Berlusconi: Veislunni er lokið! Sendið reikninginn til Berlínar!

Forsíðumynd vikublaðsins Economist lýsir kveðjustundinni hjá Berlusconi. Hann stendur í miðri svallveislu að hætti Rómverja til forna og segir gestunum sem flestir eru afar illa á sig komnir, að hypja sig heim: That´s all folks! Send the bill to Berlin! 

 

Fyrir fáeinum dögum lýsti Berlusconi því yfir að evran ætti sök á þeim vandræðum sem Ítalir eru komnir í og átti þá við að evran hafi þjónað hagsmunum Þjóðverja vel en ekki þeim sem búa á jöðrum evrusvæðisins.

 

 

Bráðapest evrunnar sem gengur frá einu evrulandi til annars og herjaði fyrst á Íra og Portúgala en síðan á Grikki og Ítali er langt frá því að hafa hjaðnað. Nú beinast augu manna að Spáni og Belgíu.

 

Þeir sem reynt hafa að telja sér og öðrum trú um að kreppuástandið komi evrunni ekkert við hljóta að velta því fyrir sér hvort ekki sé tími til kominn að horfast í augu við staðreyndir.