VG út úr ESB skápnum

Vinstri hreyfingin grænt framboð hélt landsfund sinn um helgina og gerði um leið út um þá ávinninga sem flokkurinn átti í vændum fyrir að hafa skipt um formann. Í fyrstu var mjög um það talað að ásýnd forystunnar yrði öll mildari og viðkunnanlegri. Það féll um sjálft sig þegar Björn Valur Gíslason var kjörinn varaformaður. Steininn tók þó úr þegar kom að ályktunum flokksins.

Jafnvel hin evrópusinnaða fréttastofa Ríkisútvarpsins stóðst ekki mátið í gærkvöldi að skensa nýkjörinn formann VG þegar í kynningu fyrir viðtal var sagt að Katrín ætlaði sér að berjast fyrir því að ljúka aðildarviðræðum við VG. Ástæðan var samþykkt kostulegrar ályktunar þar sem kveðið var á um að aðildarviðræðum skyldi lokið.

Landsfundur VG telur að Íslandi sé best borgið utan ESB en vill ljúka aðildarviðræðum við ESB og setja ferlinu tímamörk, t.d. eitt ár frá kosningum. Þjóðin kjósi síðan um niðurstöður aðildarviðræðna. VG mun ennfremur beita sér fyrir því að tryggðar verði breytingar á stjórnarskrá þannig að þjóðaratkvæðagreiðslan um ESB verði bindandi en ekki aðeins ráðgefandi.

Þá hafði sama fréttastofa nokkrum sinnum gantast með að flokkurinn samþykkti að ekki skyldi í Evrópusambandið þó svo að því fylgdu gull og grænir skógar. Í gegnum alla frásögnina skín að meirihluti fundarmanna vill í ESB og trúir því að því fylgi hinar mestu gersemar. En til þess að halda í örlítið fylgi fram yfir kosningar er farið með gömlu þuluna sem flokkurinn var stofnaður um, að hag Íslands sé betur borgið utan ESB. Þessi þula er þó að verða eins skrattinn úr sauðarlegg.

Ef skoðuð er ályktunin hér að ofan er hún með miklum endemum. Fundurinn vill setja ferlinu tímamörk og síðan segir „t.d. eitt ár frá kosningum." Einn af fastagestum Vinstri vaktarinnar og mikill ESB sinni sem kallar sig Ásmund segir um þetta atriði í innleggi í gær:

VG geta auðvitað ekki gefið neinn frest til að ljúka viðræðum því að það er ómögulegt að segja fyrir um hve langan tíma það tekur.

Það er rangt að fresturinn sé bundinn við eitt ár. "Til dæmis eitt ár" gæti vel orðið tvö ár. Og auðvitað verður þeim ekki slitið ef reyndin verður sú að tvö ár nægja ekki.

Þá er niðurlag ályktunarinnar enn kostulegra þar sem tekið er fram að gerð verði breyting á stjórnarskrá nú korteri fyrir kosningar. Eða er það í alvöru svo að formaður VG muni nú fyrir þinglok beita sér fyrir nefndri breytingu á stjórnarskránni! Það er þá ekki seinna vænna en að hún komi fram í vikunni og verði keyrð í gegnum Alþingi með afbrigðum. Komi tillagan ekki fram fyrir en eftir kosningar getur engin breyting orðið á stjórnarskránni fyrr en eftir þarnæstu kosningar og þá verður nú búið að teygja þetta „til dæmis eina ár" upp í fimm.

Eða er þessi tillaga aðeins orðuð svona til þess að sýna okkur að Vinstri hreyfingin grænt framboð er algerlega heillum horfin. /-b.

Athugasemdir

[Elle_, 25.2.2013 kl. 12:44]

Lygavaðallinn í forystu þessa flokks er alveg ótrúlegur.  Svo er Katrín ekkert mildari en Steingrímur mikli, ekki einu sinni á svipinn, svo það komi fram.  Það er með ólíkindum að hún skuli hafa komist svona langt.

[Ásmundur (IP-tala skráð) 26.2.2013 kl. 08:08]

Vg sýndi staðfestu og ákvað að breyta engu.

Enn er flokkurinn á móti aðild og hlynntur því lýðræðislega ferli að þjóðin fái kost á að kjósa um aðild þegar samningur liggur fyrir. Slík virðing fyrir lýðræðinu er lofsverð.

Ákvörðun Sjálfstæðismanna um að slíta viðræðunum er þegar farin að valda sjálfstæðismönnum vandræðum. Hver á fætur öðrum reyna þeir nú að afneita því sem samþykkt var.

Þegar aðildarviðræðum er slitið er það endanlegt.  Ef menn vilja hafa möguleika á að taka þær upp aftur er þeim slegið á frest eftir samráð við ESB. Það er því ljóst að sjálfstæðismenn vilja endanleg slit á viðræðum.

Ákvæðið um að viðræðurnar verði ekki teknar upp aftur nema að undangenginni þjóðaratkvæðagreiðslu er augljóslega ætlað að blekkja þá sem geta ekki sætt sig við þessa ólýðræðislegu ákvörðun.

Það er auðvitað ekki stjórnvalda í dag að taka ákvörðun um hvernig skuli staðið að aðildarumsókn eftir td 20 ár.

Hanna Birna og Styrmir halda því bæði fram að þjóðaratkvæðagreiðsla eigi að fara fram þó að það sé þvert á það sem var samþykkt á landsfundinum. 

Svar við fyrirspurn á landsfundinum staðfesti að í samþykktinni fælist ekki að þjóðaratkvæðagreiðsla um umsókn ætti að fara fram heldur aðeins að ekki væri hægt að sækja um aðild nema þjóðin hefði samþykkt það fyrst. 

Nú verður fróðlegt að sjá hve margir hætta stuðningi við Sjálfstæðisflokkinn.l

[Rafn Guðmundsson, 26.2.2013 kl. 08:48]

skynsamur flokkur vg

[Skeggi Skaftason, 26.2.2013 kl. 11:04]

VG hóf þetta ferli, sem var lykilatriði í stjórnarsáttmála núverandi ríkissjórnar.

Það væri furðulegt að setja á oddinn að ætla að hætta við verkefnið í miðjum klíðum. Nema VG vilji alls ekki halda áfram stórnarsamstafi eftir kosningar í sama flokkamynstri og nú.

Meirihluti VG-sinna vill nefnilega frekar áframhaldandi ríkisstjórn VG og Samfó, frekar en íhaldsstjórn VG og xD, eins og "Vinstrivaktin" vill.

[Kolbrún Hilmars, 26.2.2013 kl. 15:36]

Það getur nú reynst VG örðugt að halda áfram stjórnarsamstarfi á næsta kjörtímabili í sama flokkamynstri og nú er.    VG mælist með innan við 10% fylgi og það sem eftir lifir af SF með 10-15%.

Ef það er eitthvað sem Vinstri vaktin vill, eða réttara sagt vildi, þá var það að VG hysjaði upp um sig stefnumálin og kosningaloforðin frá 2009.