Með hvaða hætti verður botni slegið í aðildarferlið?

Ný ríkisstjórn á einkum um tvennt að velja: að afturkalla umsóknina með formlegri tilkynningu til ESB eða hætta viðræðum án formlegrar afturköllunar og leggja málið til hliðar með því fororði að viðræður verði því aðeins hafnar að nýju ef fyrir liggi vilji meiri hluta þjóðarinnar til inngöngu í ESB.

Fyrri leiðin er skýr og afdráttarlaus og er tvímælalaust besti kosturinn. Seinni leiðin er sú sem æðstu stofnanir Sjálfstæðís- og Framsóknarflokks hafa samþykkt. Í báðum tilvikum yrði gerð ítarleg skýrsla um stöðu viðræðnanna en síðan færi fram þjóðaratkvæðagreiðsla einhvern tímann á kjörtímabilinu um þá spurningu hvort Íslendingar vilji eða vilji ekki ganga í ESB.

Utanríkisráðherra hefur átt í viðræðum við forystulið ESB í þrjú ár ásamt samninganefnd sem hann sjálfur skipaði. Hann hefur þó ekki getað sýnt fram á að nokkuð annað sé í boði fyrir Íslendinga en mörg þúsund blaðsíðna regluverk ESB ásamt ákvæðum EES-samningsins, svo langt sem hann nær. Allar yfirlýsingarnar um mikilvægar sérlausnir hafa reynst úr lausu lofti gripnar. Að sjálfsögðu verður því seint trúað að forystulið ESB hefði ekki getað stunið því upp á liðnum árum ef eitthvað væri í boði sem máli skiptir af þeirra hálfu annað en regluverk ESB.

Jón Bjarnason, fyrrverandi ráðherra VG hefur margoft bent á að svokallaðar samningaviðræður felast fyrst og fremst í því, að Ísland lýsi yfir hvenær og hvernig það ætli að taka upp reglur, reglugerðir og regluverk ESB, og hvenær og hvernig það ætli að breyta ýmsum lögum. Áður en mögulegur samningur verði undirritaður þurfi að liggja fyrir að Ísland sé búið að uppfylla hann og breyta sínu samfélagi, fyrir utan einhver minniháttar atriði sem tímabundinn frestur er veittur til að aðlaga. Því sé ekki um eiginlegar samningaviðræður að ræða heldur einhliða aðlögun Íslands að regluverki ESB.

Þess vegna sé það jafnframt rangnefni og viðleitni til að afvegaleiða fólk þegar spurt sé í skoðanakönnunum hvort fólk vilji ljúka samningaviðræðum til að sjá endanlegan samning og kjósa um hann. Verði viðræðurnar kláraðar verði Íslendingar búnir í raun að stíga langflest skref sem þarf til að ganga inn í Evrópusambandið. Miklu eðlilegra sé að spyrja fólk hvort það vilji ganga inn í ESB eða ekki.

Jafnframt hefur Jón minnt ítrekað á og nú seinast í útvarpsviðtali í aðdraganda kosninganna að til standi að veita milljörðum úr sjóðum ESB til að reyna að hafa áhrif á skoðanir Íslendinga. Það sé ólýðræðislegt og eigi að sjálfsögðu ekki að líða. - RA

Sigmundur fundar með Katrínu

Athugasemdir

[Rafn Guðmundsson, 1.5.2013 kl. 15:43]

ra - það eru bara kjánar sem halda að hægt sé að kjósum um esb aðild án þess að klára umsóknina.

[Halldór Björgvin Jóhannsson, 1.5.2013 kl. 16:19]

Vertu ekki með þetta rugl Rafn, þessi svokallaði samningur sem er verið er að vinna í til að kjósa um er lygi frá a til ö, það eina sem er í gangi í umsóknarferlinu er aðlögun, samingurinn umtalaði er nú þegar til og er hann regluverk ESB í heild sinni, við þurfum ekki að klára aðlögunina til að vita hvað regluverk ESB inniheldur, við þurfum bara að lesa það og ESB sinnar þurfa að hætta þessum lygaáróðri að það sé ekki hægt að ákveða sig fyrr en búið er að aðlaga landið að ESB.

