Konur enn andvígari aðild að ESB en karlar

Nýleg könnun MMR sýnir gríðarlega andstöðu landsmanna við aðild að ESB. Andstaðan meðal kvenna var meiri en í hópi karlanna þótt yfirgnæfandi meirihluti beggja kynja væri andvígur aðildinni. Þetta eru tölurnar:

63,3% allra voru andvígir aðild Íslands að ESB - 24,2 % hlynntir

60,6 % karla voru andvígir aðild að ESB -  28,5 % hlynntir

66,4 % kvenna  voru andvígar aðild að ESB - 19,2 % hlynntar

Það hefur lengi verið áberandi í könnunum víðast hvar í Evrópu, bæði innan ESB og utan, að andstaða kvenna er mun meiri en karla og þekkt er að Norðmenn hafa löngum sagt að það hafi verið konurnar sem hafi bjargað þeim frá ESB-aðild.

Lengi vel mátti ekki greina þennan mun á Íslandi á jafn afgerandi hátt og nú.

Andstaða yngsta aldurshópsins (18-29 ára) við aðild að ESB er einnig sláandi :

66,4 % fólks 18-29 ára var andvígt aðild Íslands að ESB, aðeins 15 % hlynnt.

Ýmis rök hafa verið færð fyrir því, meðal annars í Noregi, að konur séu andvígari ESB aðild en karlar. Fjarlægðin við valdið virðist vera konum meiri þyrnir í augum en körlum og það er ein ástæðan sem gefin er. Önnur ástæða sem getið er er hreinlega staða kvenna innan ESB og ESB-landanna, en þrátt fyrir ötult starf margra nefnda, stjórnmálafólks og kerfisfólks við að auka hlutfall kvenna þar sem ráðum er ráðið, er enn mikil slagsíða innan ESB og enn meiri í mörgum áhrifamiklum ESB-löndum. Þá hefur verið bent á að hinn sameiginlegi vinnumarkaður ESB, sem einnig nær til EES svæðisins hafi gert karla að mun hreyfanlegra vinnuafli en konur og það hafi aukið á erfiðleika kvenna og barna sem eftir sitja í heimalöndunum. Meira að segja á Íslandi hefur þessi veruleiki verið til staðar eftir hrunið að minnsta kosti. Þess utan hefur aukið atvinnuleysi víða komið mun verr við konur en karla.

Hér eru aðeins nefnd fáein af þeim rökum sem tínd hafa verið til og þykja skýra meiri andstöðu kvenna en karla við ESB. Fróðlegt væri að vita hvað kæmi upp á yfirborðið ef könnun yrði gerð hér á landi.

Það þótti dálítið glannalegt þegar Jacques Delors fyrrum forseti framkvæmdastjórnar ESB sagði á sínum tíma að ESB væri eins og hjónabandið, karlarnir sæu um utanríkis- og efnahagsmálin en konurnar um menntun og velferð. Hvernig ætli sjónarmiðin séu í raun og veru nú innan ESB og voldugra ESB landa?

Athugasemdir

[Ásthildur Cesil Þórðardóttir, 21.2.2013 kl. 13:19]

Gott að heyra þetta, og málið er að oftast eru konur með meiri ábyrgðartilfinningu og hugsa lengra fram í tímann en karlar.  Það er ef til vill þess vegna.

[Kolbrún Hilmars, 21.2.2013 kl. 15:12]

Ef Delors talar fyrir hönd ESB um kynjaskiptinguna, þá er ekki nema von að sambandið sé í krísu.

Það eru nefnilega konurnar sem sjá (auk hins) um efnahagsmál fjölskyldunnar á meðan eiginmaðurinn er á ferð og flugi að sinna  "utanríkismálunum".

Farandverkamaðurinn sendir launin sín heim - en veit ekki baun hvernig þeim er varið.  Stjórnmálamaðurinn situr heldur ekki heima hjá sér á kvöldin til þess skrifa innkaupamiða heimilisins fyrir morgundaginn.  Eða skipuleggur dagskrá fjölskyldunnar miðað við mismunandi þarfir hennar. 

Kynin eru jafnhæf að eðlisfari - en konur bera samt yfirleitt meiri ábyrgð og hafa lært að vera raunsæjar. 

En engan þarf að undra að konur efist um ESB ef ESB efast um þær.

