Maður er nefndur, Eamon Gilmore

Eamon Gilmore vinnur við það að vera utanríkisráðherra Írlands. Það er mikið að gera hjá Eamon Gilmore því hann er einnig aðstoðar-forsætisráðherra Írlands. Eamon Gilmore er reynslumikill stjórnmálamaður, fæddur árið 1955 og hefur setið á írska þinginu (Dáil Éireann) frá því 1989. Hann var ágætlega vinstri sinnaður – en er vart róttækur lengur – og hefur verið leiðtogi írska Verkamannaflokksins frá því 2007. Konan hans heitir Carol og er ágætis manneskja.

 

Eins og flestum mun kunnugt þá eru Írar meðlimir í Evrópusambandinu – og hafa verið frá því árið 1973. Eamon Gilmore byrjaði að skipta sér af stjórnmálum árið 1975 og hefur síðan tekið sleitulaust þátt í stjórnmálastarfi á eyjunni grænu.

 

Vegna þess sem að ofan er talið – og er það aðeins fátt eitt um téðan Gilmore – þá má ýkjulaust halda því fram að Eamon Gilmore viti sitthvað um Evrópusambandið og gangverk þess. Í vikunni tjáði þessi geðþekki írski ráðamaður sig um eðli aðildar að sambandinu. Það var í kjölfar umræðu um að Bretar væru tvístígandi sem aldrei fyrr um þátttöku í þessu apparati skriffinnsku og kúgunnar.

 

Eamon Gilmore sagði eitthvað á þá leið að Írar myndu beita sér af fullum þunga fyrir því að Bretar yrðu um kyrrt í sambandinu. Og hann sagði meira, Eamon Gilmore sagði að Bretar yrðu að taka þátt á öllum sviðum og lúta sömu leikreglum og allar hinar bandalagsþjóðirnar. Og hann sagði meira, hann ýjaði að því að Bretar vildu helst velja það besta úr Evrópu-samstarfinu, og ítrekaði þá um leið að slíkt gengi ekki upp. Og Eamon Gilmore sagði meira, hann sagði að eitt og hið sama yrði yfir öll aðildarríkin að ganga! Og síðan hnykkti hann Eamon Gilmore utanríkisráðherra Írlands á þessu fagnaðarerindi Evrópusambandsins og sagði að það væri útilokað að hafa í gangi 26 eða 27 útgáfur af sambandsaðild!

 

Kannski Össur Skarphéðinsson utanríkisráðherra Íslands ætti að panta tíma hjá Eamon Gilmore og fá hjá honum smá upplýsingar um fúnksjónina í Evrópusambandinu. Útgangspunkturinn gæti verið þessi: Það gengur ekki að það séu í gangi 26 eða 27 útgáfur af sambandsaðild. Og ef Össur Skarphéðinsson skilur það ekki þá er ekki ólíklegt að Eamon Gilmore myndi segja honum að: eitt og hið sama verður yfir öll aðildarríkin að ganga.

 

- gb.

Athugasemdir

[Hilmar (IP-tala skráð) 11.1.2013 kl. 10:20]

Öööh... eiga Írar líka þjóðrembinga, fjármagnaða af LÍÚ?

Magnað annars hvað forráðamönnum í ESB er mikið í mun, að gera lítið úr málflutningi ESB Samfylkinga á Íslandi, með sífelldu tali um að ESB leyfi engar undanþágur.

Og hvernig berum við okkur að, hvernig getum við leyft Samfylkingarfólki að kíkja í pakka sem ekki er til?

[Ásmundur (IP-tala skráð) 11.1.2013 kl. 15:58]

"Maður er nefndur Eamon Gilmore...Konan hans heitir Carol og er ágætismanneskja."

Stórmerkilegt!

Ekki veit ég hvort  27 útgáfur af ESB-aðildarsamningi séu í gangi en þær eru allavega mjög margar.

Finnar og Svíar fengu að veita styrki til landbúnaðar fyrir norðan 62° breiddargráðu, Danir fengu sett bann á að útlendingar gætu keypt sumarhús í Danmörku. Maltverjar fengu sett bann á að útlendingar gætu keypt land á Möltu, svo að aðeins fá dæmi séu nefnd.

Að semja um sérlausnir fyrir Ísland í einstökum atriðum þar sem aðstæður  réttlæta það er auðvitað allt annað en taka aðeins þátt í ESB að hluta eins og Cameron lætur sig dreyma um.

Cameron vill ekki fara úr ESB vegna þess að fullveldisafsalið er mun meira í EES en ESB. Honum líkar ekki að þurfa að taka við tilskipunum frá Brüssel.

Þrælslundaðir Íslendingar með vanmáttarkennd og vænisýki eru á öðru máli. Þeim finnst fátt jafngott og að láta sparka í sig.

Að starfa á jafnréttisgrundvelli þykir mun verra.

[Hilmar (IP-tala skráð) 11.1.2013 kl. 16:31]

Svo þú gengur líka undir nafninu Hörður, Ármundur?

Mikið ertu ríkur, að eiga öll þessi nofn.

Annars, svo maður svari Ásmundi, með því sama og "Herði" var svarað í fyrradag (lét sig víst hverfa, án þess að tjá sig um svörin) þá er það nú svo að Svíar hafa enga undanþágu, og undanþága Finna rennur út á þessu ári. Sem sagt, eftir þetta ár, er stuðningur við landbúnað norðan við 62° bannaður.

Só sorrý, maðurinn með mörgu nöfnin, það er nú ekki meiri lukka með þér í þetta skiptið. Það eru engar undanþágur, og ef Bretar, þetta mikilvæga land fyrir ESB, fær ekki undanþágur, af hverju ættu herrarnir í Brussel að gefa íslenskum? Sérstaklega þegar undanþágur eru alls ekki leyfðar?

[Ómar Bjarki Kristjánsson, 11.1.2013 kl. 22:45]

þetta hefur ekkert að gera með Össur eða aðild Íslands að EU.

Sá írski bendir bara á hið augljósa í stuttu máli. Bretar geta ekkert búið til sína eigin útgáfu af EU.

[Kolbrún Hilmars, 12.1.2013 kl. 18:41]

Er þetta ekki frábært hjá Ómari; bretar geta ekkert búið til sína eigin útgáfu af ESB?

Margoft hafa bretarnir bjargað meginlandinu frá sjálfu sér.  Allt frá Napoleon til Hitlers.  Bretar hefðu einnig getað bjargað A-Evrópu frá Stalín ef þeir hefðu ekki verið orðnir of stríðsþreyttir.

Það er vel við hæfi að bretarnir bjargi meginlandsbúum frá  sjálfum sér enn einu sinni. Ef einhver hefur efni á því að búa til nýja útgáfu af ESB - þá eru það bretar.  Ef þeir nenna!