Að semja um ESB-aðild til að fella hana!

Í eftirfarandi grein bendir Hjörleifur Guttormsson á hversu fáránlegur sá málflutningur er að nauðsynlegt sé að ljúka umsóknarferlinu til þess að þjóðin fái tækifæri til að fella umsóknina í þjóðaratkvæðagreiðslu, en grein hans birtist á Smugunni í gær:

"Í „opnu bréfi“ til mín í gærmorgun reynir Svandís Svavarsdóttir að réttlæta það fyrir sjálfri sér og öðrum að enginn frambjóðandi VG til forvals í Reykjavík nefnir andstöðu við aðild að Evrópusambandinu í kynningu á baráttumálum sínum. Skýringuna á þessari þögn segir hún vera „að í 200 orða kynningum okkar nefnum við ekki þetta grundvallaratriði í stefnu VG vegna þess að við teljum það skýrt og sjálfsagt.“ Samt er það svo að hún og flestir aðrir tiltaka aðrar helstu stefnuáherslur VG í þessum stuttu pistlum, en ESB-andstaðan liggur í þagnargildi. Sjálf leggur Svandís áherslu á „félagslegt réttlæti og jöfnuð, skýra sýn í umhverfis- og náttúruverndarmálum og sterka kvenfrelsisrödd í öllum málaflokkum.“ Katrín Jakobsdóttir ætlar að vinna að „kvenfrelsi, umhverfisvernd og félagslegu réttlæti“. Árni Þór Sigurðsson segir: „Baráttan í næstu alþingiskosningum mun snúast um leiðarval, hvort áfram eigi að feta leiðina til jöfnuðar og félagshyggju ...“,   Álfheiður Ingadóttir segir „Réttlæti, kvenfrelsi og umhverfisvernd eru mín leiðarljós í pólitík ...“, og Björn Valur Gíslason segir brýnustu hagsmunamálin vera „að efla velferðarkerfið, auka jöfnuð, umhverfismál og tryggja þjóðareign á auðlindum landsins.“ Nokkrir aðrir frambjóðendur nefna úrsögn úr Nató og friðarstefnu. Eru tilvitnuð sýnishorn ekki „skýr og sjálfsögð“ grundvallaratriði í stefnu VG? Í ljósi þessa er þögn frambjóðenda flokksins um Evrópusambandið hrópleg, ekki síst í ljósi þeirrar alvarlegu stöðu sem VG ber ríka ábyrgð á með aðildarumsókn.

„Að ljúka umsóknarferlinu“

„ ... ég vil ljúka umsóknarferlinu svo við getum fellt umsóknina í þjóðaratkvæðagreiðslu.“ er stefnuyfirlýsing af hálfu Svandísar í þessu bréfi. Hér er ekki lengur talað um að gera þurfi málið upp fyrir kosningar, eins og hún og Katrín og jafnvel Árni Þór voru að orða síðsumars. Nú er boðskapurinn að gera aðildarsamning við ESB fyrir hönd Íslands svo að „við“ getum fellt hann í þjóðaratkvæðagreiðslu. Fátt sýnir betur þann gapastokk sem VG-forystan sem aðili að ríkisstjórn hefur komið flokknum og þjóðinni í með framferði sínu, ábyrgð meirihluta Alþingis ekki undanskilin. Ríkisstjórn sem gerir skuldbindandi aðildarsamning við ESB er að sjálfsögðu ábyrg fyrir honum ásamt þeim stjórnmálaflokkum sem að henni standa. Enginn ágreiningur er um það hérlendis að slíkan samning, ef gerður yrði, beri að staðfesta eða fella í þjóðaratkvæðagreiðslu. Að stofna til slíkrar vegferðar af stjórnmálaflokki sem er andvígur aðild ber hins vegar vott um alvarlegan geðklofa. Á síðasta landsfundi VG haustið 2011 var m.a. samþykkt: „Landsfundurinn telur það eitt af forgangsverkefnum VG, flokkseininga og þingflokks, að herða róðurinn við að upplýsa þjóðina um eðli og afleiðingar ESB-aðildar.“ Þeir vita sem vilja að engar efndir hafa orðið á því fyrirheiti.