[Ásmundur (IP-tala skráð) 21.2.2013 kl. 22:37]

Konur eru meiri tilfinningaverur en karlar. Þær falla því frekar fyrir þjóðrembu. Karlar eru djarfari en konur og eru því tilbúnari að grípa tækifæri þegar þau gefast. Konur eru meira hikandi.

Þetta á við meirihluta karla og kvenna. Auðvitað eru til konur sem eru hugrakkari og ákveðnari en margir karlar. En í skoðanakönnunum er það meðaltalið sem gildir.

Annars er könnun um eitthvað sem ekki er vitað hvað verður auðvitað ómarktæk. Auk þess vantar í könnunina mikilvægar upplýsingar eins og svarhlutfall svo að ómögulegt er að sjá hve margir aðspurðra eru á móti aðild.

Fleira er aðfinnsluvert við könnunina eins og ég hef áður rakið. Vinnubrögðin eru svo slæleg að það vaknar grunur um að hér sé verið að blekkja af ásettu ráði.

[Gunnlaugur I., 21.2.2013 kl. 23:49]

Aumingja Ásmundur. "Konur falla frekar fyrir þjóðrembu" segir hann nú.

Svo talar hann yfirlætislega af hroka og karlrembu um hvað við karlar séum miklu ákveðnari og djarfari en konur.

Svo áttar hann sig á að auðvitað eru samt bæði kynin, karlar og konur, hvort um sig í miklum meirihluta gegn ESB aðild eins og fram kemur í könnun MMR.

Því segir hann að ekkert sé að marka þessa könnun eins og hann hefur reyndar sagt um allar aðrar kannanir í bráðum 4 ár sem allar hafa sýnt mikinn meirihluta þjóðarinnar andvígan ESB aðild. Þær allar hafa verið marklausar að mati Ásmundar, af því að niðurstaðan passar ekki hans Stóra sannleik. Af því að það er ekki komin niðurstaða í þessar ESB viðræður eftir bráðum 4 ár.

Við vel flest sem andvíg erum ESB aðild þurfum enga svona niðurstöðu í það mál. Við vildum heldur aldrei að þessi umsókn færi inn. Við höfum alveg séð nóg af kúgun og lélegri stjórnsýslu ESB og þess vegna munum við alltaf vera á móti ESB aðild, við hvorki viljum eða þurfum ótilneydd að sjá eitthvað meira.

Við viljum fá að segja álit okkar beint og milliliðalaust á þessu máli eins fljótt og mögulegt er, þó svo enginn botn verði auðvitað fenginn í þessar viðræður.

Við ætlum fá að kjósa þessar ESB viðræður út af borðinu í lýðræðislegri og beinni þjóðaratkvæðagreiðslu !

Þið sem viljið inn í ESB og að þessar maraþon viðræður haldi því áfram þið kjósið þá bara á móti okkur !

Við kærum okkur ekki um að minnihluti þjóðarinnar geti haldið þessu ESB máli í gíslingu öllu lengur án frekara lýðræðislegs umboðs og allt á okkar kostnað neitt lengur.

Þið höfðuð ykkar tíma til að klára þetta og þið luguð reyndar til og sögðuð að það yrði hægt að klára viðræðurnar á 1,5 til 2 árum, það átti að hespa þessu af á hraðferð en nú er lygin komin í bakið á ykkur og stundaglasið er tæmt og ykkar tími er brátt liðinn !

Lengi lifi opið og frjálst lýðræði !

Þjóðin mun lýðræðislega hrinda þessu ESB umsátri um fullveldi og sjálfsstæði þjóðarinnar !

ÁFRAM ÍSLAND - EKKERT ESB !

[Ásmundur (IP-tala skráð) 22.2.2013 kl. 08:17]

Kannanir hafa ekki sýnt meirihluta þjóðarinnar gegn aðild, aðeins meirihluta þeirra sem tóku afstöðu.

Fyrir utan þá sem svöruðu en tóku ekki afstöðu hafa 40-50% ekki svarað eins og vonlegt er úr því að samningur liggur ekki fyrir.

Í síðustu könnun Capacent voru aðeins rúmlega 30% aðspurðra á móti aðild þó að meirihluta þeirra sem tóku afstöðu hafi verið það.

