Skipuleg ófrægingar herferð ESB fjölmiðlana gegn landi og þjóð

Það er löngu orðið ljóst að Íslenskir fjölmiðlar og fréttafólk þeirra gengur flest hvert erinda ESB aðildar- og innlimunarferlisins. Harðast fram í óhróðrinum ganga fréttamenn og þáttastjórnendur ríkisfjölmiðlanna, en svipað má reyndar segja um 365 fjölmiðlasamsteypu hrunverjans Jóns Ásgeirs.

Rétt og sanngjarnt er að "Vinstri vaktin gegn ESB" undanskilji Morgunblaðið í þessum efnum og ástæða sé til þess að hæla því blaði fyrir sérstöðu sína við að reyna að sýna þjóðinni allar hliðar umræðunnar um ESB aðlögunar- og aðildarferlið.

Nú þegar enn teygist á ESB aðildarferlinu og nálgast kosningar virðist fjölmiðlafólkið færast í aukana og leggjast skipulega í árásir og ófrægingar- og óhróðurs herferð gegn landi sínu og þjóð og öllu því sem íslenskt er og gerir okkur að þjóð.  

Þar eru engu eirt hvort sem að það er á sviði menningar, efnahags- eða velferðarmála eða annars á þeim fjölmörgu sviðum þar sem þjóðin hefur í grunninn verið ánægð með og staðið sig vel í öllum samanburði. 

Fréttir og fréttaþættir, tölum nú ekki um fyrirsagnirnar, miða skipulega að því að ófrægja á allan hátt og gera eins lítið úr öllu því sem íslenskt er, sem frekast er mögulegt.

Breytir þá engu hvert þessari ófrægingarherferð er beint, eða hvernig hún er notuð, það er hvort að ranglega sé farið með staðreyndir og þeim hagrætt eftir því sem að við á og því sleppt sem hentar ekki málstaðnum hverju sinni.  

En bókstaflega er hamast á hinu sem þykir passa. Skotmarkið er stórt, það er allt landið og þjóðin og fiskimiðin líka.  Því skiptir ekki höfuð máli hvernig skotið er, eða hvar skítabomburnar lenda. 

Mestu máli skiptir að skjóta bara sem mest og helst að úthrópa og sverta land og þjóð svo mikið að fólk missi alveg trúna gefist helst upp og viðurkenni án nokkurs frekari mótþróa allt forræði þessa uppgjafar- og ESB landsöluliðs. 

Tilgangurinn er nefnilega að helga ESB meðalið, alveg sama hvað !  

Allt er dregið á flot og ávallt reynt að láta Ísland koma sem verst út í misvísandi samanburðinum við ESB ríkin, eða helstu nágrannalöndin eins og stundum er notað ef að sú ónákvæmni hentar betur til að helga ESB meðalið illum tilganginum. 

Vitnað er út og suður í hagtölur héðan og þaðan og samanburðurinn frá mismunandi tímum teygður og togaður og notaður þannig eftir því hvað best hentar hverju sinni til þess að sverta sem mest íslenskan veruleika og íslensk lífsgildi,  til þess eins að helga ESB meðalið. 

Síðan til þess að gera þetta nú allt saman sennilegra og vitna um öll ósköpin, þá eru dregnir á flot þeir helstu sérfræðingar og sótraftar háskóla akademíunnar eða atvinnulífsins eins og það er kallað, þ.e. allra þeirra sem harðast hafa gengið fram í að rakka niður land sitt og þjóð og berjast fyrir ESB rétttrúnaðinum !  

Inn á milli til þess að láta þennan sannleika þeirra nú líta sem faglegastan út þá fá þar líka óspart að láta ljós sitt skína hinir "færustu erlendu sérfræðingar" eins og það er látið heita, sem svo alveg óvart allir eru sérfræðingar í því að dásama ESB valdaapparatið og allt þeirra regluverk og tilskipanir.

