Ekki ENN rétt að slíta ESB-viðræðum, segir Steingrímur J

Enn sem komið er hef ég ekki talið það skynsamlegt að við hverfum frá því ferli sem við erum stödd í núna, segir Steingrímur J. Sigfússon og vill fá efnislega niðurstöðu í ESB-viðræður. Hana mætti fá með því að slíta viðræðunum vegna ágreinings eða með því leiða þær til lykta með samningi.

Þetta segir Steingrímur í viðtali við Bændablaðið í gær, 19. janúar. Í samtalinu kemur fram að Steingrímur J. sé enn þeirrar skoðunar að „það þjóni ekki okkar heildarhagsmunum að ganga inn í Evrópusambandið". Hann hafi frekar styrkst í þeirri afstöðu og líklega hafi fleiri gert það „miðað við erfiðleikana hjá sambandinu og ýmislegt sem er að koma í ljós um innri veikleika þess samstarfs". Þá segist Steingrímur J. standa vörð um krónuna, meiri kostir séu við hana en gallar. Náist samningar milli Íslands og ESB segist Steingrímur J. muni beita sér gegn samþykkt þeirra.

„Þetta hefur vissulega verið mjög erfið vegferð. Ég dreg ekkert úr því. Það hefur reynt mjög á okkur og við neyddumst til að ganga lengra í málamiðlun á þessu sviði en ég hafði reiknað með, það viðurkenni ég fúslega." Í því ljósi beri að skoða loforð hans fyrir kosningarnar 25. apríl 2009. „Ég reiknaði ekki með því að þetta yrði svona hart sótt en það var einfaldlega niðurstaðan að grundvöllurinn fyrir því að af þessari ríkisstjórn gæti orðið var einhvers konar lending í þessu máli á þeim nótum sem varð."

Hann segist ekki vita betur en þeir Jón Bjarnason séu „sammála í grundvallarafstöðunni til Evrópusambandsins". Þessi ESB-leiðangur sé þeim ekki að skapi.

Steingrímur sem nú er bæði sjávarútvegs- og landbúnaðarráðherra svo og efnahags- og viðskiptaráðherra segir að íslenskur landbúnaður hafi sannað gildi sitt í þeim efnahagslegu erfiðleikum sem Ísland hefur glímt við. Hann sé í sókn, m.a. sem útflutningsgrein og staða hans slái á það tuð sem hér hafi hljómað á árum áður um að landbúnaðurinn væri baggi á þjóðinni. Sterk staða landbúnaðarins geri málflutning hælbíta hans hjáróma.

Athugasemdir

[Valdimar Samúelsson, 20.1.2012 kl. 16:24]

Steingrímur er að reyna að hanga á kaupi hjá okkur. VG menn verða að koma honum frá.

[Birgir (IP-tala skráð) 20.1.2012 kl. 18:08]

Hvur rækallinn ... menn blogga og blogga en Steingrímur situr bara sem fastast og sér ekki að sér?

Það þarf sterkari meðul en bloggið til að losna við svona óværu. Vandamálið fer ekki með því einu að tala um það. Það þarf fjöldaúrsagnir úr flokknum eða eitthvað enn róttækara.

[Ásmundur Harðarson (IP-tala skráð) 21.1.2012 kl. 11:40]

Alvarlegur siðferðisbrestur virðist mjög algengur hjá stuðningsmönnum Vinstri grænna jafnt sem þingmönnum flokksins.

Mörgum þeirra finnst greinilega í góðu lagi að taka þátt í ríkisstjórnarsamstarfi án þess að fylgja stjórnarsáttmálanum. Það undarlega er að þeir telja jafnvel að flokkurinn myndi komast upp með slíkt. Það myndi að sjálfsögðu þýða fall ríksstjórnarinnar.

Allt tal um að fylgja frekar stefnu flokksins en stefnu ríkisstjórnarinnar sýnir mikla fáfræði. Flokkar sem mynda ríkisstjórn verða alltaf að gefa eftir einhver af sínum stefnumálum. Öðruvísi er ekki hægt að mynda ríkisstjórn. Stefna ríkisstjórnarflokka kemur því alltaf á eftir stjórnarsáttmálanum. Þess vegna er rangt að tala um stefnu flokka sem kosningaloforð.

Sú ákvörðun Vinstri grænna að samþykkja ESB-umsókn til að leyfa fólki að kjósa um aðild er ekki brot á stefnu flokksins. Eftir sem áður er flokkurinn á móti aðild þó að hann virði rétt þjóðarinnar til að kjósa um hana.

Vinstrivaktin gefur í skyn (með því að rita ENN með hástöfum) að Steingrímur eigi eftir að samþykkja að aðildarviðræðum verði slitið. Það væri hámark siðblindunnar að gangast undir aðalskilyrði samstarfsflokksins fyrir stjórnarmynduninni og svíkja það svo á seinnihluta kjörtímabilsins án þess að efndir hefðu átt sér stað.

Íslendingar verða að fara að skilja að stjórnmál af þessu tagi verða að heyra sögunni til ef við ætlum að geta stjórnað okkur sjálf, ekki síst innan ESB.  Að siðferði margra stjórnmálamanna sé á svona lágu plani  gengur ekki upp í lýðræðisþjóðfélagi.

Þó að meirihluti þingmanna Vinstri grænna sé afhuga stjórnmálum af þessu tagi eru þeir allt of margir sem aðhyllast þau.  Erlendir fréttamenn segjast aldrei hafa kynnst öðru eins og að ráherra í ríkisstjórn vinni gegn stefnu hennar.

[Elle_, 21.1.2012 kl. 17:30]

Hinn svokallaði stjórnarsáttmáli sem var ekkert nema ólýðræðislegur Jóhönnusáttmáli og fullveldisafsalssáttmálinn verður á að víkja.  Og Jóhanna og Steingrímur.  ´Sáttmálinn´ var brot á öllu lýðræði og stjórnarskrá. 

[Ásmundur Harðarson (IP-tala skráð) 22.1.2012 kl. 00:38]

Elle, þú átt að hafa vit á að hætta þessu fullveldisrausi vegna aðildar Íslands að ESB.

Norsk sérfræðinganefnd hefur nefnilega eftir tveggja ára rannsókn komist að þeirri niðurstöðu að við endurheimtum hluta fullveldisins með aðild.

Að sama skapi orkar það miklu frekar tvímæalis að EES-samningurinn sé brot á stjórnarskrá frekar en ESB-aðild. Með ESB-aðild hlýtur því þessi efi sumra að minnka.

[Elle_, 22.1.2012 kl. 15:14]

Haf þú vit á að hætta að neita fullveldisafsalinum sem er hverjum hugsandi manni sem hefur kynnt sér málið ljóst.

[Elle_, 22.1.2012 kl. 15:15]

- - -fullveldisafsalinu - - -