Er VG aftur á biðilsbuxum?

...  mjög mikið af fólki í þessum flokkum [VG og Samfylkingu] sem vill áframhaldandi samstarf. Unga fólkið okkar vill áframhaldandi samstarf og vinnur mjög vel saman á þingi og í sveitarstjórnum og víðar, sagði Steingrímur J. Sigfússon formaður VG m.a. í löngu og gagnmerku viðtali við Sigurjón M. Egilsson á Sprengisandi Bylgjunnar nú á hvítasunnumorgni. Hann viðurkennir að ESB umsóknin hafi leikið flokkinn grátt, sé andstæð því sem hann sjálfur lýsti yfir fyrir kosningar en færir samt rök fyrir að halda henni til streitu.

Það vekur athygli hversu mikla áherslu forysta VG leggur á að flokkurinn fari í næstu kosningar með áframhaldandi samstarf við Samfylkinguna að leiðarljósi. Fyrir nokkrum vikum ræddi varaformaður VG, Katrín Jakobsdóttir um það á Samfylkingarfundi á Selfossi að þessir flokkar ættu ef til vill að mynda bandalag fyrir næstu kosningar. Þeim orðum Katrínar var slegið upp á forsíðu blaðs sem Samfylkingarmenn á Suðurlandi gefa út og líklega heldur gert meira úr en efni stóðu til. Mestu skipti þó að Katrín hafði mætt á stóran Samfylkingarfund á Selfossi og farið lofsamlegum orðum um samstarf flokkanna.

Vitaskuld ýtir undir þetta sú eðlilega hugsun allra vinstri manna að ekki sé rétt að hleypa frjálshyggju-haukum Sjálfstæðisflokks aftur til valda. Um hitt má samt deila hvor stóru S-flokkanna er meira til hægri og handgengnari trúnni á markaðssamfélagið en það er efni í sérstaka og alllanga bloggfærslu.

Vorið 2009 gekk VG bundið til kosninga með loforði um að vinna með Samfylkingunni þar sem flokkurinn lýsti því yfir að hann færi ekki í samstarf með Sjálfstæðisflokknum. Engin sambærileg yfirlýsing barst frá mótaðilanum í trúlofun þessari, hinum meinta vinstri flokki Samfylkingu. 

Afleiðingin var sú að eftir kosningar var Samfylkingin í þeirri óskastöðu að deila og drottna en samningsstaða VG var lakari þrátt fyrir gríðarlegan kosningasigur. Nú í aðdraganda kosninga 2013 endurtekur sagan sig. Formaður og varaformaður VG biðla til Samfylkingarinnar en hvar eru undirtektirnar? Enn sem komið er hefur enginn Samfylkingarmaður tekið undir. Það er samt ekki eins og orð VG um áframhaldandi samstarf hafi komið frá ómarktækum smámennum þess flokks. Hér eru á ferðinni formaður og varaformaður.

Getur verið að VG sé hér á villigötum og eigi eins og lengstum hefur þótt farsælast í pólitík að ganga óbundið til næstu kosninga?

Athugasemdir

[Seiken (IP-tala skráð) 29.5.2012 kl. 13:10]

Ég hef fulla trú á að forustufólk VG nái að eyða flokknum í næstu kosningum. Efast ekki um það eitt augnablik. En hvar annars staðar í veröldinni hefði formaður VG flokks stært sig af því að vera boðið að starfa fyrir AGS?

Þó ég hefði glaður séð á eftir SJS til útlanda þá vil ég Grikkjum ekki svo illt að senda þeim okkar verstu hrappa. 

[Heimir Lárusson Fjeldsted, 29.5.2012 kl. 13:11]

Vg er flokkur rúinn trausti.

[Kolbrún Hilmars, 29.5.2012 kl. 14:18]

Mér sýnist allt benda til þess að forysta VG vilji leggja niður flokkinn sinn.

Það er ágætt að hafa það á hreinu fyrir næstu þingkosningar. Liljuflokkurinn kemur þá í staðinn.

[Jón Steinar Ragnarsson, 30.5.2012 kl. 00:55]

Stokkhólmssyndrómið?

[Ásmundur (IP-tala skráð) 30.5.2012 kl. 07:45]

Það leynir sér ekki að Vinstrivaktina dreymir um stjórnarsamstarf Vinstri grænna við Sjálfstæðisflokkinn.

Það kemur ekki alveg á óvart enda munu Svavar Gestsson, Hjörleifur Guttormsson og Davíð Oddsson hafa lagt á ráðin um slíkt stjórnarsamstarf fyrir kosningarnar 2007.

Steingrímur virtist til í tuskið en þegar á reyndi neitaði Geir Haarde að starfa með Vinstri grænum. Aldrei þessu vant lét hann ekki undan Davíð.

Það er mjög athyglisvert að áhrifamenn í Vinstri grænum finnist Sjálfstæðisflokkurinn fýsilegur til stjórnarsamstarfs. Að mínu mati getur það ekki verið vinstri flokkur sem sækist eftir slíku samstarfi nema einhver óvenjulegur skilningur sé lagður í orðið vinstri.

Vinstrivaktin talar um markaðsöflin í þessu sambandi en virðist láta sig jöfnuð litlu eða engu skipta sem sést best á því að hún telur Samhylkingina hugsanlega lengra til hægri en Sjálfstæðisflokkinn.

Vinstri grænir eru varla heldur mikill umhverfisflokkur í ljósi þess að hann styður frelsi sauðkindarinnar til að gera landið örfoka.

Er það kannski þegar allt kemur til alls fyrst og fremst þjóðremba og afturhald sem flokkurinn stendur fyrir?