Þó svo að sífellt sé hægt að gera miklu betur og verkefnin áfram verði að berjast fyrir bættum kjörum, frekari velmegun og jafnrétti, sé baráttan endalausa. 

Þá er sannnleikurinn samt sem áður sá ef málin eru skoðuð hlutlægt af sanngirni og í eðlilegu samhengi að á öllum sviðum og skölum lífskjara, velmegunar og annarra lífsgildis viðmiða þá stendur þessi litla þjóð Ísland sig mjög vel og er í fremstu röð, hvort sem að það er skoðað í Evrópskum samanburði eða á heims vísu. 

Hagtölur og lífsgildis viðmið OECD og EUROSTAT vitna líka ótvírætt um það, hvort sem að þau eru skoðuð 30 til 40 ár aftur í tímann, eða nú eftir Hrunið. 

Möguleikar þjóðarinnar til skemri eða lengri tíma litið standa allir til öflugra framfara og lífskjara sóknar á öllum sviðum mannlífsins.  Um þetta vitna skýrt allar erlendar stofnanir og þessir aðilar telja líka að framtíðar horfur þjóðarinnar vera mjög bjartar og öfundsverðar! 

Yfir þessu reynir þetta ESB- úrtölu- og landsölulið að þegja. Þess í stað bölsóttast þau saman fjölmiðlastóðið, háskóla elítan og meintu sérfræðingarnir og syngja hástöfum, bölbænir og ragnarök sín yfir þjóðinni og kyrja svo undir til staðfestingar viðlagið  -  "V é r  e i n i r  v i t u m".

GI

Athugasemdir

[Hilmar (IP-tala skráð) 18.12.2012 kl. 15:13]

Við borgum nauðungargjöld til Rúv, og fáum lygar í staðinn. Það er náttúrulega afkáralegt.

Í sjálfu sér er fátt við því að segja, að miðlar Jóns Ásgeirs dæli út lygum, það væri stílbrot ef þeir væru heiðarlegir, og ekki er hægt að agnúast út í Daglegan Viðbjóð, hver þjóð verður að hafa sinn soramiðil. Það er heldur ekki hægt að ráðast mikið á Eyjuna/Pressuna, undir styrkri stjórn Björns Inga, það er auðvitað skiljanlegt að spilltur stjórnmálamaður leiti til þeirra sem eru tilbúnir til að greiða fyrir áróður, til að halda sér á floti.

Það segir sitt um ESB sinna, að þeir leita í skjól spilltra stjórnmálamanna, útrásarvíkinga sem eru daglega í dómsölum, eða öfgasinnaðra á sorpmiðli. Það er náttúrulega fyndið, að ESB sinnar eru þeir sem gala hæst um spillingu.

En Rúv, það er annar handleggur, og sá ekki fyndinn.

Auðvitað verður næsta ríkisstjórn að spúla þarna út, það er ótækt að peningar frá Brussel hafi fundið farveg í gegnum stofnun, sem á að vera óháð pólitík, og skýra frá staðreyndum.

Það er bara tvennt í stöðunni, að hreinsa duglega til, eða að leggja Rúv niður, með manni og mús.

[Ásmundur (IP-tala skráð) 18.12.2012 kl. 17:29]

Vinstrivaktin er komin í fyrirhrunsgírinn. Nú á að þegja yfir öllu slæmu og fljóta sofandi að feigðarósi að næsta hruni. Þeir sem neita, fari í endurmenntun, öðru nafni heilaþvott.

Blað hægri öfgaaflanna er blað Vinstrivaktarinnar. Sérhagsmunaöflin sem stórgræða á falli krónunnar á kostnað almennings eru í sérstöku eftirlæti. Allavega stendur Vinstrivaktin dyggan vörð um hagsmuni þeirra og telur að þessi fjármagnstilfærsla frá almenningi til sægreifa sé að bjarga þjóðinni.

