Fiskveiðilögsagan undanskilin í ESB umsókn!

Samstaða var í nefndinni um meginmarkmið í samningaviðræðum við ESB varðandi sjávarútveginn. Þau lúta að forræði yfir sjávarauðlindinni með sjálfbæra nýtingu að leiðarljósi. Það felur í sér forræði í stjórn veiða og skiptingu aflaheimilda innan íslenskrar efnahagslögsögu sem byggð er á ráðgjöf íslenskra vísindamanna.

Auk þess verði leitað eftir eins víðtæku forsvari í hagsmunagæslu í sjávarútvegi á alþjóðavettvangi og kostur er lúti málefni að íslenskum hagsmunum.

Jafnframt verði haldið í möguleika á því að takmarka fjárfestingar erlendra aðila í íslenskum sjávarútvegi og skýrri aðkomu Íslendinga að mótun sjávarútvegsstefnu ESB í framtíðinni.

 

Ofanritað er ekki hluti af nefndaráliti frá LÍÚ. Ofanritað er það  veganesti sem Alþingi gaf samninganefnd um ESB aðild. Í sama nefndaráliti segir ennfremur:

... meiri hlutinn áherslu á að ríkisstjórnin fylgi þeim leiðbeiningum sem gefnar eru með áliti þessu um þá grundvallarhagsmuni sem um er að ræða. Að mati meiri hlutans verður ekki vikið frá þeim hagsmunum án undanfarandi umræðu á vettvangi Alþingis

 

Lögsagan undanskilin og enga útlendinga!

Skilyrðin sem hér eru sett í sjávarútvegsmálum er svo afdráttarlaus að í reynd má segja að Alþingi hafi lagt til umsókn um aðild fyrir fastalandið en vilji undanskilja 200 mílna fiskveiðilögsögu frá aðildarferlinu. Hér er skýrt kveðið á um að samninganefndin verði að gera skýra kröfu um að Ísland haldi fullveldisrétti sínum og um það atriði segir ennfremur í álitinu:

Meiri hlutinn telur að raunhæf leið til að tryggja forræði íslenskra stjórnvalda með framangreindum hætti innan íslenskrar efnahagslögsögu sé að lögsagan verði t.d. skilgreind sem sérstakt íslenskt fiskveiðistjórnarsvæði. Þannig verði réttindi ekki til staðar fyrir erlend fiskveiðiskip til veiða innan íslenskrar efnahagslögsögu úr staðbundnum íslenskum stofnum. Sjávarútvegsstefna ESB fjallar um nýtingu á sameiginlegri auðlind og er gerð í samkomulagi aðildarríkja ESB um nýtingu og samvinnu. Í þessu sambandi telur meiri hlutinn mikilvægt að leggja áherslu á meginreglur hafréttarsáttmála Sameinuðu þjóðanna sem telja verður að tryggi ákveðin grundvallarréttindi sem ekki verða skert með reglum ESB, m.a. fullveldisréttinn um 200 mílna fiskveiðilögsögu.

Síðar er vikið að rétti okkar til samninga við erlend ríki um svokallaða flökkustofna og þar segir:

Meiri hlutinn telur einnig afar mikilvægt að Íslendingar fari með samningsforræði við stjórn veiða úr deilistofnum eins og hægt er og tryggi þannig sem best réttindi Íslands til veiða úr þeim, en deilistofnar hafa orðið sífellt mikilvægari í afkomu greinarinnar. Leita þarf leiða til að tryggja hagsmuni Íslands með beinum aðgangi að slíku samningsferli. Þar þarf að tryggja að sú hlutdeild sem þegar hefur verið samið um haldist, auk þess sem nauðsynlegt er að þrýsta á um að samningum verði lokið um aðra stofna. Að sama skapi þarf að tryggja að Ísland hafi rétt til að ákveða nýtingu stofna er krefjast markvissrar nýtingar líkt og loðnustofninn. ...

Ljóst er að samkvæmt meginreglum sáttmála ESB tekur sambandið yfir fyrirsvar aðildarríkjanna í samningum á ýmsum sviðum, þ.m.t. á sviði fiskveiða og hafréttar. Meiri hlutinn telur rétt að látið verði reyna á það í hugsanlegum samningaviðræðum við ESB að Ísland haldi forræði sínu á þessum sviðum og tali eigin máli á vettvangi alþjóðastofnana í alþjóðasamningum með eins víðtækum hætti og unnt er, enda um grundvallarhagsmuni þjóðarinnar að tefla efnahagslega.

Um rétt útlendinga til fjárfestinga segir ennfremur:

Hvað varðar erlenda fjárfestingu í sjávarútvegi telur meiri hlutinn grundvallaratriði að haft verði náið samráð við sjávarútveginn um afstöðu Íslands. Á sama tíma telur meiri hlutinn að frumskylda samningamanna Íslands sé að tryggja að afrakstur auðlindarinnar falli til á Íslandi. Þannig verði ekki veitt svigrúm fyrir erlendar útgerðir að fjárfesta hér á landi þannig að nýting auðlindarinnar og afrakstur hennar færist í raun úr landi.

