Veitum nýju stjórninni aðhald í ESB málum

Þó svo að við ESB andstæðingar hér á Vinstri vaktinni sem annars staðar í þjóðfélaginu getum fagnað áfangasigri í ESB málinu við myndun þessarar ríkisstjórnar Sjálfsstæðis- og Framsóknarflokks. Þó dugir ekki að leggja árar í bát. Lausatök og hálfvelgja í stjórnarsáttmálanum og misvísandi og loðnar yfirlýsingar nýrra ráðamanna vekja ugg í brjósti, svo ekki sé meira sagt.

Augljóst er að það að gera „hlé" á viðræðunum eins og það er látið heita er langt í frá að uppfylla lágmarks vilja og óskir okkar og það er heldur í engu samræmi við sjálfar samþykktir flokkanna og vilja mikils meirihluta stuðningfólks þessara flokka. Síðan virðist málið liggja í lausu lofti í einhverskonar tómarúmi og að nú dugar þögnin og afstöðuleysið þeim ekki lengur. Forystumenn ríkisstjórnarflokkana virðast vera  hræddir við að taka á málinu og framfylgja því eins og þeir voru þó kosnir til.

Ríkisstjórnin og nýr utanríkisráðherra verða að sýna af sér að þeim sé einhver alvara með að standa við skýr stefnumið þessara flokka í ESB málinu.

Hvernig ætla þeir að leysa upp Samfylkingarskipaða Samninganefnd Íslands í ESB málinu?

Hvernig ætla þeir að stöðva alla aðlögunarstyrki, þ.e. þessa svo kölluðu IPA styrki, sem notaðir hafa verið til þess að liðka fyrir aðildar- og aðlögunarferlinu?

Hvað með Evrópustofu, þessa áróðursbúllu sem með hundruðum milljóna styrkjum frá Stækkunar- og útbreiðsludeild Evrópusambandsins heldur hér úti linnulausum einhliða áróðri fyrir ESB aðild? 

Óheft starfssemi og peninga austur þessararar áróðursstofu er beinlínis til þess að hafa áhrif á íslensk innanríkismál og er sem olía á eld þess ósættis og sundrungar sem þessi ESB umsókn hefur valdið meðal þjóðarinnar.

Það á að fagna allri opinni og upplýsandi umræðu milli fylgjenda og andstæðinga ESB aðildar og félagasamtaka þeirra sem og annarra íslenskra aðila sem málið varðar . En það er ójafn leikur þegar annar aðilinn fær forskot að auki með því að hafa nánast óheft fjármagn til þess að reka hér einhliða áróður um glansmyndir ESB aðildar.  

Sjálfsstæðisflokkurinn ályktaði réttilega mjög sterkt gegn ESB stofu og Framsóknarmenn ályktuð einnig skýrt gegn starfssemi svona erlendra áróðurs apparata í aðdraganda þessara kosninga. Engum duldist að þar var beint átt við ESB stofu.

En deigir forystumenn beggja flokkanna létu ESB sinnað fjölmiðlastóðið með RÚV í broddi fylkingar fæla sig frá málinu. Þessir fjölmiðlar fóru beinlínis hamförum gegn þessum lýðræðislegu samþykktum flokkanna, en þó meira Sjálfsstæðisflokksins. Af þeim var öllu snúið á haus og látið líta þannig út að með þessum andmælum við Evrópustofu væru þeir á einhvern hátt að reyna að stöðva opna og lýðræðislega umræðu um ESB málið. Sem er auðvitað fjarri öllum sanni. Það má miklu frekar færa fyrir því sterk rök að ef óheft fjármagn erlendis frá er óátalið leyft með þessum hætti að hafa hér einhliða áhrif á skoðanamyndun íslendinga þá sé einmitt það frekleg inngrip í innanríkismál og sjálfsstæði þjóðarinnar og brot á lýðræðis- og jafnræðisreglum.

Utanríkisráðherra þyrfti því ekki að gera annað en að segja kurteislega að íslensk stjórnvöld óskuðu ekki eftir því að ESB blandaði sér með þessum óviðeigandi hætti í viðkvæm íslensk innanríkismál. Slík tilmæli nýrrar ríkisstjórnar Íslands væru því í fullu samræmi við stefnu ríkisisstjórnarflokkanna beggja og einnig íslensk lög svo og alþjóða lög og reglur, þar á meðal Vínarsáttmálann.

Annars er þessi fjáraustur og ójafna aðstaða ESB stofu, tvíeggja sverð fyrir þá sjálfa. Því að íslendingar eru flestir það vel upplýstir og þannig gerðir að þeir sjá í gegnum svona yfirborðslegan einhliða áróður og hégóma og því skilar þessi fjáraustur í raun litlu og fer fljótlega að virka öfugt.

Fólk lætur ekki svo glatt kaupa skoðanir sínar í þessum málum.