Vinstrivaktin virðist haldinn þeirri meinloku að við ESB-aðild breytist íslenskar hagtölur í eitthvert ESB-meðaltal. Þar eð við erum frekar neðarlega á slíkum listum, ber að þegja yfir því. Annað er ófrægingarherferð, segir Vinstrivaktin.

Hvar við eru í röðinni á listum yfir hinar ýmsu hagtölur Evrópuríkja skiptir litlu máli varðandi aðild. Það sem skiptir máli er hvað ávinnst með henni. Það er hreint ekki svo lítið.

Greiðslubyrði lána stórminnkar vegna lægri vaxta. Greiðslubyrðin verður einnig miklu jafnari ef borið er saman við óverðtryggð íslensk lán. Verðbólga verður lítil og verðtrygging því óþörf.

Stöðugleikinn sem kemur með evru og jafnvel fljótlega eftir aðild bætir gífurlega samkeppnisstöðu okkar. Við það verða til mörg og margvísleg atvinnutækifæri sem leiða til aukinna tekna þjóðarbúsins. Verðlag lækkar.

Útflutningstekjur Svía jukust úr 30% af þjóðarframleiðslu í 50% við ESB-aðild. Þær eru nú að nálgast 60%. Til að greiða miklar erlendar skuldir veitir okkur ekki af slíkri tekjuaukningu.

Mikil hætta fylgir því að vera áfram með krónu sem gjaldmiðil. Hún getur ekki verið án hafta. Í stað núverandi hafta koma önnur höft. Höftin hafa hægt og bítandi mjög slæm áhrif. Þau eru í raun eins og banvænn sjúkdómur.

Gjaldeyrishöft samræmast ekki EES-samningnum til frambúðar. Úrsögn úr EES blasir því við. Afleingarnar verða næstum örugglega greiðsluþrot íslenska ríkisins.

Vegna mikilla skulda ríkisins mun ekki nægja í þetta skipti að fá hagstæð lán. Við ráðum ekki við að greiða af þeim. Ekkert annað kemur til greina en að semja um lækkun skulda. Þá kemur til kasta Parísarklúbbsins sem er martröð allra sjálfstæðra þjóða.

Hrægammasjóðir kaupa skuldabréf á hendur gjaldþrota ríkjum. Þeir ljá aldrei máls á lækkun þeirra. Við verðum í sporum Argentínu sem nú meira en áratug eftir að landið hætti að greiða af erlendum skuldum er aftur á barmi gjaldþrots, hundelt af hrægammasjóðum.

[Rafn Guðmundsson, 18.12.2012 kl. 17:44]

GI - langmest af þessu öllu sem þú ritar hérna er bull sem þú veist sjálf. hvað og hvers vegna þetta er skrifað er örugglega flestum ráðgáta.

en þú vísar í OECD og EUROSTAT um ágæti okkar - sýndu okkur dæmi

[Ómar Bjarki Kristjánsson, 18.12.2012 kl. 18:40]

http://blogg.smugan.is/kolbeinn/2012/12/18/trojuhesturinn/

[Elle_, 18.12.2012 kl. 19:22]

Ómar fer á milli síðna með þennan heilaga link sinn.  Svarið mitt við linknum og pistlinum að ofan var þarna: Hverjir eru á móti lýðræði?

[Ásmundur (IP-tala skráð) 18.12.2012 kl. 19:41]

Svo að hægrisinninn, Laugi Lygalaupur, er einn skriffinna Vinstrivaktarinnar. (Leyfi mér að taka upp hans eigin talsmáta þegar ég fjalla um hann enda eru þetta orð að sönnu).

Ekki datt mér í hug að Vinstrivaktin væri svona algjörlega búin að tapa andlitinu. Nú sé ég á efnistökunum að þetta er einmitt Laugi enda eru þetta skrif með endemum.

