ESB: Virðum hagsmuni ykkar EF þeir rúmast INNAN regluverksins!

Fyrr í vikunni (24. okt.) greindum við frá því sem stækkunarstjórinn hafði að segja um bjölluat hjá ESB. En hvað sagði hann um undanþágurnar frá regluverki ESB sem sumir binda svo miklar vonir við? Í nefndaráliti með tillögunni um aðildarumsókn sem samþykkt var á Alþingi sumarið 2009 var m.a. lögð sérstök áhersla á að Íslendingar héldu yfirráðum yfir 200 mílna fiskveiðilögsögu sinni, að þeir héldu rétti sínum til að gera fiskveiðisamninga við önnur ríki, m.a. um flökkustofna eins og síld, loðnu, kolmunna, karfa og makríl, og íslenskur landbúnaður nyti áfram vissrar tollverndar.

 

Stefán Fühle vék margsinnis að möguleikum Íslendinga til að fá undanþágur frá regluverki ESB í viðtali í Fréttablaðinu s.l. föstudag og þar kemur afstaða hans skýrt fram. Um tilgang heimsóknarinnar sagði hann:

 

„Ég vildi fullvissa þingmennina um að ég leitaði allra leiða til að koma til móts við sérstöðu og sérstaka hagsmuni Íslands, án þess að fara á svig við lög og meginreglur Evrópusambandsins.“

 

Fühle er spurður um sérstöðu og hagsmuni Íslendinga í sjávarútvegsmálum. Hann svarar: „Við höfum ekki heldur fengið að vita hver samningsafstaða Íslands er í þessu máli, þannig að það er heldur snemmt að tjá sig um það í smáatriðum, en á Íslandi þarf enginn að efast um að við skiljum að hér eru sérstakir hagsmunir á ferð og við virðum þá eins og við framast getum, innan ramma regluverks ESB.“

 

Að sjálfsögðu er óskiljanlegt með öllu hvers vegna stækkunarstjórinn segist ekki vita hver samnings­afstaða Íslands sé í sjávarútvegsmálum.  Getur verið að Össur hafi ekki enn þorað að sýna Fühle fyrrnefnda samþykkt Alþingis og þau skilyrði sem þar eru nefnd?

 

Um hvalveiðarnar segir Fühle:  „Það fara líka fram umræður um hvalveiðar hér á Íslandi. Ég vona að í aðildarviðræðunum fari fram upplýst skoðanaskipti um þetta viðkvæma mál.“

 

Hann er spurður um þá gagnrýni andstæðinga ESB- aðildar að um sé að ræða aðlögunarviðræður. Hann svarar: „Þegar ríki sækir um að ganga í ESB endurspeglar það vilja til að samþykkja lög og meginreglur sambandsins. Annars vegar er svarið þess vegna já; við erum ekki að semja um breytingar á löggjöf ESB. Ef Ísland verður aðildarríki er ekki víst að Íslendingar yrðu hrifnir af því að ríkið sem kæmi næst fengi fram alls konar breytingar á löggjöfinni sem þeir hefðu ekki fengið. En það þýðir hins vegar ekki að þetta séu ekki raunverulegar samningaviðræður. Þetta er erfitt og langdregið ferli, þar sem við aðstoðum umsóknarríkið við að laga stefnu sína og löggjöf að því sem gerist í ESB en um leið tökum við sérstöðu og hagsmuni einstakra ríkja til greina.“

Hér að ofan höfum við breytt letri þar sem sú hugsun stækkunarstjórans kemur hvað skýrast fram að undanþágur sem breyta löggjöf ESB séu ekki til umræðu. Einhverjar sýndarlausnir, sem hentað geta vel til áróðurs, kunna hins vegar að vera í boði. En ekki má hreyfa við regluverki ESB!

Í blaðaviðtölum talaði Fühle ýmist um að halda yrði viðræðunum innan regluverks ESB eða innan "viðræðurammans". Í svonefndum samningsramma sem sjá má á heimasíðu utanríkisráðuneytisins er að finna klausu þar sem vikið er að undanþágum eða frávikum frá regluverkinu og kallast þar "aðlögunaraðgerðir". Lögð er áhersla á að frávik verði að vera takmörkuð í tíma og að umfangi (in time and scope), sem sagt tímabundnar eða takmarkaðar undanþágur. 25 liður samningsrammans hljóðar svo:

 „Viðurkenning Íslands á réttindum og skuldbindingum sem leiðir af regluverkinu getur kallað á sérstaka aðlögun að því og leitt, í undantekningartilvikum, til aðlögunarráðstafana sem verður að skilgreina á meðan aðildarviðræðum stendur. Öll ákvæði samningsins um Evrópska efnahagssvæðið, sem víkja frá regluverkinu, geta ekki talist fordæmisgefandi í aðildarviðræðunum.

Ef nauðsyn krefur verður samið um sérstakar aðlaganir á regluverkinu á grundvelli meginreglna, viðmiðana og breyta sem eru innbyggðar í það, eins og aðildarríkin beita þeim þegar þau taka þetta regluverk upp, að teknu tilliti til sérkenna Íslands.

Sambandið getur fallist á beiðnir frá Íslandi um aðlögunarráðstafanir að því tilskildu að þær séu takmarkaðar í tíma og að umfangi, sem og að þeim fylgi áætlun þar sem áfangar vegna beitingar regluverksins eru skilmerkilega skilgreindir. Á þeim sviðum sem tengjast stækkun innri markaðarins skal innleiða reglur með skjótum hætti og aðlögunartímabil skulu vera stutt og fá; þar sem umtalsverð aðlögun er nauðsynleg sem kallar á verulegt átak, þ.m.t. mikil fjárútlát, er hægt að huga að viðeigandi aðlögunarfyrirkomulagi sem hluta af áframhaldandi, ítarlegri og fjármagnaðri áætlun um að ná samræmi. Aðlögunarfyrirkomulag má aldrei fela í sér breytingar á reglum eða stefnumiðum Evrópusambandsins, trufla eðlilega starfsemi eða leiða til verulegrar röskunar á samkeppni. Í því sambandi verður að taka tillit til hagsmuna bæði Evrópusambandsins og Íslands. Einnig er hægt að fallast á aðlögunarráðstafanir og sérstakt fyrirkomulag, einkum verndarákvæði, í þágu Evrópusambandsins, í samræmi við annan punktlið 23. mgr. niðurstaðna leiðtogaráðsins frá 16./17. desember 2004.“  

Athugasemdir

[Björn Emilsson, 30.10.2011 kl. 16:26]

Innlimunarsinnar virðast eiga erfitt með að akilja hvað felst í umsókn um aðild að einhverju. Umsækjandi um ríkisborgararrétt td í Bandaríkjunum, er látinn sverja og vera í einu öllu trúr sínu nýja föðurlandi og hlýta lögum þess og reglum í hvívetna, þar á meðal herskyldu. Og ekki nóg með það heldur verður hann að ´afneita´ eða gleyma gamla föðurlandinu. Auðskyljanlegra dæmi er td umsókn um leiguíbúð, umsækjandi verður að samþykkja og fara eftir þeim reglum þar að lútandi.

Sama á sér stað með umsókn um aðild að ESB.

Semsagt 'To be or not to be' er málið.

[Björn Emilsson, 30.10.2011 kl. 16:30]

leiðrétting... Auðskiljanlegra dæmi er td umsókn um leiguíbúð, umsækjandi verður að samþykkja að fara eftir reglum þar að lútandi.