Átök harðna mjög milli suðurs og norðurs í ESB

Finnar segja frekar skilið við evruna en greiða niður skuldir annarra evruríkja, segir fjármálaráðherra Finnlands. Finnar kunna að gefast upp á evrunni á undan Grikkjum að mati heimsþekkts hagfræðings. Forsætisráðherra Ítalíu fordæmir Finna og Hollendinga.

 

Ákvarðanir leiðtogafundar ESB 28. og 29. júní um aðgerðir til bjargar evrunni valda miklum titringi innan ESB og á evrusvæðinu. Finnar og Hollendingar hafa gagnrýnt harðlega áform um ótakmarkaða og gagnkvæma ábyrgð evruríkja á skuldum hvers annars.

 

Í samtali við Helsingin Sanomat fimmtudaginn 5. júlí sagði Jutta Urpilainen, fjármálaráðherra Finnlands, að Finnar „fylgdu harðri stefnu“ þegar rætt væri um neyðarlán á evru-svæðinu. „Við leggjum gott til mála og viljum leysa mál en ekki fyrir hvaða verð sem er.“ „Finnar munu frekar segja skilið við evruna en greiða niður skuldir annarra aðildarríkja myntsamstarfsins,“ sagði hún í samtali við viðskiptablaðið Kauppalehti föstudaginn 6. júlí. „Finnar munu ekki ríghalda í evruna fyrir hvaða verð sem er og við erum búin undir allt sem kann að gerast.“ „Sameiginleg ábyrgð á skuldum annarra ríkja, efnahag þeirra og áhættu; við eigum ekki að búa okkur undir slíkt,“ bætti hún við.

 

Klaas Knot, seðlabankastjóri Hollands, sem á sæti í stjórn Seðlabanka Evrópu, lýsti svipuðum skoðunum í liðinni viku og finnski fjármálaráðherrann. „Vilji einhver aðstoða suðurhluta Evrópu verða aðrar ríkisstjórnir að eiga þar hlut að máli, ekki Seðlabanki Evrópu,“ sagði Knot. Mario Monti, forsætisráðherra Ítalíu, brást hinn versti við í gær (8. júlí) og gaf ótvírætt í skyn að gagnrýni Finna og Hollendinga stuðlaði að því að halda lántökukostnaði Ítala og Spánverja háum.

 

Nouriel Roubini, hagfræðiprófessorinn við New York Univeristy, sem sagði fyrir um fjármálakreppuna 2008 og var þá kallaður dr. Doom, dómsdagsspámaðurinn, fullyrti nýlega að Finnar kynnu að segja skilið við evruna á undan Grikkjum. Hann benti á að Finnar séu eina Norðurlandaþjóðin sem tekið hafi upp evru og dregur mjög í efa að það sé hagstætt fyrir Finna. Nær væri fyrir þá að hafa eigin gjaldmiðil en jafnframt geti þeir fest gengi hans við evruna eins og Danir hafi gert, ef það henti þeim betur. Utan evru-samstarfsins þurfi Finnar ekki að greiða til ESM, hins varanlega björgunarsjóðs evrunnar.

 

Þeir stjórnmálamenn hér á landi sem sækja það hvað ákafast að Íslendingar gangi í ESB til að taka upp evru ættu að hugleiða orð Nouriel Roubini. Vilja Íslendingar taka á sig ábyrgð á skuldum evruríkja sem nú eru á fallandi fæti eftir nokkurrar ára notkun evrunnar? Höfum við ekki þegar nóg á okkar könnu að koma fjármálum landsins og skuldastöðu í lag, þótt við förum ekki að taka á okkur gífurlegar greiðslur og ábyrgðir til bjargar evrunni?

 

Fjármálaráðherrar evru-ríkjanna koma saman í Brussel í dag, mánudaginn 9. júlí, til að ræða enn einu sinni hvað helst megi gera til að koma í veg fyrir að suðurhluti evrusvæðisins fari í þrot.

  

Athugasemdir

[Ómar Bjarki Kristjánsson, 9.7.2012 kl. 12:45]

Nú sei sei jæja. Komið stríð?

þetta með finnska fjármálaráðherrann er ranghermi eins og farið er yfir hér:

http://heimskringla.blog.is/blog/heimskringla/entry/1248506/

Sagði ekker of that kind.

[Hilmar (IP-tala skráð) 9.7.2012 kl. 14:20]

Reyndar er það rangt að fjármálaráðherrarnir séu að hittast til að koma í veg fyrir þrot suðurríkjanna. Þeu eru löngu komin í þrot, og er haldið uppi af skattgreiðendum í norðri.

Auðvitað eru fjármálaráðherrar í norðri í vondri stöðu. Kjósendur í norðrinu sætta sig ekki við það endalaust að greiða fyrir mislukkaða euro-sósíaltilraun, sem allir vita að hefur runnið út í sandinn.

Fyrir vonlitla aðlögunarsinna á Íslandi er fátt annað í stöðunni, en að afneita öllum upplýsingum sem koma frá útlöndum um þessa vondu stöðu. Þetta er allt lygi, segja þeir. Þeir halda sig raunar við það, að fullyrða, eins og þeir hafa gert dálítið lengi, að það sé ekkert að evrunni.

Björgunarsjóðir og neyðarfundir, eru víst bara áróðursorð vondra andstæðinga vísindakirkju ESB.

[Jón Valur Jensson, 10.7.2012 kl. 02:41]

Já, í mikilli friðsemd tala þeir saman þessir friðarbandalagsmenn!

En gott hjá Finnum að segja mönnum opinskátt hvert þeir vilja halda.