Óvönduð skrif Vinstrivaktarinnar hafa valdið svo mikilli hneykslan að þau hafa verið tekin sérstaklega fyrir á öðrum bloggsíðum. Þetta er ekki í fyrsta skipti sem það gerist. Nú fer maður að halda að aðrir jábræður Vinstrivaktarinnar með athugasemdir hér séu einnig að skrifa pistlana.

Fátt er þar um fína drætti, svo að ekki sé meira sagt, en aðrir eru trúlega ekki tilkippilegir að bendla sig við síðuna.

[Elle_, 18.12.2012 kl. 21:08]

Já, örvænting ykkar ESB-sinna er orðin mikil, skiljanlega, enda komist ekkert með ykkar ofbeldismál.  Segi bara eins og stórskáldið að ofan: Fátt um fína drætti.  Og veit ekki hvaða bull Rafn er að meina, en sannur pistill.

[Ásmundur (IP-tala skráð) 18.12.2012 kl. 23:08]

Kvöld eftir kvöld er fjallað um sérlausnir í samningum við ESB í Speglinum.

Í gær var það Sigrún Davíðsdóttir eins og ég hef áður bent á. Í kvöld var það enginn annar en einn helsti andstæðingur aðildar, þingmaður Sjálfstæðisflokksins Ragnheiður Elín Árnadóttir.

Hilmar og Elle, ætlið þið ekki að reyna að stöðva þessa "ófrægingarherferð"?

[Hilmar (IP-tala skráð) 18.12.2012 kl. 23:35]

Hvur veit Mundi minn, nema að við höfum höggvið nægilega duglega í Rúv?

Kannski er kominn skjálfti í Samfylkingarfólkið á Rúv, sem veit að það hefur farið offari, og kannski óttast það eðlilega um störfin sín?

Okkur hefur orðið bærilega ágengt undanfarið, meira að segja þú hefur viðurkennt að það verða engar undanþágur fyrir Ísland. Það hefur tekið tímann sinn, enda ertu búinn að boða undanþágur síðan elstu menn byrjuðu að hlægja að þér á internetinu.

[Ásmundur (IP-tala skráð) 18.12.2012 kl. 23:55]

Samfólkingarfólk á Rúv?

Nei þetta eru allt sjálfstæðismenn, allavega þeir sem ráða og bera ábyrgð.

Er allt á sömu bókina lært hjá þér?

[Ásthildur Cesil Þórðardóttir, 19.12.2012 kl. 00:08]

Það er til dæmis ekki orðið hlustandi á kvöldfréttir útvarpsins og spegilinn, þetta er orðin einróma ESBáróður með Sigrúnu Davíðsdóttur sem yfir áróðursmeistara, ætlar hún svo að taka ábyrgð á lygunum ef við skyldum álpast inn í esb?  Eða ætlar hún bara að ypta öxlum og halda sig í Bretlandi.  Skömm og niðurlæging rúv í þessu máli er himinhrópandi. 

[Elle_, 19.12.2012 kl. 00:19]

Er allt á sömu bókina lært hjá þér?

Við erum allavega ekki enn að lesa Dísu ljósálf eða Lísu í Undralandi, eins og þið.

[Hilmar (IP-tala skráð) 19.12.2012 kl. 00:19]

Fyrir það fyrsta Mundi minn, þá ber enginn ábyrgð þarna uppi á Rúv.

Í öðru lagi, þá er hvur einasti kjaftur þarna Samfylkingarmaður, kannski með þeirri undantekningu að einn og einn á stangli er Vinstri grænn.

Útvarpsstjórinn sjálfur er náttúrulega sonur fyrrverandi ráðherra Alþýðuflokksins, og án þess að ætla að öll börn pólitíkusa feti í fótspor foreldranna, þá má ætla það í þessu tilviki, þar sem hann virðist bara ráða inn sannfærða ESB Samfylkinga.