Auk þess sem það er umhugsunarefni að allur þessi fjáraustur ESB stofu er kostaður beint af skattgreiðendum Evrópusambandslandanna sem eru að berjast við gríðarlegt atvinnuleysi og samdrátt sem nú hefur orðið að verstu efnahagslægð frá lokum Síðari heimsstyrjaldarinnar. Skatthækkanir og blóðugur niðurskurður almennings í Evrópusambandslöndunum er með þessum blygðunarlausa hætti notaður til þess að fjármagna útþenslu og áróðursstarfsemi ESB á Íslandi.

Ólíklegt er að tugmilljónir atvinnulausra og fátækra í Evrópu kæri sig nokkuð um svona yfirgengilega sóun og bruðl á almannafé. En spyr Brussel valdið það fólk? Nei það er sjálftökuliðið og elíta Evrópusambandsins sem hefur hannað alla refisstigu valdsins að sínum sérhagsmunum ? 

Sjálfssagt er að veita ríkisstjórninni eitthvað svigrúm í þessum málum, en samtök andstæðinga ESB aðildar hérlendis geta ekki beðið lengi með að veita íslenskum stjórnvöldum sjálfsagt aðhald í þessum málum.

Þar mæðir auðvitað mest á Heimssýn stærstu fjöldasamtökum andstæðinga ESB aðildar. Þörfin fyrir sterk og öflug félagasamtök eins og Heimssýn hefur líklega aldrei verið meiri en einmitt nú.

Samtök okkar aðildarandstæðinga mega aldrei sofna á verðinum eða gefa eftir í baráttunni gegn ESB innlimun, eða verða meðvirk með síkvikum og svikulum stjórnmálaflokkunum, skiptir þar engu hver þeirra á í hlut.  

Segjum: NEI við ESB ! /GI

Athugasemdir

[Ómar Bjarki Kristjánsson, 28.5.2013 kl. 12:22]

Já. Málið liggur sem sagt þannig, að svokölluðuð ,,vinstri" vakt gegn ESB ærist af fögnuði þegar hægri-öflin ná tökum á þjóðfélaginu og getur farið að moka feitu bitunum úr þjóðarkjötkatlinum uppá sinn elítudisk á kostnað almennings sem mun þurfa að bera þyngri byrðar vegna feitu kjötbita ofáts hægri-aflanna.

Þetta er nú talsvert merkilegt. Eg sé ekkert mikið ,,vinstri" við þetta.

Og væri þessari síðu sæmara og siðlegra að hætta að tylla svona heitum eins og ,,vinstri" á sig og þeirra framgangur til hagsbóta fyrir hægri-elítuna hérna í landinu í þeim tilgangi a berja á almenningi og hinum verr settu er umræddri síðu á ábyrðarmönnum hennar til eilífrar stórskammar.

[Hilmar (IP-tala skráð) 28.5.2013 kl. 18:33]

Já Ómar, ástandið vinstra megin er orðið óbærilegt, ef vinstrimenn þurfa að leita til hægrimanna til að verja fullveldið.

Það eru engin not fyrir vinstriflokka sem nota hvert tækifæri til þess að tala niður eigin þjóð, mynt og framtíðarmöguleika. Auðvitað getur enginn vinstrimaður með sjálfsvirðingu kosið slíka aumingja, sem ekki treysta sér til þess að leiða þjóðina, stolta, frjálsa og fullvalda.

Það eru því tveir möguleikar fyrir alvöru vinstrimenn, að kjósa ekki (og eiga það á hættu að innlimunarsinnar nái meirihluta á Alþingi) eða kjósa hægrimenn sem vernda fullveldið.

Það er enginn mannsbragur á því, kútur minn, að ráðast á VV fyrir það eitt að geta ekki treyst eða kosið innlimunaflokka, og þurfa að treysta á pólitíska andstæðinga. Nær væri að sýna VV, og öðrum alvöru vinstrimönnum, samúð og hluttekningu. Þetta eru fremur vond örlög.

[Elle_, 28.5.2013 kl. 21:08]

Og það er miklu-minni-hlutinn sem fær ranglátt forskot með nánast óheft fjármagn og heilt veldi á bak við sig, grafandi saman undan innanríkismálum og utanríkismálum fullvalda ríkis.  Nokkur þeirra fá enn að hanga í alþingi, ódæmd.  Meðan pínulitlir fjallamenn ráðast á Vinstrivaktina fyrir annarra manna syndir.

Svo skil ég ekki alveg hvaða feedback það er sem við ættum að þurfa frá Brussel hvað fullveldismálum okkar viðkemur, þó ég hafi nú verið að bíða þolinmóð að heyra það.  Nú fyrir utan skömmina að taka af fjársveltum þjóðum lífsnauðsynlega peninga.  Fyrir hvað?