Grafalvarleg staða

Það líður að alþingiskosningum þar sem kjósendur gera upp við frambjóðendur og flokka vegna stefnu þeirra og efnda á gefnum yfirlýsingum. Umsókn Íslands að Evrópusambandinu verður eitt stærsta málið í aðdraganda kosninganna. Menn munu rifja upp orð og efndir forystumanna í því máli sem öðrum. VG hefur þegar misst fjölmarga úr sínum röðum vegna þess hvernig á þessu stórmáli hefur verið haldið af forystu flokksins á Alþingi og í ríkisstjórn á kjörtímabilinu. Þögn frambjóðenda nú bætir þar ekki úr skák. Það eru síðustu forvöð fyrir VG að standa við yfirlýsta stefnu gegn aðild að ESB í stað þess að láta draga sig lengra út í ófæruna. Eftir kosningar verður það um seinan.

Hjörleifur Guttormsson"

Athugasemdir

[Ásmundur (IP-tala skráð) 22.11.2012 kl. 15:18]

Þetta er auðvitað hárrétt afstaða hjá Svandísi. 

Ummæli Hjörleifs eru heimskuleg. Svandís er ekki þjóðin. Þótt hún hafni aðild í atkvæðagreiðslu er óvíst hver niðurstaðan verður.

Tilraunir til að slíta aðildarviðræðunum er ofstopi sem þjónar augljóslega þeim eina tilgangi að útiloka þann möguleika að þjóðin velji aðild. Það er því tilræði við lýðræðið.

Það er ekki gott vegarnesti fyrir stjórnmálamenn að sitja uppi með slíkt í farteskinu, sérstaklega ef síðar kemur í ljós að það voru mikil mistök að hafna aðild.

Það kemur hins vegar ekki á óvart að Hjörleifur skuli ekki spyrja um það sem er miklu mikilvægara, hvernig frambjóðendur vilja bregðast við óbærilegum vanda af völdum krónunnar, hvort sem hún er í höftum eða ekki.

Hann mætti einnig spyrja frambjóðendur hvort þeir séu sáttir við að Ísland gangi úr EES, eins og útlit er fyrir ef aðild verður hafnað, vegna þess að höft eru nauðsynleg en samræmast ekki EES-samningnum.

Það er aumt að lofa stuðningi við umsóknarferlið en hætta við áður en loforðið hefur verið efnt. Þeir sem það gera bera þá ábyrgð á að miklum fjármunum og vinnu hefur verið sólundað til einskis. 

Heiðarlegir Vinstri grænir haga sér ekki þannig.

[Kolbrún Hilmars, 22.11.2012 kl. 15:54]

Hárrétt afstaða Svandísar, segir maðurinn.  Einmitt það!

Þingmaðurinn gerði grein fyrir atkvæði sínu þann 16.júlí, 2009 og sagði (stytt en orðrétt): "...ég er á móti ESB aðild og segi já".  Sem er alveg í samræmi við þá afstöðu nú að semja beri um ESB "samning" til þess að geta fellt hann.

Vinstri grænir ættu að fá Stefan Fule til þess að halda fyrirlestur á flokksráðsfundi til þess að útskýra að svona háttalag sé ekki vel séð hjá ESB-bírókratinu.

[Gunnlaugur I., 22.11.2012 kl. 15:55]

Þetta er alveg hárrétt hjá Hjörleifi. Svandís er með allt niður um sig í þessu máli. Afhverju ekki bara að sækja líka um aðild að USA og leggja út í rándýrar samningaviðræður við þá, já bara til þess að kolfella það og sýna þessum Könum að við viljum heldur ekkert með þeirra Ríkjabandalag hafa að gera. Þetta er pólitískur "geðklofi" á mjög háu stigi.

Það er einfaldlega of seint fyrir VG að gera eitthvað í málunum, þess vegna gera þau akkúrat ekkert nema hlýta vilja þessarar Stalínisku flokksforystu.

Þjóðin mun refsa þeim illilega fyrir svikin í ESB málinu. Sjálfssagt mun forystusveit VG þurfa á áfallahjálp að halda eftir að þeim verður ljóst fylgishrun flokksins eftir næstu kosningar.

