ESB sigrar og aðrir sigrar helgarinnar

ESB sinnar í Sjálfstæðisflokki unnu lítilsháttar sigur í prófkjöri flokksins í Kraganum í gær. Þannig náði Ragnheiður Ríkharðsdóttir alþingismaður öðru sæti með stæl og Vilhjálmur Bjarnason komst í öruggt 4. sæti. Bæði hafa þau talað fyrir því að ljúka yfirstandandi aðlögunarferli að ESB. 

Sjálfstæðiskonan Vilborg Hansen gerir á bloggsíðu sinni grein fyrir opinberri afstöðu prófkjörsframbjóðenda til ESB mála. Þar kemur skýrt fram að nær allir aðrir keppinautar um efstu sætin eru andvígir aðild að ESB og vilja tafarlaust slíta viðræðunum. 

Pressan gerir að því skóna að meðal innvígðra í Sjálfstæðisflokki hafi verið samkomulag milli ESB sinna og ESB andstæðinga um það að kjósa Bjarna í fyrsta og Ragnheiði í annað en ESB sinnarnir hafi svo svikið, þeir hafi sett Bjarna út í kuldann og Ragnheiði í fyrsta. Slíkar kenningar geta vitaskuld aldrei verið annað en vangaveltur en vitaskuld er umhugsunarefn i að 9% kjósenda settu Ragnheiði í fyrsta sæti, sæti sem hún bauð sig ekki einu sinni fram í.

Samfylkingin gerði einnig út um lista um helgina, frekar tvo en einn. Þau tíðindi fyrir norðan að Sigmundi Erni var hafnað af krötum breyta ekki miklu fyrir stöðuna í ESB málum og þar fékk oddvitinn Kristján Möller afgerandi kosningu til að leiða listann áfram. Opinberlega er ESB andstaða ekki til í þingliði Samfylkingar en heimildamenn Vinstri vaktarinnar hafa orðað það svo að ef hún yrði til væri Kristján líklegastur til að leiða slíka andstöðu!

Í Kraganum gerðust svo stórtíðindi helgarinnar þar sem nánast var gert út um komandi formannsslag. Að öllu forfallalausu gengur Árni Páll nú að því sæti á næsta ári. Fyrir forystu VG sem hefur hengt líf sitt og framtíð á samstarf við Samfylkinguna eru þetta allt annað en góð tíðindi. Formaður og varaformaður VG þrívegis biðlað til Samfylkingar um bandalag fyrir kosningar en undirtektir krata hafa verið dræmar. Og síst af öllu mun Árni Páll vera tilbúinn í slíkt. Ríkisútvarpið hafði eftir honum fyrir helgi:

Árni Páll segir að Samfylkingin verði að geta samið á bæði borð, það er að ganga óbundin til kosninga. Katrín segir fyrsta kost vera að núverandi ríkisstjórn fái endurnýjað umboð en hins vegar sér hún til í að vinna með hverjum sem er.  (http://www.ruv.is/frett/god-kjorsokn-i-profkjorum)

Þó svo að yfirlýsing sem þessi láti ekki mikið yfir sér gæti þessi afstaða Árna Páls haft áhrif fyrr en marga varði. Eftir að ríkisstjórnarstólnum var kippt undan Árna Páli fyrir ári síðan hefur ást hans á meintri vinstri stjórn kólnað og það deila alls ekki allir þingmenn Samfylkingar þeirri skoðun með Jóhönnu að fyrir öllu sé að ríkisstjórnin lifi út kjörtímabilið.  

Það er því ekkert útilokað að Samfylkingin leiki aftur sama leik og leikinn var í ársbyrjun 2009. Þá voru samstarfsflokkurinn og veikburða leiðtogi Samfylkingar stungnir eitursnjöllum rýtingum um leið og flokkurinn tryggði sér dýrmæta ríkisstjórnarsetu komandi kjörtímabils nokkrum mánuðum fyrir kosningar. /-b.