Steingrímur útilokaði ekki endurskoðun aðildarferlis

Þótt Steingrímur Sigfússon væri ekki tilbúinn til þess í dag á fundinum í Háskóla Íslands að setja ESB-málið á ís "núna", eins og hann tók fram, var engu að síður athyglisvert að hann útilokaði alls ekki að tilefni gæfist til að taka aðildarumsókn Íslands að ESB til endurskoðunar, ef sýnt yrði að Evrópusambandið væri að breytast í allt annað samband en það sem Íslendingar sóttu um aðild að.

Steingrímur fór ekki dult með að hann væri andvígur aðild. En það var bersýnilega skoðun hans að óhagstætt væri að leggja málið til hliðar meðan svo lítið væri komið út úr samningaviðræðunum. Ef við hættum núna, hverju erum við þá nær? Við værum engu nær um framtíðarsamskipti Íslands og ESB, svaraði hann sjálfum sér.

Þegar Stefán Jóhann Stefánsson, sem kynnti sig sem samfylkingarmann, spurði Valgerði Bjarnadóttur, talsmann Samfylkingarinnar og aðra frummælendur, hvort vandræðin í kringum evruna að undanförnu hefði ekki breytt einhverju um afstöðu manna til aðildarumsóknarinnar, svaraði Valgerður að þessi vandræði hefðu engu breytt. En Steingrímur svaraði á hinn veginn að evru-vandræðin gætu miklu breytt, einkum ef ESB reyndist ekki vandanum vaxið og réði ekki við þau vandamál sem skapast hefðu, t.d. hvað varðar Grikkland. Ef allt endi með ennþá meiri samruna innan ESB, þá áskildi hann sér allan rétt til að bregðast við því.

Steingrímur sagði jafnframt að ekki myndi himinn og jörð farast þótt upp úr þessum viðræðum slitnaði og gaf sterklega í skyn að aðildarferlið yrði tekið til endurskoðunar áður en til þess kæmi að samningur yrði undirritaður, ef eitthvað nýtt kæmi fram varðandi helstu hagsmunamál Íslendinga sem mest áhersla væri lögð á og sem sýndi að viðræðurnar stefndu í strand. Fréttamaður mbl.is orðar þetta svo:

"Steingrímur sagði ekki útilokað að það slitnaði upp úr viðræðum við ESB vegna ágreinings um grundvallarmál. Önnur niðurstaða væri að menn kláruðu viðræður og þjóðin greiddi síðan atkvæði um samninginn. " 

Bjarni Benediktsson minnti á að Sjálfstæðisflokkurinn hefði viljað þjóðaratkvæði um það hvort sótt yrði um aðild að ESB og væri enn reiðubúinn að láta kjósa um það hvort umsóknni yrði haldið til streitu. Það væri því út í hött að segja að flokkurinn vildi ekki láta kjósa um málið.

Sigmundur Davíð Gunnlaugsson benti á að aðild hefði verið samþykkt á röngum forsendum og Samfylkingin hefði nýtt sér það neyðarástand sem skapast hefði fyrst eftir bankahrunið. Hann lagði þunga áherslu á að nú væru allar aðstæður gerbreyttar og eðlilegast væri að leggja þetta mál til hliðar í að minnsta kosti eitt og hálft ár. - RA 

Ekki gott að setja umsókn á ís

Athugasemdir

[Ásthildur Cesil Þórðardóttir, 29.9.2011 kl. 08:47]

ÉG myndi nú ekki stóla á þessi ummæli Steingríms J. fyrir mér er þetta svona bæði og til að villa um fyrir fólki.  Hef reyndar heyrt það sagt að hann sé í raun og veru hlyntur því að ganga í ESB.  Það er gott að hafa tungur tvær og tala sitt með hvorri, en það gerir þessi maður svo sannarlega ásamt flestum sem þarna sitja á alþingi. 

[Sigurður Haraldsson, 29.9.2011 kl. 23:51]

Hrein og klár landráð!

[Ásthildur Cesil Þórðardóttir, 29.9.2011 kl. 23:57]

Ef eitthvað réttlæti er til þá verða þau öll sömul leidd furir Landsdóm.  Hann hefur nú þegar tekið til starfa til að dæma Geir H. Haarde, svo nú getur hann tekið á næsta holli, þeim Jóhönnu, Steingrími, Össuri, Árna Páli og öllum hinum landssvikurunum, sem sennilega hafa fengið feit loforð um góðar stöður í Brussel eða Luxemburg furir vel unnin störf í þágu ESB.  Segi og skrifa.