Ásmundur ESB aftaníossi mun að sjálfssögðu túlka fygishrun VG með allt öðrum hætti. Það verður eitthvað á þá leið að fylgishrunið hafi verið vegna þessarar vitleysis ESB andstöðu flokksins og einhverra óþægra þingmanna sem ekki hafi lotið flokksræðinu í einu og öllu. Fróðlegt verður að sjá hvernig hann muni þá líka túlka væntanlega nokkuð stóran kosningaósigur Samfylkingarinnar.

En vel á minnst hvar eru svörin frá frambjóðendum í forvali VG í Reykjavík ?

Áttu svörin ekki að liggja fyrir á miðnætti í gærkvöldi ?

Eða svarar kannski flokkshesturinn Svandís fyrir þau öll samkvæmt valdboði flokksforystunnar, með þessu aumlega yfirklóri sínu ? Það kæmi ekki á óvart.

[Valdimar Samúelsson, 22.11.2012 kl. 16:08]

Hvaða flokkur gefur sig út fyrir að vera andstæðingur umsóknar að ESB Ég veit ekki með sjálfstæðisflokkin lengur.

[Ásmundur (IP-tala skráð) 22.11.2012 kl. 17:48]

Eftir myndun ríkisstjórnarinnar 2009 tók fylgi VG að aukast. Eftir samþykkt ESB-aðildarumsóknarinnar hélt aukningin áfram næstu níu mánuði.

Myndun ríkisstjórnar með aðildarumsókn og samþykkt hennar á Alþingi fór því greinilega vel í kjósendur VG.  

Eftir þetta fór að bera á mikilli sundrungu í flokknum. Þá hrundi fylgið úr 28% í apríl 2010 niður í tæp 12% í síðustu könnun. Á sama tíma minnkaði fylgi Samfylkingarinnar úr 23% í 22%. Þarf frekari vitnanna við?

http://www.capacent.is/frettir-og-frodleikur/thjodarpulsinn/

Innanflokkssundrung hefur alltaf slæm áhrif á fylgi flokka. Þar fyrir utan var málflutningur sundrungaraflanna með miklum ólíkindum. Þau studdu ríkisstjórnina og voru jafnvel ráðherrar í henni, en unnu gegn stefnu hennar. Þetta var auðvitað algjörlega galið.   

[Gunnlaugur I., 22.11.2012 kl. 18:29]

"ásmundur".

Þetta er alls ekki rétt ályktað hjá þér og hrein sögufölsun til þess eins að búa til þinn Brusselska sýndarveruleika, eins og þú ert ráðinn til.

Það er ekkert að marka þig, því að allar þínar skoðanir á mönnum og málefnum, hafa aðeins þann eina einbeitta ásetning og brotavilja gegn þjóðinni sem er að láta tilganginn helga ESB meðalið.

Margir fyrrverandi stuðningsmenn VG í síðustu kosningum, væntu mikils af þessari Ríkisstjórn og fannst tími til komin eftir Hrunið að þar yrðu notaðir nýjir vendir við að sópa upp óhroðann.

Margir þeirra grettu sig reyndar vegna ESB umsóknarinnar en héldu að þar hefði VG þó tryggt sér einhverja alvöru aðkomu að því máli og að umsóknarferlið yrði gegnsætt og öllum opið og tæki aðeins 16 til 20 mánuði eins og helstu forystumenn Samfylkingarinnar fullyrtu á þeim tíma.

Þegar síðar koma á daginn að VG hafði algerlega samið af sér og hafði alls enga haldbæra fyrirvara gert til þes að hafa raunveruleg áhrif á ESB viðræðuferlið og að þeir hefðu ekki einu sinni haft vit á því að setja því einhvern raunhæfan tímaramma, þá fór að bera á virkilegri ókyrrð og óánægju innan flokksins og meðal margra stuðningsmanna flokksins.

Þingmenn og margir forystumenn flokksins út um land allt sögðu skilið við flokkinn einmitt vegna ESB málsins, það liggur alveg ljóst fyrir, að það var megin ástæðan.

