Látum ekki flækja okkur frekar í vandræðaástandið í ESB!

Tólf prósent fólks á evrusvæðinu eru án atvinnu og hafa aldrei verið fleiri. Atvinnuleysi meðal ungs fólks heldur áfram að aukast og í febrúar voru 23,5 prósent fólks undir 25 ára án vinnu. Vandinn er mestur í Suður Evrópu; atvinnuleysi meðal ungs fólks nálgast 60% í Grikklandi, er yfir 55% á Spáni.

 

Þetta eru staðreyndir sem stjórnmálaleiðtogar hljóta að hafa í huga þegar þeir marka stefnu nýrrar ríkisstjórnar. Í Morgunblaðinu 23. apríl s.l. birtist athyglisverð frásögn Þorleifs Gunnlaugssonar, varaborgarfulltrúa í Reykjavík, um samtöl sem hann átti nýlega við embættismenn ESB í Brussel og forystumenn þar á ýmsum sviðum. Hann sagði þar m.a. frá samtölum við Sarah King sem „er ráðgjafi á sviði vinnumarkaðsmála hjá Samtökum evrópskra verkalýðsfélaga, ung kona, full af eldmóði og óþrjótandi viskubrunnur um stöðuna í Evrópusambandinu. Sarah var ómyrk í máli um félagslega stöðu almennings og gríðarlegan niðurskurð sem verst kemur niður á þeim sem síst skyldi.

 

Tólf prósent fólks á evrusvæðinu eru án atvinnu og hafa aldrei verið fleiri. Atvinnuleysi meðal ungs fólks heldur áfram að aukast og í febrúar voru 23,5 prósent fólks undir 25 ára án vinnu. Auk þessa sagði Sarah að um væri að ræða mikið dulið atvinnuleysi sem kæmi til dæmis fram í því að fólki sem væri að koma úr námi væri víða meinað að fara á atvinnuleysiskrá og hún bætti við að það væru meiri líkur á því að atvinnuleysi muni halda áfram að aukast frekar en að minnka.

 

Félagslegt neyðarástand innan ESB

 

Sarah tók svo djúpt í árinni að segja að það væri varla hægt að tala lengur um kreppu innan ESB. Það væri nær sanni að segja að þar ríkti félagslegt neyðarástand og hún bætti því við að um alla Evrópu hefði orðið sprenging í fjölgun fátækra og ójöfnuður væri að aukast. Sarah telur að aðgerðir Evrópusambandsins muni leiða til versnandi ástands í Evrópu hvað þessi mál varðar.

Vandinn er mestur í suðurhluta Evrópu og skráð atvinnuleysi meðal ungs fólks nálgast 60% í Grikklandi, er yfir 55% á Spáni og sjálf framkvæmdastjórn Evrópusambandsins hefur sagt tölurnar vera harmleik fyrir Evrópu. Haft var eftir Martin Schulz, forseta Evrópuþingsins, nýlega: „Evrópa hefur sett mörg hundruð milljarða evra í að bjarga bankakerfi álfunnar, en gæti tapað heilli kynslóð ungs fólks í kjölfarið.“ Schulz bætti við að úr því að hægt hefði verið að setja 700 milljarða í bankakerfið, þá ætti að vera hægt að setja jafn mikla fjármuni í að koma kynslóð ungs fólks, sem hefur jafnvel aldrei fengið tækifæri til að vinna, til aðstoðar.

En vandans gætir líka norðar og Sarah var tíðrætt um niðurskurð á velferðarkerfinu á Bretlandseyjum en samkvæmt nýlegri skýrslu hefur sá niðurskurður sem fylgir evrópsku fjármálakreppunni komið verst niður á fötluðum einstaklingum sem eru háðir ríkisstyrkjum og félagslegri aðstoð frá sveitarfélögunum.

 

Vill ASÍ enn draga Ísland inn í neyðarástandið á evrusvæðinu?

 

Alþýðusamband Íslands hefur leynt og ljóst unnið að inngöngu Íslands í Evrópusambandið og forystan talað ákaft í þá veru. Stefna ASÍ í alþjóðamálum snýst nær eingöngu um Evrópusamvinnu og þar segir: „Það er skoðun ASÍ að yfirlýsing um að sótt verði um aðild Íslands að ESB og upptöku evru sé eina færa leiðin fyrir þjóðina. Í stefnunni segir ennfremur: ...að mati ASÍ snýst Evrópusamstarfið um nær allt okkar þjóðlíf. Þar má nefna málaflokka eins og félags- og vinnumarkaðsmál, neytendamál, menntamál, rannsóknir og þróun auk umhverfismála ... ASÍ á aðild að Samtökum evrópskra verkalýðsfélaga ef marka má þá góðu konu, Söruh King. Það eru því hæg heimatök fyrir forystumenn Alþýðusambandsins að leggja þá spurningu fyrir þennan ágæta ráðgjafa á sviði vinnumarkaðsmála innan ESB, hvort hún telji það eftirsóknarvert fyrir íslenskt lágtekjufólk, að Ísland sæki um aðild að Evrópusambandinu, miðað við þær aðstæður sem þar ríkja í dag.“

Ætlar að ræða við alla formenn