Það er hægt að kjósa um þetta mál nú þegar því allar upplýsingar um ESB eru til og aðgengilegar hverjum sem er, einu fólkið sem virðist halda annað eru íslenskir ESB aðildarsinnar, ESB sjálft er ekkert að reyna fela neitt.

Þessi endalaus lygaáróður ykkar aðildarsinna hér á Íslandi er orðinn vel þreyttur, ESB sjálft er búið að benda ykkur á að meirihluturinn af ruglinu sem frá ykkur kemur er ekkert annað en það, rugl og lygi.

[Ásthildur Cesil Þórðardóttir, 1.5.2013 kl. 16:31]

Hárrétt, hér er alls ekki um neinn samning að ræða heldur innlimun upp á hundrað þúsund blaðsíður af regluverki ESB, með engum varanlegum undanþágum, nema einverjum smávegis tímabundnum.  Það hefur verið staðfastlega logið að þjóðinni allann þennan tíma, og mál að rannleikurinn verið útskýrður fyrir fólki. 

[Kolbrún Hilmars, 1.5.2013 kl. 19:02]

Rafn spilar sig heimskari en hann er.  Gæti þess vegna verið Ásmundur sjálfur undir nýju nikki og nýrri athugasemda-aðferðafræði. 

En það er bara ein leið til þess að ljúka þessu ESB-aðildarumsóknarbráðræði; að Alþingi láti það verða sitt fyrsta verk að afturkalla umsóknina.

Alþingi hóf leikinn - Alþingi á líka að blása leikinn af.

[Rafn Guðmundsson, 1.5.2013 kl. 19:32]

"allar upplýsingar um ESB eru til" - ekki rétt halldór OG þú veist það líka. þess vegna eru samningar

[Hilmar (IP-tala skráð) 1.5.2013 kl. 19:44]

Hann er skýr þjóðarviljinn, meirihlutinn kaus flokka andstæða ESB, og Alþingi ber að virða þennan þjóðarvilja. Aðlöguninni skal hætt strax, og ekki síðar en strax.

Síðan legg ég til að maður nefndur, Jón Bjarnason, verði gerður að heiðurs- alþingismanni, og sendiherra Íslands hjá ESB.

[Halldór Egill Guðnason, 1.5.2013 kl. 22:39]

"Allar yfirlýsingarnar um mikilvægar sérlausnir hafa reynst úr lausu lofti gripnar"

Það verður nú að segjast eins og er, að þú kemst snilldarlega að orði, Ragnar Arnalds, þá er þú afgreiðir Össur Skarphéðinsson sem lygara. Ekki nokkur einasta leið að orða þetta á smekklegri hátt, enda ávallt talið til óhæfuverka að stríða kjánum. Þakka annars þrælgott, málefnalegt og hnitmiðað andóf gegn Brusselruglinu. Hafð þú og samstarfsfólk þitt miklar þakkir fyrir. Það væri þessari þjóð vænlegast ef hægt væri nú að ná jafn þverpólitískri samstöðu um endurreisnina sem framundan er, eins og náðst hefur í sameiginlegri þverpólitískri andstöðu um inngöngu í Euro ruglið. Að sjálfsögðu eru ekki allir sammála, en það skiptir engu máli. Vilji meirihlutans er skýr. Hinn háværi minnihluti hefur goldið afhroð og verður barasta að sætta sig við það, þó undan svíði.

[Ásthildur Cesil Þórðardóttir, 2.5.2013 kl. 08:23]

Tek undir orð Halldórs Egils hér, hafið þökk fyrir ykkar góðu baráttu.