Það er auðvitað öllum ljóst sem eitthvað þekkja til ESB málsins og innanbúðar hjá VG að þessi ESB vitleysa hefur algerlega rifið flokkinn á hol og sundrað og tætt af honum fylgið.

VG gat fyrir rúmu einu ári eða svo náð stórum hluta af þessu fylgi til baka aftur ef að þeir hefðu haft kjark og þor til og sett hnefann í borðið gagnvart Samfylkingunni vegna þessarar ESB umsóknar.

Nú er það orðið um seinan og þessi flokkur sígur sofandi að feygðarósi. Þökk sé svona flaðrandi ESB/Samfylkingar spunakerlingum eins og þér.

Samfylkingin og þú munu auðvitað ekkert gráta það, heldur mun bara hlakka í ykkur görnin, þó að nú séuð þið með einhverra uppgerðar samúð, bara til þess að geta haldið misnotkun ykkar á flokknum alveg fram af þverhnípinu.

En margir fyrrverandi stuðningsmenn VG munu að sönnu um stund syrgja horfnar og glataðar hugssjónir þessa flokks, sem lét æru sína og hugssjónir í staðinn fyrir völd í skjóli þessa þjóðhættulega, óheiðalega og tækifærissinnaða flokks Samfylkingarinnar.

En alveg sama þó að hlakki í ykkur um stund og að ykkur hafi tekist að misnota og eyðileggja VG þá mun Samfylkingunni og ykkur ESB sinnum ekki heldur farnast vel og ykkur mun sem betur fer fyrir land okkar og þjóð aldrei takast lokatakmark ykkar um ESB helsið !

Þegar þjóðin mun fyrr en seinna með einum eða öðrum hætti hafna með öllu þessari ESB umsókn og ESB helsinu, þá mun minnka í ykkur hrokinn og gorgeirinn.

Það er nefnilega þannig að sá hlær best sem síðast hlær !

[Bragi, 22.11.2012 kl. 18:58]

Það sorglegasta við þessa umsókn er hversu mikill tími hefur farið til spillis við að laga til hér innanlands vegna þeirra krafta sem hafa farið í umsókn sem þjóðin vill ekki. Við getum vonandi hlegið að þessu eftir 5-10 ár.

[Ásmundur (IP-tala skráð) 22.11.2012 kl. 19:25]

Gunnlaugur, rengir þú þjóðarpóls Capacent? Skoðaðirðu ekki á hlekkinn?

Þar kemur skýrt fram að fylgi VG fór úr 18% skömmu eftir kosningar upp í 28% tæpu ári eftir kosningar eða níu mánuðum eftir að aðildarumsóknin var samþykkt á Alþingi.

Síðan fór að síga á ógæfuhliðina þegar sundrungin í VG fór að verða fyrirferðarmikil í fjölmiðlum. Þess vegna hrundi fylgi VG úr 28% í 12% á sama tíma og fylgi Samfylkingarinnar stóð nánast í stað.

Það er ekki til neins að vera í afneitun gagnvart þessum staðreyndum.

Auk þess hefur komið fram í könnun að Steingrímur nýtur trausts yfirgnæfandi meirihluta stuðningsmanna VG til að leiða flokkinn. Næst honum koma Katrín og Svandís.

Ögmundur og Jón Bjarnason nutu einskis eða nánast einskis fylgis.   

[Ómar Bjarki Kristjánsson, 22.11.2012 kl. 20:48]

Skrítilegt með suma þarna innan VG, að telja að þeirra persónulega og einstaklingsbundna álit eigi að vera lög. þetta er svoldið áberadi með suma innan VG og er m.a. ástæðan hve erfitt er að gera nokkurn hlut í samstarfi við þá. þessi ,,Litli einræðisherra" tendens.

Aðildarumsókn var samþykkt af alþingi og margoft síðan hefur verið samþykkt áaf að viðhalda umsókn, klára viðræður, fá aðildarsamning og kjósa um hann. það er ekki eins og þetta sé sérstaklega flókið. Hjörleifur er ekki einu sinni á Alþingi og er bara eitt atkvæði í þjóðaratkvæðagreiðslu.

