisflokkinn?

Andstaða við ESB er hægri stefna að því leyti að þannig eru hagsmunir auðmanna teknir fram yfir hagsmuni almennings. Krónan er gott tæki fyrir auðmenn til að arðræna almenning. Vinstrivaktin kallar það nauðsynlegan sveigjanleika.

Margir vinstri grænir eru auðmenn þar á meðal menn þar í fremstu röð eins og Hjörleifur Guttormsson, Álfheiður Ingadóttir og Atli Gíslason. Það gæti skýrt hagsmunagæsluna.

Fullveldisrökin eru fyrirsláttur enda ljóst að EES-samningurinn leiðir til meira fullveldisafsals en ESB-aðild. Með ESB-aðild tökum við ekki lengur við tilskipunum annarra heldur tökum fullan þátt í öllum ákvörðunum á jafnréttisgrundvelli við aðrar þjóðir ESB.

Hrein þjóðremba er heimska enda er þá öllum skynsemisrökum úthýst. Heilbrigð ræktarsemi við menningararf hverrar þjóðar þrífst mjög vel innan ESB sem styður slíka viðleitni.

[Helgi Rúnar Jónsson (IP-tala skráð) 27.2.2013 kl. 11:09]

Góður Ásmundur.....tek undir hvert orð sem þú segir hér.....vinstrivaktin er hagsmunagæslu blogg fyrir þá ríku.

[Ásthildur Cesil Þórðardóttir, 27.2.2013 kl. 11:29]

Já langt er nú seilst til að tortryggja vinstri vaktina.  En sárindin eru auðvitað sorgleg staðreynd.  Þið verðið bara að bíta í það súra að ESB umsóknin er að öllum líkindum búið spil og ég verð að segja að það er þungu fargi af mér létt, og svo á við um meiri hluta þjóðarinnar sé litið til skoðanakannana. 

[Pétur (IP-tala skráð) 27.2.2013 kl. 13:06]

Já, mikið rétt, Ásthildur. Ásmundur er búinn að vera. Og þegar áróðursskrifstofa ESB verður lokað, verður hann strikaður út af launalistanum. Það er hugsanlegt að hann þurfi að greiða skrifstofunni allt aftur, úr því að hann náði engum árangri.

[Ásmundur (IP-tala skráð) 27.2.2013 kl. 15:23]

Stuðningur við slit á viðræðum er 28.5% (Sjálfstæðisflokkurinn) en stuðningur við að leiða þær til lykta og kjósa um þann samning sem þá liggur fyrir er 37.6% (Samfylking, Vg og Björt framtíð).

Út úr þessu fá ESB-andstæðingar, sem stjórnast af óskhyggju, að viðræðum verði slitið. Það er í samræmi við annað sem frá þeim kemur.

Sjálfstæðisflokkurinn er í frjálsu falli með stórskaddaðan formann.  Sigmundir Davíð nýtur nú Icesave þangað til þjóðinni verður ljóst að við værum betur sett ef við hefðum samþykkt samninginn.

Þessir tveir auðmenn draga taum auðmanna á kostnað almennings. Krónan er mikil gróðastía auðmanna sem hagnast á gengissveiflum og gengismun. Almenningur er ekki með réttu ráði ef hann kýs slíka menn yfir sig.

Framsókn og Sjálfstæðisflokkur munu tapa fylgi fram að kosningum. Bjarni og Sigmundur Davíð eiga ekki roð í Árna Pál, Katrínu og Guðmund Steingrímsson.

Það getur mikið breyst á tveim mánuðum.

[Elle_, 27.2.2013 kl. 15:59]

Ef e-r er með hagsmunagæslu fyrir þá ríku að ofan, verður það að vera Ásmundur sem berst fyrir stórkapítalísmann í Stór-Þýskalandi, á mútum.

[Elle_, 27.2.2013 kl. 16:09]

Ásmundur, hvar sór Vinstrivaktin af sér öll tengsl við VG?  Hættu að ljúga, nóg komið af lygunum.  Sagt var að Vinstrivaktin væri ekki málgagn VG, enda eru þeir það alls ekki.  Það er öllum ljóst sem lesa síðuna alltaf eða oft.  Væru þeir málgagn Álfheiðar Ingadóttur og hins hataða VG, væri ég alveg örugglega ekki að lesa, hvað þá verja þá.

[Ásthildur Cesil Þórðardóttir, 27.2.2013 kl. 16:12]

Nákvæmlega Elle_

[Ásmundur (IP-tala skráð) 27.2.2013 kl. 23:43]

Elle, endilega upplýstu okkur um tengsl Vinstrivaktarinnar við Vg. Þetta eru greinilega furðutengsl því að Vg er úthúðað hér nánast á hverjum degi. Samhljómur með málflutningi Sjálfstæðisflokksins er hins vegar öllum augljós.

Annars ert þú greinilega mikill kapítalisti enda máttu ekki heyra Bandaríkjunum hallmælt á sama tíma og þú rakkar niður ESB þar sem lýðræði er mest í heiminum, jöfnuður mikill og mannréttindi i hávegum höfð.

[Elle_, 28.2.2013 kl. 00:01]

Endilega skemmtu okkur, Ásmundur, en svarið mitt er þarna: Var samþykkt VG um aðildarumsóknina gerð á lögmætum fundi?

Ef ég ver Bandaríkin eða vísa í Bandaríkjamenn, er það mitt mál, en þú klínir þá á mig kapítalisma.  Þegar ég vísa í rússneskan andófsmann og flóttamann, og kalla Brussel-Sovétið þitt Sovét e-ð eða Stór-Þýskaland, þá segirðu mig vera líklega rússneska og hafa kvalist af ótta í Rússlandi.  Need I say more?? 

[Ásmundur (IP-tala skráð) 28.2.2013 kl. 08:37]

Að sjálfsögðu er það ekki trúverðugt að ásaka Þýskaland og ESB um kapítalisma og mæra um leið Bandaríkin þar sem kapítalismi og ójöfnuður er miklu meiri.

Og ekki tekur betra við þegar þeirri staðreynd er hafnað að mörg ríki ESB eru mestu lýðræðisríki heims. 

[Elle_, 28.2.2013 kl. 14:03]

Ekki satt, Ásmundur, neitt frekar en ýmislegt sem þú segir.  Það er ekki þannig að ekki megi gagnrýna Bandaríkin eða Bandaríkjastjórn, það hef ég oft gert sjálf og 'mæri' ekkert land að ég viti.  Þú ert með óþarfa öfgar og bara slepptu þessu.