Þeim fækkar óðum sem láta lokkast af tálbeitunni

Stuðningur við ESB hefur lengi byggst á áróðrinum fyrir evru sem nýjum gjaldmiðli. En æ fleiri sjá nú að ekki er allt gull sem glóir. Evrusvæðið hefur einmitt kallað hrikaleg vandamál yfir mörg aðildarríki ESB, einkum á jaðrinum. Mikill meirihluti landsmanna virðist telja að evran lokki ekki lengur.

 

Í könnun sem Stöð 2 og Fréttablaðið stóðu fyrir var íslensku krónunni stillt upp á móti öllum öðrum valkostum um gjaldmiðil, sbr. aðalfyrirsögn blaðsins s.l. fimmtudag. Fólk var beðið að taka afstöðu til þess hvort krónan ætti að vera framtíðargjaldmiðill þjóðarinnar eða einhver önnur mynt.

 

Meirihlutinn eða 50,3% valdi krónuna. Í frásögn sinni af könnuninni lagði blaðið höfuðáherslu á: „Þjóðin er klofin um framtíð krónunnar“  en gat þess ekki hvað fólk vildi í staðinn ef það fórnaði krónunni. Aðalfréttin er þó, að langflestir völdu krónuna fremur en evru. Að sjálfsögðu hefur margoft komið fram að fólk hefur mjög mismunandi skoðanir á því, hvað ætti að koma í staðinn fyrir íslensku krónuna ef skipt væri um mynt. Sumir vilja evru, aðrir dollar, pund, norska krónu o.s.frv. Óljóst er hvort blaðið spurði um þá hlið málsins. En hvort sem það var eða ekki er ljóst að Fréttablaðið vill ekki draga fram þessa meginstaðreynd, að óskadraumur ESB-sinnanna, evran, nýtur miklu minni stuðnings en krónan sem framtíðargjaldmiðill.

 

Þegar skoðaðar eru hliðstæðar kannanir frá liðnum árum er ljóst að stuðningur við íslensku krónuna fer jafnt og þétt vaxandi. Enda þótt Samfylkingin og forystumenn ASÍ  reyni ár eftir ár að hrópa krónuna niður hefur stuðningur við krónuna sífellt aukist seinustu fjögur árin eða úr 38% í ríflega 50%. Æ fleiri átta sig á þeim hörmungum sem evran hefur valdið, ekki síst á jaðri evrusvæðisins. Meðan Fréttablaðið forðast að upplýsa um þessa hlið könnunarinnar er von að menn velti því fyrir sér eins og gert var í fyrradag á heimssyn.blog.is: Er kannski norska krónan eða Kanadadollarinn orðin vinsælli á Íslandi en óskamyntin, evran? - RA