Það er fráleitt að ætla að sá meirihluti sem tekur ekki afstöðu (þeir sem svöruðu en tóku ekki afstöðu og þeir sem svöruðu ekki) muni skiptast í sömu hlutföllum og þeir sem tóku afstöðu.

Allir þeir sem vilja ekki taka afstöðu fyrr en samningur liggur fyrir eru í þessum hópi. Auk þess getur mörgum snúist hugur þegar samningur liggur fyrir.

ESB-andstæðingar óttast það og vilja því með ofstopa og yfirgangi koma i veg fyrir að þjóðin sjái samninginn.

Kannanir um það sem enginn veit hvað er eru auðvitað ómarktækar.

[Pétur (IP-tala skráð) 22.2.2013 kl. 09:09]

Ásmundur: Það hafa allir séð samninginn, sem hafa viljað. Það þarf enginn að bíða. Samningurinn heitir Lissabon-sáttmálinn með öllu sem hann inniber, engar varanlegar undanþágur. Þessi sáttmáli er aðgengilegur öllum sem eru nettengdir. Ég vil samt vara við íslenzku útgáfunni af sáttmálanum frá Utanríkisráðuneytinu, sem er víst full af vísvitandi þýðingarvillum sbr. þessa færslu.

Skv. tölfræðilegum venjum er fullgilt að ætla, að viðhorf þeirra sem ekki taka afstöðu dreifist á sama hátt og þeirra sem taka afstöðu, ef engar frekari upplýsingar liggja fyrir (skýringar á afstöðuleysi), án þess að það megi þó reikna það með. Þú veizt nákvæmlega ekkert um það Ásmundur frekar en við, hvaða ástæðu þeir sem ekki tóku afstöðu höfðu. Þú ert bara að gizka alveg eins og þú hefur gizkað á allt varðandi ESB. 

[Ásthildur Cesil Þórðardóttir, 22.2.2013 kl. 09:37]

Heyr Heyr! Gunnlaugur og Pétur. 

[Ásmundur (IP-tala skráð) 22.2.2013 kl. 10:36]

Voru þá bara þeir sem á sínum tíma unnu skýrslu fyrir Davíð Oddsson um stórar og smáar varanlegar sérlausnir og undanþágur bara að ljúga rétt eins og aðalsamningamaður Íslands, einn heiðursframkvæmdastjóri ESB, fyrrum sjávarútvegsstjóri þess og þingmaður ESB ofl?

Sjálfstæðiskonan Sigurlaug Anna Jóhannsdóttir rifjar þetta upp hér:

http://blog.pressan.is/sigurlauganna/2013/02/06/er-um-eitthvad-ad-semja-serlausnir-og-undanthagur-esb/

Annars þarf þjóðin ekki bara að sjá samninginn. Hún þarf einnig að kynna sér rétt okkar skv lögum og reglum ESB eins og td þá staðreynd að reglan um hlutfallslegan stöðugleika útilokar að aðrar þjóðir veiði í íslenskri landhelgi.

Þið eruð ekki í lagi.

[GB (IP-tala skráð) 22.2.2013 kl. 11:16]

http://www.mbl.is/frettir/erlent/2013/02/22/samdrattur_og_dokkar_horfur_i_esb/

[Pétur (IP-tala skráð) 22.2.2013 kl. 12:26]

Minni áhugi á evrunni í Póllandi

[Ásthildur Cesil Þórðardóttir, 22.2.2013 kl. 15:42]

Það er einn á þessari síðu sem er ekki í lagi, verðlaun fyrir að sjá hver það er. 

[Kolbrún Hilmars, 22.2.2013 kl. 18:05]

Ásmundi (sbr. #8) tekst oft að hitta naglann á höfuðið - óviljandi:

"Þjóðin þarf að kynna sér rétt okkar skv. lögum og reglum ESB".

Greinilega megum við ekki hunsa þessi viðvörunarorð Ásmunds.  Jafnvel gamalgrónar milljónatuga aðildarþjóðir lenda í vandræðum gagnvart reglugerðarapparatinu, því frétt mbl.is í dag segir ESB reka á 3ja tug mála á hendur aðildarþjóðunum sem stendur.

Hefðum við, örríkið, efni á nokkrum, hvað þá ítrekuðum, varnar-málarekstri gegn ESB?