Hlé á ESB viðræðum og þjóðaratkvæði um framhaldið, er krafa dagsins

Sú ákvörðun meirihluta utanríkismálanefndar Alþingis í liðinni viku að þegar í stað skuli gert hlé á aðildarviðræðum og þær ekki hafnar að nýju nema að fengnu samþykki landsmanna í þjóðaratkvæði boðar mikilvægan viðsnúning í þeim leiðangri inn í ESB sem nú hefur staðið á fjórða ár. 

 

Þingsályktunartillaga meirihluta utanríkismálanefndar kemur ekki til atkvæða á Alþingi fyrr en á nýju ári, en með henni er mörkuð ný stefna og verði hún samþykkt er ríkisstjórnin svipt heimild sinni til að halda viðræðum áfram nema fyrir liggi að þjóðin sé því samþykk.

 

Í greinargerð sem meirihlutinn hefur lagt fram og tekin verður til afgreiðslu á næsta fundi nefndarinnar er einkum lögð áhersla á fjóra þætti málsins:

 

1)      Bent er á að ESB hefur breyst verulega frá því að aðildarumsóknin var afhent, einkum á sviði ríkisfjármála og efnahagsstjórnar og nú sé stefnt að því að framkvæmdastjórn blandi sér inn í fjárlagagerð aðildarríkja og taki sér neitunarvald. Óljóst sé hver verði staða evrunnar í framtíðinni. Endurskoðun sjávarútvegsstefnu ESB standi nú yfir og ljúki ekki fyrr en í fyrsta lagi árið 2014.

2)      Minnt er á hótanir ESB vegna viðræðna um makríl, sbr. nýlega samþykkta reglugerð nr. 1026/2012 frá 25. október s.l. en þar er Íslendingum og Færeyingum hótað refsiaðgerðum. Hótanir um beitingu ólögra viðskiptaþvingana séu sjálfstætt tilefni til að gera tafarlaust hlé á viðræðum um ESB-aðild.

3)      Vísað er til þess að yfirlýsingar liggi fyrir innan ESB um nauðsyn þess að tengja saman makríldeiluna og aðildarviðræður Íslands. Vitnað er til orða sjávarútvegsráðherra Írlands í því sambandi, svo og til orða Steingríms J. Sigfússonar í ræðustóli Alþingis 20. mars 2012: „Það er erfitt fyrir okkur að halda áfram viðræðum við Evrópusambandið í góðri trú ef Evrópusambandið tekur þetta óskylda deilumál og dregur það inn í aðildarviðræðurnar og ætlast til undanlátssemi af okkar hálfu í gríðarlega stóru og miklu hagsmunamáli til þess eins að þeir fáist til að eiga við okkur viðræður um aðskilda kafla í ferlinu með eðlilegum hætti. Það eru ekki boðlegar aðstæður og hljóta að valda uppnámi í þeim viðræðum.“

4)      Loks er á það bent að utanríkisráðherra hafi þegar vikið frá þeim sjónarmiðum um verklag og meginhagsmuni sem tiltekin hafi verið í áliti meiri hluta utanríkismálanefndar, þegar aðildarumsóknin var samþykkt á Alþingi og samningskaflinn um matvælaöryggi, dýra- og plöntuheilbrigði nefnt sem nýjasta dæmið þar um, en þar séu kröfur Íslands að mati utanríkismálanefndar ekki settar fram með nægilega skýrum og afdráttarlausum hætti, sem og fyrirvarar og ófrávíkjanleg skilyrði í samningaviðræðum sem ekki verði samið um. Samningsafstaða fyrir þennan samningskafla endurspegli t.d. ekki á skýran hátt skýlausa kröfu Íslendinga um bann við innflutningi á lifandi dýrum, hráum ófrosnum dýraafurðum og tilteknum plöntum og trjám.

 Við óskum lesendum gleðilegra jóla! Við verðum aftur á vaktinni strax eftir jól.

Athugasemdir

[Ásthildur Cesil Þórðardóttir, 23.12.2012 kl. 16:10]

Tek algjörlega undir þessi sjónarmið.

[Ásmundur (IP-tala skráð) 24.12.2012 kl. 14:59]

Gleðileg jól, Ásthildur og þið öll hin.

[Ásthildur Cesil Þórðardóttir, 24.12.2012 kl. 19:16]

Gleðileg jól sömuleiðis Ásmundur minn og allir hér.