Lyfin sem drepa sjúklinginn að lokum

Aðgerðir ESB til bjargar evrunni minna á risavaxna svikamyllu. Sömu bunkarnir af veðskuldabréfum ganga hring eftir hring áður en allt hrynur að lokum. Þetta segir Nigel Farage, leiðtogi breska Fullveldisflokksins.

 

Flokkur hans er í mikilli sókn um þessar mundir enda nýtur ESB og evran mjög minnkandi virðingar á Bretlandseyjum eftir óteljandi leiðtogafundi til bjargar evrunni án þess að nokkur breyting sjáist til batnaðar.

 

„Daginn sem Grikkir gefast upp á evrunni,“ segir Nigel Farage, „mun Evrópski seðlabankinn sitja uppi með ógnarháan bunka af verðlausum skuldabréfum, en það merkir í allri sinn geðveiku dýrð að bankinn verður síðan að afla nýs fjármagns, m.a. frá þeim sömu evruríkjum sem hann er nýbúinn að bjarga frá gjaldþrotsbrúninni með því að hlaða á þau auknum skuldum.“ Farage kallar björgunaraðgerðir ESB farsa sem endi með því að lyfið drepi sjúklinginn.

 

Daily Telegraph greindi frá því nú í vikunni að samkvæmt nýrri skoðanakönnun YouGov vilji yfirgnæfandi meirihluti Breta (67% gegn 19% og 14% tóku ekki afstöðu) að þjóðaratkvæði fari fram fyrir næstu þingkosningar sem skeri úr um það hvort Bretar verði áfram í ESB eða yfirgefi það. Aftur á móti gæti knappur meirihluti hugsað sér að Bretar yrðu áfram í ESB ef Cameron forsætisráðherra tækist að endurheimta til Bretlands mikilvæg fullveldisréttindi, sem framseld hafa verið til Brussel, með nýjum samningi um ESB-aðild.