Talsmaður ESB: Íslendingar fá engar undanþágur í sjávarútvegsmálum

Paul Ivan, fulltrúi rannsóknarmiðstöðvar ESB, fullyrti á fundi með íslenskum blaðamönnum í gær að Íslendingar myndu enga undanþágu fá frá reglunni um alger yfirráð ESB yfir sjávarútvegsmálum aðildarríkjanna, að minnsta kosti engar undanþágur til langframa.

Pressan.is birti í gær þessa frétt frá Brussel um yfirlýsingar Paul Ivans, en hann mun vera fulltrúi hjá „The Centre for European Policy Studies", sem er miðstöð ESB um rannsóknir á stefnumörkun aðildarríkja. Samkvæmt frétt Pressunnar sagði Paul m.a. „að augljóslega hafi Íslendingar hagsmuni af því að viðhalda eigin stefnu í sjávarútvegsmálum en bendir á að það eigi við um öll lönd í Evrópusambandinu".

Paul Ivan sagðist skilningsríkur á málstað Íslendinga „en það eiga öll lönd einhverra hagsmuna að gæta en fá enga undanþágu." Hann taldi jafnframt helstu ástæðu þess „að Íslendingar fengju engu ráðið í sjávarútvegsmálum vera þá að landið væri of lítið..."

Paul Ivan bætti jafnframt við: „Þetta þýðir samt ekki að hagsmunum Íslendinga í sjávarútvegi sé ekki vel borgið undir stjórn yfirvalda í Brussel." (!!!)

„Þá sagði hann að reglur ESB væru skýrar og allar undanþágur væru erfiðar viðfangs og ólíklegt að hnikað yrði frá þeim að ráði. Í það minnsta myndu engar undanþágur fást til langframa."

Í frétt DV í dag af blaðamannafundinum er jafnframt frá því sagt að Paul Ivan hafi lagt áherslu á hversu ólíklegt væri að Ísland fengi framkvæmdastjóra fiskveiðimála í sinn hlut, ef til aðildar kæmi, en talsmenn aðildar hér á landi hafa ítrekað haldið þeirri blekkingu fram. Samkvæmt frétt DV gaf Paul Ivan þá skýringu „að ESB reyndi að forðast hagsmunaárekstra með því að stuðla að því að ríki sem eiga mesta hagsmuni í tilteknum málaflokki færu ekki með stjórn hans innan framkvæmdastjórnarinnar."

Paul Ivan bætti þó við ofurlítilli gulrót: „hins vegar er vel mögulegt að íslenskir þingmenn á Evrópuþinginu myndu sitja í þingnefnd um sjávarútvegsstefnuna og hafa þannig áhrif á hana."

Í sumar verða þrjú ár liðin frá því að Ísland sótti um aðild að ESB. Ekki er að efa að forystumenn ESB hafa margoft hvíslað því sama að Össuri utanríkisráðherra og Paul Ivan fullyrti hreinskilnislega í samtali sínu við íslenska blaðamenn í gær. Össur heldur hins vegar feluleiknum áfram og hefur enga grein gert fyrir samtölum sínum við forystumenn ESB.

Eins og kunnugt er gengu þær forsendur í sjávarútvegsmálum, sem lagðar voru til grundvallar þegar Alþingi ákvað að sækja um aðild, í þveröfuga átt. Upplýsingar Paul Ivans eru eitt með mörgu sem hlýtur að kalla á að Alþingi taki aðildarumsóknina til endurskoðunar og viðræðunum verði tafarlaust slitið.

Opnaði á breytingar á frumvarpinu

Athugasemdir

[Vilhjálmur Örn Vilhjálmsson, 31.3.2012 kl. 06:28]

Hann pissar endalaust þessi pjakkur í ESB

[Jón Valur Jensson, 31.3.2012 kl. 06:39]

Það vakti sérstaka athygli mína, þegar ég fylgdist með umræðum í sölum Alþingis í fyrradag, að þegar Ásmundur Einar Daðason sagði frá þessari frétt af ummælum Pauls Ivan, fulltrúa rannsóknarmiðstöðvar ESB, á blaðamannafundi með Íslendingum, að þrátt fyrir að Össur Skarphéðinsson stigi strax á eftir í pontu, minntist hann ekki einu orði á þessa óþæglegu staðreynd!

En þeir þurfa að stimpla þetta inn í sína þykku höfuðskel, Esb-dindlarnir:

"Íslendingar myndu enga undanþágu fá frá reglunni um alger yfirráð ESB yfir sjávarútvegsmálum aðildarríkjanna, að minnsta kosti engar undanþágur til langframa."

[Jón Valur Jensson, 31.3.2012 kl. 06:43]

Sjá nánar hér: Esb. tekur sér alræðisvald yfir fiskveiðilögsögu milli 12 og 200 mílna!