Sjávarútvegsráðherra verður að standa af sér hótanir ESB í makríldeilunni

„Ég verð að lýsa yfir vonbrigðum mínum með það að hótanir um viðskiptaaðgerðir séu á ný í umræðunni. Slíkar aðgerðir væru ólögmætar og það ýtir ekki undir jákvæðan framgang viðræðna að draga þær inní umræðuna,“ segir Sigurður Ingi Jóhannsson sjávarútvegráðherra  um  yfirlýsingar Mariu Damanaki sjávarútvegsstjóra Evrópusambandsins í makríldeilunni.

Ósáttur við hótanir ESB

Nú er komið að sjávarútvegsráðherra  Sigurði Inga Jóhannssyni að gefa út upphafs aflamagn fyrir íslensk fiskiskip í makríl á þessu ári. Margur myndi segja þótt fyrr hefði verið. Skip og bátar þurfa að geta undirbúð sig undir veiðar í vor og vita að hverju þeir ganga í heildarafla. Miklir hagsmunir eru í húfi .  Miðað við hlutdeild Íslendinga í heildarveiðum á makríl undanfarin ár ætti það magn ekki að vera undir 170- 180 þús. tonnum.

Þrátt fyrir auknar veiðar hefur stofninn margfaldast að stærð og vísindamenn viðurkenna að erfitt er að meta heildarstærð stofns, sem er í svo örum vexti og færir sig hratt inn á ný beitilönd.

Eitt er að deila um skiptingu á veiðum úr stofni sem ná þarf samningum um samkvæmt alþjóðlegum réttindum og skyldum strandríkja . Hitt er fullkomlega óréttlætanleg framkoma að ganga til samninga innan jafn rétthárra ríkja með ólögmætar hótanir, sem beitt er  í krafti stærðarmunar.

„Þið hafið fjóra daga til að ganga að okkar tilboði annars…“  hótar „pólitíið í Brussel“  í dag.

Staðreyndin er sú  erfitt hefur reynst að fá fulltrúa ESB til samstarfs um rannsóknir á stærð og útbreiðslu makríl stofnsins eða  gefa upp raunverulegar veiðitölur ESB ríkjanna að brottkasti meðtöldu. Nýjustu rannsóknir sýna einmitt að veiðitölur ESB ríkjanna eru fjarri raunveruleikanum og má margfalda skráðan afla þeirra með 1,7- 3,6. Himinn og haf er milli gagna og stofnmats. 

 Mikið og vaxandi magn makríls í íslenskri lögsögu

Aldrei hefur mælst meira magn af makríl í íslenskri lögsögu en á síðastliðnu ári eða liðlega 1.5 milljón tonna. Er það fjórða árið í röð sem makríllinn mælist yfir milljón tonn í lögsögunni. Heildarvístala makríls á því svæði sem rannsakað var í sumar reyndist um 8.8 milljónir tonna, þar af um 17% innan íslensku lögsögunnar. Er það álíka magn og mældist inna færeysku lögsögunnar. Þótt svæðið sem var rannsakað í sumar sé stærra en undanfarin ár er fjarri því að mælingarnar hafi náð yfir allt útbreiðslusvæði makríls . Niðurstöður rannsóknanna sýna að makrílstofninn er í örum vexti og útbreiðslusvæði hans stækkar og göngurnar færast  norðar og vestar.

Makríllinn fer eins og „ryksuga“ í nýjum beitilöndum

Makríllinn er ekki í neinni kurteisisheimsókn við Íslandstrendur, heldur er hann að leggja undir sig nýjar beitilendur: „Stofn eins og makríll, sem fer vítt og breitt og étur mikið getur unnið svæðisbundinn skaða ef hann fer yfir viðkvæmt svæði á viðkvæmum tímum. Makríllinn er mjög þurftafrekur, hefur hröð efnaskipti og fitnar hratt á skömmum tíma í fæðugöngunni“, segir forstjóri Hafrannsóknastofnunar í viðtali við mbl. 30. ágúst sl. Talið er að makríllinn auki þyngd sína um meira en 40% meðan hann er hér við land. Það er gríðarleg þyngdaraukning. Menn geta sér til um að hann þurfi að éta 2-3 milljónir tonna af sjávarfangi. „ það er augljóst að þegar kominn er nýr gestur sem tekur til sín 2-3 milljónir tonna af lífmassa þá minnkar framleiðslugeta annarra fiskstofna ef fæðunám skarast.“ Það getur leitt til staðbundinna áhrif á vöxt t.d. seiða þorsks og loðnu.

Eðlilegt er að Íslendingar taki nú upp nánari viðræður og samstarf við Færeyinga og Grænlendinga um rannsóknir og veiðar á makríl  á hafsvæðum ríkjanna. - JB

Athugasemdir

[Bjarni Jónsson, 30.1.2014 kl. 21:40]

Ég er sammála öllu, sem stendur í þessum pistli á Vinstri vaktinni.  Greinin er vel grunduð og rökstudd.  Til að stuðla að jafnvægi lífríkisins í íslenzku lögsögunni væri eðlilegt að ákvarða veiðiheimild þar 170-200 kt árið 2014.  ESB á ekki að komast upp með að deila og drottna yfir fiskveiðunum.  "Divide et impera" er ekki á valdi Maríu Damanaki. 

Með góðri kveðju /

[Helgi Jónsson (IP-tala skráð) 31.1.2014 kl. 10:51]

"

Telja að Ísland og Færeyjar fái 23% kvótans

Makrílveiðar á Vigra RE 71. mbl.is/Árni Sæberg

Það ber lítið í milli deiluaðila í makrílviðræðunum, en viðræður Íslands, Færeyja, Evrópusambandsins og Noregs halda áfram í Björgvin í Noregi í dag. John Spencer, formaður samninganefndar ESB, segir í samtali við Fiskeribladet Fiskaren í Færeyjum að það skilji aðeins 0,6% á milli deiluaðila"

Eru þá ekki allir sáttir...???....já það er gott að eiga ESB sem viðsemjanda