ESB gæti eins verið tákn fyrir: Embættis- og Stjórnmálamanna Bandalagið

Megineinkenni ESB er hversu ólýðræðislegt skriffinnskubákn það er og fjarlægt venjulegu fólki enda fátítt að kjósendur í aðildarríkjunum eigi þess kost að greiða atkvæði um það sem þar er ákveðið. Ýmsir hafa haft í flimtingum að bókstafirnir ESB gætu eins verið tákn fyrir: Embættis- og Stjórnmálamanna Bandalagið, einkum ef haft er í huga hvílíkur mýgrútur af embættis- og stjórnmálamönnum lifir þar og starfar í sínum eigin heimi með afar há laun og alls kyns forréttindi en þarf sárasjaldan að standa reikningsskap gerða sinna frammi fyrir kjósendum.

 

Ein og flestum er kunnugt eru stöðugt teknar ákvarðanir í stofnunum ESB um hvað sé bannað og hvað leyfilegt. Sem dæmi má nefna nýlega ákvörðun sem Haraldur Hansson (maeglika.blog.is) vakti athygli á fyrir nokkrum dögum. Embættismenn- og stjórnmálamenn ESB hafa nú ákveðið hvert má vera hámark þess hávaða sem kemur frá barnahringlum. Jafnfram er börnum yngri en 8 ára bannað að blása í blöðrur og ekki má selja partýflautur þeim sem eru yngri en 14 ára.

 

En þegar svo kemur að stóru málunum, ákvörðunum sem mestu máli skipta, svo sem um það örlagaríka mál hvernig unnt sé að bjarga evrunni frá hruni með þúsundum milljarða framlögum úr vösum skattgreiðenda, þá gerist annað hvort: Merkel kanslari flýgur til Parísar að hitta Sarkozy eða Sarkozy flýgur til Berlínar á fund kanslarans.

 

Þessar tvær persónur taka síðan stóru ákvarðanirnar og kynna þær leiðtogum annarra evruríkja sem fá það vanþakkláta hlutverk að þröngva  þjóðþingum sínum til að segja já og amen án þess að fá þar nokkru breytt. Þannig hefur þetta gengið aftur og aftur á liðnum mánuðum og þá ekki síst nú seinustu vikurnar. En engum dettur í hug að spyrja kjósendur og skattgreiðendur í evruríkjunum hvort þeir kæri sig um að halda lífi í evrunni, enda ljóst af skoðanakönnunum að meiri hluti kjósenda myndi hiklaust segja: Nei, takk! Nú er komið nóg!

Athugasemdir

[Gunnlaugur Ingvarsson (IP-tala skráð) 22.10.2011 kl. 08:46]

Það er rétt sem að þið segið þessir endurunnu stjórnmála- og embættismenn sem hafa verið sendir á jötuna í Brussel eru þar á margföldum þeim launum sem þeir höfðu í heimalöndum sínum.

Einnig hafa þeir komið ár sinni þannig fyrir borð að auk gríðarlegra hlunninda og lítillar vinnuskyldu þá eru þeir í ofanálag nánast skattlausir með þessar ofurtekjur sínar.

Auk þess eru þeir æviráðnir en geta þó hætt störfum fyrr en flestir aðrir launþegar en þá halda þeir líka fullum launum og stundum líka hluta af ríflegum fríðindum sínum til æviloka.

Einnig er þetta mjög verndaður vinnustaður, nær algerlega gagnvart kjósendum og eða eftirlitsnefndum.

Þeir hafa meira að segja komist upp með það ár eftir ár að gefa skít í löggillta endurskoðendur sem neitað hafa að undirrita ársreikninga sambandsins samfleytt í 15 ár.

Ástæðuna segja endurskoðendurnir vera þá að tugir milljóna Evra misfarist, án frekari skýringa, í höndum Commisararáðana árlega !

Svo er þessi ólýðræðislegi skollaleikur, þar sem Sarkozy heimsækir Merkel eða öfugt orðinn býsna skondinn og kalla ég þau skötuhjú nú einu nafni "Merkozy"

Gæti trúað að í sögubókum og kennslubókum framtíðarinnar verði talað um þetta furðulega fyrirbæri mannkynssögunnar sem "Merkozy" lýðræði = Gerfilýðræði !