Makríllinn stendur fastur í koki forystumanna ESB

Löngu er orðið ljóst, þótt ekki hafi það enn verið staðfest opinberlega, að makríldeila Íslendinga og Færeyinga við ESB hefur fram að þessu komið í veg fyrir að viðræður hæfust um sjávarútvegskaflann í fyrirhuguðum aðildarsamningi Íslands og ESB.

 

Eins og kunnugt er hefur sjávarútvegsstjóri ESB margsinnis hótað Íslendingum og Færeyingum að beitt verði viðskiptaþvingunum gegn þessum tveimur þjóðum til að knýja þær til að láta sér nægja þá örlitlu hlutdeild í makrílstofninum sem ESB vill skammta þeim. Jafnframt er ljóst að væri látið undan þessum óbilgjörnu hótunum yrði það margra tuga milljarða skellur fyrir íslenskt og færeyskt efnahagslíf.

 

Forystumenn ESB telja sig þó hafa fleiri vopn uppi í erminni en viðskiptahótanir til að þvinga Íslendinga og Færeyinga til hlýðni. Þeir hóta líka að taka aðildarumsókn Íslendinga í gíslingu sem aftur veldur þungum áhyggjum innan Samfylkingarinnar. Meðal forystumanna ESB á sviði sjávarútvegsmála hefur Simon Coveney, sjávarútvegsráðherra Íra, talað af mestri hreinskilni um stöðu málsins. Hann hefur margsagt á undanförnum vikum að ekki eigi að opna sjávarútvegskaflann í aðildarviðræðum Íslands fyrr en Íslendingar hafi beygt sig fyrir kröfum ESB. Ýmsir forystumenn í öðrum ESB-ríkjum hafa lýst því sama yfir.

 

Forsvarsmenn ríkisstjórnar Íslands hafa aftur á móti fullyrt hvað eftir annað á undanförnum vikum að makríldeilan og aðildarviðræðurnar séu tvö óskyld mál. Til dæmis hélt Össur því blákalt fram á fundi utanríkismálanefndar Alþingis að orð írska ráðherrans væru aðeins ætluð til heimabrúks. Samkvæmt frétt á mbl.is s.l. sunnudag kom til orðaskipta um það mál á fundi sameiginlegrar þingmannanefndar Alþingis og þings ESB fyrir skömmu. Írskur þingmaður, Pat Gallagher, lagði þar á það þunga áherslu að fyrrnefndar yfirlýsingar Simons Coveneys væru ekki ætlaðar til heimabrúks heldur væru þær settar fram í fyllstu alvöru.

 

Upphaflega var ráð fyrir því gert að viðræður Íslands og ESB hæfust á árinu 2010 en á s.l. ári var rætt um að þær hæfust þá um haustið. Danir hafa farið með formennsku í ESB frá því í desember s.l. og höfðu margsinnis lýst yfir áhuga sínum að opna viðræður um sjávarútvegskaflann í fyrirhuguðum aðildarsamningi Íslands. En það hefur ekki gerst og formennsku þeirra lýkur í júní n.k.

 

Aðild Færeyinga að makríldeilunni flækir þetta mál enn frekar. Jón Bjarnason, fyrrv. ráðh., benti nýlega á það að danska ríkisstjórnin styddist við atkvæði Færeyinga og Grænlendinga og myndi missa meiri hlutann ef stuðningi þeirra nyti ekki við. Samkvæmt FiskerForum.com hefur færeyski þingmaðurinn Sjurður Skaale bent ráðherrum í ríkisstjórn Danmerkur á þá pólitísku pattstöðu sem upp kæmi ef látið yrði undan kröfum ESB og Færeyingar knúðir til að draga úr veiðunum. Af þessari ástæðu mun danska ríkisstjórnin hafa hægt um sig í þessu máli, a.m.k fyrst um sinn.

 

Í samtali við mbl.is s.l. miðvikudag viðurkennir Árni Þór Sigurðsson, annar af tveimur formönnum sameiginlegu þingmannanefndar Alþingis og þings ESB „að makríldeila gæti sett strik í reikninginn í viðræðunum um inngöngu í Evrópusambandið ef sambandið setti hana fyrir sig.“ Hann bendir jafnframt á að svo virðist sem stækkunardeildin og sjávarútvegsdeildin hjá ESB tali tungum tveim um tengsl makrílsdeilunnar og aðildarumsóknarinnar. Það er því hreint ekki ofsagt að makríllinn virðist standa fastur í koki forystumanna ESB.

Segir hótunina ekki til heimabrúks

Athugasemdir

[Ásmundur Harðarson (IP-tala skráð) 11.4.2012 kl. 12:56]

Ja hérna, þetta eru tímamót.

Geðsjúklingurinn með athugasemd sem er ekki kolruglað svar við minni athugasemd. Ekki datt mér í hug að greining mín á bágbornu ástandi hans myndi hafa nein áhrif á hann.

Ég er þó mjög svartsýnn á að þetta sé batamerki.

[Ásmundur Harðarson (IP-tala skráð) 11.4.2012 kl. 13:05]

Athugasemdin hér fyrir ofan lenti á rangri færslu. Hún er nú komin á réttan stað.

Best væri ef báðar athugasemdir mínar undir "Makríllinn stendur... " yrðu fjarlægðar.