 

Fyndnari en Framsókn

Nokkuð var spaugað með það þegar Framsóknarflokkurinn samþykkti í ársbyrjun 2009 að taka upp í stefnu sína að hefja ætti aðildarviðræður að þar hefði flokkurinn í reynd samþykkt að ESB mætti ganga í Framsóknarflokkinn. Svo afgerandi hefðu skilyrði flokksins verið. Sama má í reynd segja um skilyrði Alþingis í sjávarútvegsmálum. Þau ganga svo langt og brjóta svo allar reglur ESB að þau geta vitaskuld ekki verið grundvöllur viðræðna. Þetta vissu margir þeirra aðildarsinna sem samþykktu umsókn en bitu á jaxlinn og sögðu sem svo, ef þetta er það sem þarf til að VG samþykki með okkur að fara í viðræður þá verðum við að láta það yfir okkur ganga.

Síðan hafa aðildarsinnar treyst því að svo óraunhæf skilyrði komi aldrei til álita og hafa þar nokkuð til síns máls. Íslenski samningahópurinn um sjávarútvegsmál glímir ekki bara við það vandamál að skilyrði Alþingis geti verið brosleg. Megin vandi þeirra sem kynnu í þeim hópi að hafa áhuga á koma skilyrðunum að er aðildarferli ESB gerir einfaldlega ekki ráð fyrir þeim lið í dagskrá sinni að aðildarlönd komi með skilyrði sem ganga gegn meginreglum ESB. Það er því enn fátt af viðræðum um þetta að frétta utan að bæði hafa íslenskir talsmenn aðildar og talsmenn ESB lýst því yfir að Ísland verði að undirgangast sameiginlegu sjávarútvegsstefnuna.

Og líkurnar á að Össur fari að áliti Alþingis og beri undir þingið það vandamál að samningsmarkmið okkar í sjávarútvegsmálum náist ekki fram eru ekki miklar ef litið er til orða sem hann lét nú í sumar falla í samtali við alþjóðlegan vef um sjávarútvegsmál en þar sagði ráðherrann:

Still, Iceland will probably not withdraw its application for membership even if the fishing talks are not fruitful, Skarphedinsson said. (Össur sagði að Ísland myndi ekki draga umsókn sína til baka þrátt fyrir að viðræður um sjávarútvegsmál skiluðu ekki árangri.)

Sjá:

http://fis.com/fis/worldnews/search_brief.asp?l=e&id=43980&ndb=1&monthyear=6-2011&day=29&country=94&df=1

http://www.althingi.is/altext/137/s/0249.html

Athugasemdir

[Örn Ægir (IP-tala skráð) 29.7.2011 kl. 20:17]

Þettað verður algjör brotlending í Brussel hjá Össur og félögum það versta er þeir eru með svo mikið á samviskunni að þeir geta ekki snúið við og horfst í augu við afleiðingar gjörða sinna sem eru stórvægilegar ef við lítum yfir allan pakkan þ.e. árásinn á hagkerfið sem öllum verður ljós, þessari vel undirbúnu tilraun til að innlima landið í evrópusambandið að undangengini efnahagsárás mun ljúka með því að þeir verða hýddir obinberlega sannleikurinn kemur á meiri hraða en þeir geta flúið á

[Haraldur Hansson, 30.7.2011 kl. 00:43]

Eru skilyrðin afdráttarlaus? Hér eru nokkur dæmi úr textanum:

• ... leitað eftir eins víðtæku forsvari í hagsmunagæslu í sjávarútvegi á alþjóðavettvangi og kostur er lúti málefni að íslenskum hagsmunum.
• ... haldið í möguleika á því að takmarka fjárfestingar erlendra aðila í íslenskum sjávarútvegi
• .. telur að raunhæf leið til að tryggja forræði íslenskra stjórnvalda
• mikilvægt að leggja áherslu á meginreglur hafréttarsáttmála Sameinuðu þjóðanna
• ... afar mikilvægt að Íslendingar fari með samningsforræði við stjórn veiða úr deilistofnum
• ... nauðsynlegt er að þrýsta á um að samningum verði lokið um aðra stofna.
• ... telur rétt að látið verði reyna á það í hugsanlegum samningaviðræðum við ESB að Ísland haldi forræði sínu á þessum sviðum

Ef þetta átti að vera "afdráttarlaust" átti ekki að leita eftir, halda í möguleika eða telja raunhæft. Og það átti að sleppa orðunum "að þrýsta á um" og strika út " telur rétt að látið verði reyna á það".

Þegar Össur fær svona hálfkák verður það hættulegt vopn gegn þjóðinni í höndum hans. Þetta átti einmitt að vera miklu afdráttarlausara.

[Gunnar Heiðarsson, 30.7.2011 kl. 08:33]

Það getur verið að hugarheimur Össurar sé svo sýktur að hann telji slíkt orðalag heimila að farið sé kringum staðreyndir.

Reyndar voru ummæli hans í vor, þar sem hann sagðist þurfa að passa sig hversu langt hann gæti farið gegn vilja Alþingis, á þann veg að öllu er trúandi upp á hann.

Maðurinn er stórhættulegur!