Forystuklíkan í ASÍ lét undan síga í afstöðunni til ESB

Þeir sem fylgdust með þingi ASÍ urðu vitni að því að forystuklíkan með Gylfa forseta í broddi fylkingar sá sig tilneydda að fallast á að í þetta sinn yrði ályktun um ESB-aðild með hlutleysisblæ og laus við þau áróðursbrögð í þágu ESB sem Gylfi hefur óspart beitt sér fyrir undanfarin ár.

 

Eins og kunnugt er hafa skoðanakannanir ítrekað sýnt að tveir af hverjum þremur kjósendum eru andvígir inngöngu Íslands í ESB. Þess vegna eru allar líkur á að mikill meirihluti félagsmanna í aðildarfélögum ASÍ sé sama sinnis. Forystuklíkan í ASÍ gerði sér ljóst í aðdraganda þings ASÍ að hyggilegast væri að forðast átök um evrópumálin í þetta sinn og því var í fyrstu ákveðið að þau yrðu ekki á dagskrá þingsins.

 

En svo fór að forystusveit ASÍ var hreinlega pínd til að taka málið á dagskrá. Á ársfundi ASÍ fyrir fjórum árum tókst forystuklíkunni hins vegar að fá því framgengt að í ályktun fundarins var rætt um „að aðild Íslands að ESB og upptaka evru sé eina færa leiðin til að tryggja stöðugan gjaldmiðil til framtíðar.“ Og stefna skyldi að upptöku evru svo fljótt sem verða má. Í ályktun sem nýafstaðið þing ASÍ gerði um evrópumál, kveður hins vegar við annan og mildari tón. Þar segir m.a:

 

 „ASÍ hefur ekki tekið afstöðu til þess, hvort hagsmunum Íslands og íslensks launafólks sé best borgið með aðild að ESB en hefur skýra sýn á hvaða markmiðum þurfi að ná í aðildarviðræðunum til þess að hægt verði að leggja endanlegt mat á kosti og galla fullrar aðildar.“

 

Varla þarf að taka það fram að sá hógværi tónn sem varð fyrir valinu var til kominn vegna mikilla átaka að tjaldabaki, en formaður VR, Stefán Einar Stefánsson, krafðist þess á þinginu að Gylfi forseti hefði hægt um sig í þessu máli sem einn ákafasti áróðursmaður landsins fyrir ESB-aðild.

 

Sú breyting sem varð á framgöngu forystuliðsins á ASÍ-þinginu er til marks um þau miklu umskipti sem orðin eru í afstöðu landsmanna til ESB. Aðildarumsóknin varð til fyrir þremur árum í örvæntingu og upplausnarástandi sem hér ríkti rétt eftir hrunið. Margir trúðu því að hyggilegast yrði fyrir Íslendinga að skríða undir pilsfald ESB og fá þar skjól í stórviðrum fjármálakreppunnar.

 

En síðan hefur það gerst að Íslendingar hafa að mestu náð sér upp úr kreppudalnum af eigin rammleik en að engu leyti með hjálp ESB, sem þvert á móti hefur herjað á Íslendinga bæði á fjármálasviðinu (Icesave) og í sjávarútvegsmálum (makríll). Á sama tíma hefur ESB sjálft og gjaldmiðill þess, evran, orðið að stórfelldu alþjóðlegu vandamáli. Það er því engin furða þótt viðhorf Íslendinga til ESB-aðildar hafi gjörbreyst á þeim fjórum árum sem liðin eru frá hruni. Þingfulltrúar á ASÍ-þingið gerðu sér að sjálfsögðu grein fyrir þessum gjörbreyttu viðhorfum.

Athugasemdir

[Ásmundur (IP-tala skráð) 22.10.2012 kl. 17:03]

Eins og svo oft áður er Vinstrivaktin með ekkifrétt.

Það tókst ekki að svínbeygja Gylfa. Stefán, formaður VR, vildi að honum yrði bannað að tala um ESB. Sú krafa náði ekki fram að ganga.

Auðvitað er sjálfsagt að bíða eftir samningi áður en afstaða er tekin. Auk þess væri það ekki gott til afspurnar ef ESB frétti að Íslendingar væru tilbúnir til að láta hvað sem er yfir sig ganga til að komast í ESB.

Vegna þess að fólk veit ekki um hvað verður kosið er ekkert mark takandi á skoðanakönnunum um fylgi við aðild. Fyrst þegar ljóst er hvað er í boði er hægt að gera marktækar kannanir.

Það vill svo til að niðurstaðan fyrir þá sem eru á móti aðild í síðustu könnun Capacent er nokkurn veginn sú sama og fyrir þá sem samþykktu flestar tillögur stjórnlagaráðs í kosningunni á laugardag.

33% greiddu atkvæði á móti ESB-aðild í könnuninni og álíka hátt hlutfall með tillögum stjórnlagaráðs í kosningunni. 51% aðspurðra í könnuninni svöruðu ekki eða voru hlutlausir. 51% kjósenda sátu heima þegar kosið var á laugardag. 

Samt tekur Vinstrivaktin ekki mark á kosningunni en talar um könnunina eins og það sé staðreynd að meirihlutafylgi sé gegn ESB-aðild.

Þetta er með ólíkindum því að kosningin er endanleg en skoðanakönnun aðeins tilraun til að spá um endanlega útkomu.

Skoðanakönnunin er hins vegar ómarktæk vegna þess að enn er ekki ljóst um hvað verður kosið. Þeir sem taka ekki afstöðu geta því að meirihluta verið þeir sem ákveða sig ekki fyrr en samningur liggur fyrir.  

Niðurstaðan í kosningunni um tillögur stjórnlagaþings er hins vegar óumdeilanleg eins og sést best á því að ESB-kosning sem færi á sama veg með 33% fylgi við aðild en aðeins 49% kosningarþáttöku mundi óumdeilanlega leiða til inngöngu Íslands í ESB.

[Valdimar Samúelsson, 22.10.2012 kl. 20:18]

Það verður 100% mæting þegar við fáum loks að kjósa um aðild að ESB. Ég get þakkað mér fyrir að ASÍ tók á sig rögg með að breyta áherslu með aðild að ESB. fyrir einu og hálfu ári sendi ég öllum aðildarfélögum ASÍ bréf með spurningu varðandi afstöðu þeirra að aðild að ESB Allir svöruðu að það væri ekki á þeirra stefnuskrá neitt um aðild. Það er einstaklingsmál. Á meðan var forystuklíkan að sleikja ríkisstjórnar kíkuna að þeirra stefna væri innganga í ESB og í raun var það veganesti sem ríkisstjórnin hafði við ákvörðunartökuna á sínum tíma. ASÍ laug vísvitandi um stefnu aðildarfélaga sinna.  

[Anna Sigríður Guðmundsdóttir, 22.10.2012 kl. 20:23]

Efst á forgangslista ESB-Brusselvaldsins er að gelda ASÍ-forystuna á Íslandi.

Það virðist hafa tekist vel hjá Brussel-ESB-ASÍ-vinnumálastofnuninni.

M.b.kv.