[Ómar Bjarki Kristjánsson, 22.11.2012 kl. 22:10]

Og þetta er auðvitað rétt sem Ásmundur bendir á, að þessi sérkennilegi tendens hjá sumum innan VG - þetta er gjörsamlega að rústa flokknum! þetta hefur alltaf verið stórvandamál innan þeirra er telja sig á hátíðisdögum ,,lengst til vinstri" á pólitíska litrófinu. það eru þarna nikkrir ,,Litlir einræðisherrar" sem kunna ekkert að vera í pólitík og eiga ekki að koma nálægt nokkurri stjórnun og hvað þá lands. þetta eru svona eins máls menn eða í mesta lagi þriggja máls menn - og allt annað skal víkja fyrir þeirra dyntum og ráðríki. það er m.a þetta sem gerir að verkum að fáir vilja fara í stjórn með þessum mönnum. Einfaldlega vegna þess, að það er tæplega hægt. þetta lið er einn öflugasti stuðningsaðili að því að Sjallar og frammar einoka hérna öll pólitísk afskipti og koma Elítu landsins til alvalda. því það er það sem þetta háttalag þeirra þýðir. þetta veikir vinstri stefnu og kemur í veg fyrir að vinstri sjónarmið nái fram að ganga.

[Elle_, 22.11.2012 kl. 22:47]

Pólitískur geðklofi, já.  Við algerlega sannarlega á móti og segjum já.  Það er með ólíkindum hvað fólk getur staðið haus og logið og búist samt við að lenda á fótunum eins og flottum v-i-l-l-i-k-e-t-t-i sæmir.

[Hreinn Sigurðsson, 23.11.2012 kl. 07:58]

Það er fáránleg athugasemd hjá Ásmundi að það sé tilræði við lýðræðið að slíta aðildarviðræðunum. Hvernig getur það að fara að vilja meirihluta landsmanna, verið tilræði við lýðræðið??????????

[Ásmundur (IP-tala skráð) 23.11.2012 kl. 10:10]

Hvaða skýringar hefur Gunnlaugur á því að eftir að Alþingi samþykkti aðildarumsóknina jókst fylgi VG jafnt og þétt og náði 28% níu mánuðum seinna.

Og hvernig útskýrir hann að síðan hefur fylgi VG hrunið úr 28% í 12% á meðan Samfylkingin er nánast með sama fylgi í upphafi og lok tímabilsins? 

[Ásmundur (IP-tala skráð) 23.11.2012 kl. 11:03]

Hreinn, tilgangurinn með því að krefjast þess að viðræðunum verði slitið er að freista þess að fá þjóðina til að hafna aðild áður en hún sér samninginn vegna þess að þá gæti hún kosið aðild.

Þannig er verið að reyna að koma í veg fyrir að lýðræðislegur vilji þjóðarinnar komi fram. Það er auðvitað tilræði við lýðræðið. Þetta er mjög augljóst vegna þess að annars myndu menn bíða rólegir eftir samningnum.

ESB-andstæðingar óttast að blekkingaráróður þeirra verði afhjúpaður með samningi og að þá snúist mörgum hugur. Það er því meiri von til þess að þjóðin hafni aðild núna en þegar samningur liggur fyrir. Ástandið á evrusvæðinu gæti þá einnig hafa batnað.

Í svona ferli sem tekur mörg ár er óhjákvæmilegt að fylgið sveiflist. Það er því fráleitt að slíta viðræðunum vegna þess að fylgi við aðild er í minnihluta á ákveðnum tímapunkti enda verður ekki hægt að taka það upp aftur ef það fer aftur í meirihluta nokkru seinna.

Það sem sýnir best hvað þetta er fráleit hugmynd er að flestar ESB-þjóðirnar hefðu ekki gengið í ESB ef slík vinnubrögð hefðu verið viðhöfð þar. Þá hefði verið komið í veg fyrir lýðræðislegan vilja þjóðanna.

Skoðanakannanir sýna lágt svarhlutfall. Margir vilja eðlilega ekki taka afstöðu fyrr en samningur liggur fyrir. Það er því hæpið að tala um að meirihluti þjóðarinnar sé á móti aðild þó að meirihluti þeirra sem taka afstöðu sé það.