Og auðvitað staðfestist sá grunur, þegar ESB getur mútað fréttamönnum út og suður, án þess að útvarpsstjórinn fetti fingur út í það.

Líklega sérð þú þetta ekki Mundi minn, sennilega vegna greindar- og menntunarskorts.

[Ásmundur (IP-tala skráð) 19.12.2012 kl. 08:58]

Hilmar, þó að þú sért fæddur sjalli og teljir að það sé í genunum þá er ekki svo með aðra.

Össur og Ingibjörg Sólrún eru alin upp á íhaldsheimilum, Þorgerður Katrín á krataheimili og faðir Hannesar Hólmsteins var kommúnisti en móðir hans framsóknarmaður.

Páll Magnússon er sjálfstæðismaður sem var skipaður útvarpsstjóri af sjálfstæðismönnum. Þorgerður Katrín skipaði hann og mun Davíð Oddsson hafa þrýst á að hann yrðu ráðinn.

Sá sem ber ábyrgð á fréttum Rúv er sjálfstæðismaðurinn Óðinn Jónsson fréttastjóri.

Þessi gagnrýni ykkar á þá er meðmæli með þeim. Hún bendir til að þeir séu að standa sig. 

[Ásmundur (IP-tala skráð) 19.12.2012 kl. 09:18]

"Ófrægingarherferðin" heldur áfram.

Nú voga fjölmiðlarnir sér að segja frá því að evrusvæðið sé að rétta úr kútnum og að lánshæfismat Grikkja hafi hækkað um hvorki meira né minna en sex flokka.

Vinstrivaktinni hefur greinilega láðst að láta fjölmiðla vita að þeim ber að þegja yfir slíkum fréttum því að þær eru liður í ófrægingarherferð.

[Hilmar (IP-tala skráð) 19.12.2012 kl. 12:31]

Jú sjáður til Mundi minn, þú ert búinn að fullvinna samsæriskenninguna, Þorgerður Katrín er krati, enda ESB sinni, og hún tróð öðrum ESB sinna í djobbið.

ESB hefur greinilega unnið vel og lengi í því að undirbúa jarðveginn.

Nú varðandi Grikkland, eru það fréttir að landið skuli vera í ruslflokki? Það hefur verið vitað lengi.

Eini munurinn er að nú vita lánshæfisfyrirtæki að skuldir Grikkja verða greiddar, með því að þrautpína grískan almenning, gera þá að þrælum ESB í raun, og ef það dugar ekki til að kvelja þjóðina, þá verður byrgðinni velt yfir á almenning í hinum evrulöndunum.

Svei mér gott Mundi, að við erum ekki með evruna, þá værum við í ábyrgð. Og eins gott að 98,5% íslensku þjóðarinnar hafði það frelsi að geta hafnað Icesave. Blessaður dauðadæmdur almenningur í Grikklandi hefur ekki þann lúxus. Enda innan ESB.

[Ásmundur (IP-tala skráð) 19.12.2012 kl. 15:28]

Himmi Himpigimpi vill ekki að Grikkir greiði skuldir sínar. Hann vill heldur ekki að aðrar evruþjóðir greiði þær. Hann vill að hungursneyð, eymd og volæði verði hlutskipti Grikkja í kjölfar þjóðargjaldþrots. Krugman var búinn að lofa honum því.

Enn verri finnst Himma þó sú ófrægingarherferð fyrir Ísland sem honum finnst felast í þessum jákvæða og uppörvandi fréttaflutningi frá Grikklandi. Verst er þó að hans mati að allt evrusvæðið nýtur góðs af og réttir úr kútnum.

Þetta er aðeins upphafið að uppsveiflu sem verður komin á góðan rekspöl þegar þjóðaratkvæðagreiðslan um ESB-aðild Íslands fer fram. Sjálfur fer Himmi í afneitun gagnvart því eins og öðru jákvæðu er varðar ESB-aðildina.