Höggvum á hnútinn: Formaður utanríkismálanefndar segir evruvandann geta lengt viðræðuferlið

Árni Þór Sigurðsson sagði í viðtali í Morgunblaðinu í morgun að evrukreppan gæti hægt á aðildarviðræðum Íslands og ESB. Nú eru senn þrjú ár síðan það var illu heilli samþykkt að hefja þessa göngu og mál að linni. Eins og því miður hefur verið reyndin í flestum ríkjum sem sótt hafa um aðild að ESB, þá hafa stjórnvöld á hverjum tíma verið fljót að sogast inn í ESB-straumiðuna og týnst þar og verið tröllum gefin. Gildir þá nánast einu hverjir eru við stjórnvölinn. Hvort sem núverandi stjórnarmeirihluti verður áfram við völd eða nýr tekur við eftir næstu kosningar, þá kennir sagan okkur að furðu fljótt þagna gagnrýniraddir sem voru hárværar í stjórnarandstöðu. Nú er sögulegt tækifæri til að höggva á hnútinn og hætta þessu flani, hvort sem er með viðræðuslitum, með því að leggja umsóknina á hilluna eins og Sviss gerði (sem leyfði henni að rykfalla) eða leita vilja þjóðarinnar áður en lengra er haldið. Allir þessir kostir eru vænlegir til að skapa hér betri skilyrði til uppbyggingar. Eins og staðan er nú veit enginn hvers konar samfélag er verið að byggja upp, á hvaða forsendum og hver er framtíðarsýnin.

Þegar - ofan í kaupið - er farið að sjá fram á að þetta ferli, sem átti að vera svo dæmalaust einfalt og fljótlegt, er þegar orðið mun lengra en vænst var og stefnir í að dragast enn á langinn, þá er rétti tíminn að skoða málin af yfirvegun og viðurkenna að nú er nóg komið. Jafnvel fyrrum heitir Evrópusambandssinnar hér á landi hafa bent á að við höfum ekki hugmynd um hvert stefnir innan ESB og því óráð að halda áfram viðræðum. 

Athugasemdir

[Seiken (IP-tala skráð) 7.6.2012 kl. 15:23]

Á blaði var þetta heldur ekkert mál.  Það eina sem þurfti að gera var bara að segja já við öllu sem ESB bað um.  Það virðist að minnsta kosti vera sú stefna sem var færð út í lífið.

Icesave I, 3-500 milljarðar. Ekkert mál. Höfum reyndar enga hugmynd um hvaðan peningarnir eiga að koma en AGS segir að við getum borgað þetta.

Makríll fyrir 30 milljarða kr. á ári. Ekkert mál. Þetta er óþverra slor hvort eð er.

Afhenda kröfuhöfum bankana íslensk heimili á silfurfati að sérstakri ósk Barrosso.  Ekkert mál.  Íslenskir lántakar eru hvort eð er bara eitthvert íhaldspakk sem neitar að búa í leiguhúsnæði.

Tryggja erlendum krónubréfaeigendum bestu ávöxtun á byggðu bóli. Ekkert mál. Flatskjár hyskið borgar þetta hvort eð er allt saman.

Semja við Deutsche bank um að hann fái frið við innheimtuna og bílavörslusviptingar og að ekki verði gengið að blessuðum Landsbankadrengnum.  Ekkert mál. Forsetinn kann að hafa elskað útrásina í gamla daga en núna eru það sko við sem sofum í því bóli.

[Ásthildur Cesil Þórðardóttir, 8.6.2012 kl. 11:53]

Er það ekki rétt líka að þessar viðræður (aðlögunarferli) er ekki það sem alþingi samþykkti í upphafi?  Með hvaða rétti eru þá stjórnvöld að vinna að þessu máli?