Krafa ESB til Grikkja: Seljið auðlindir ykkar!

Mörgum verður vafalaust hugsað til stöðu okkar Íslendinga í hruninu þegar stöðugt berast ískyggilegri frétir af skuldakrepppunni á evrusvæðinu. Þar ber hæst hin miskunnarlausa krafa ESB á hendur Grikkjum að þeir einkavæði auðlindir í ríkiseigu og selji þær erlendum auðfélögum.

Það var lán Íslendinga í óláni að vera með sjálfstæðan gjaldmiðil í hruninu, þvert á það sem spekingar eins og Helgi Hjörvar, Össur og Jóhanna predíka hvað mest, því að einmitt þess vegna gátum við tekið ákvarðanir sem byggðust á íslenskum hagsmunum en ekki gróðahyggju erlendra lánardrottna. Þá hefði Íslendingum verið bannað að setja bankana á hausinn, ríkið hefði neyðst til að taka þúsundir milljarða að láni til að bankarnir hér gætu staðið í skilum við þýska banka og auðlindir okkar verið settar á brunaútsölu að kröfu ESB svo að við gætum staðið undir afborgunum lána.

Vinstrivaktin hefur að undanförnu sýnt tölulega hvernig skuldakreppan á evrusvæðinu hefur magnast með hverjum deginum sem liðið hefur. Þetta eru vondar fréttir fyrir Íslendinga því að evruríkin eru helstu viðskiptalönd okkar og kreppa þar kemur illa við íslenskt efnahagslíf. Það er því ekki af meinfýsi eða illgirni að um þetta er rætt heldur vegna hins að við Íslendingar verðum að horfast í augu við veruleikann eins og hann blasir við og megum ekki fylgja ráðum Helga Hjörvars, Össurar og annarra þeirra líka sem reyna helst að stinga höfðinu í sandinn þegar rætt er um skuldakreppuna á evrusvæðinu sem nú sækir einkum á smærri ríki á útjöðrum ESB. 

Hér eru nýjustu tölur:

2. september s.l. var skuldaálagið á gríska ríkið 2200 punktar en er í dag 13.sept. 4732, skuldaálag á portúgalska ríkið var þá 918, en er í dag 1215, skuldaálag á Íra var þá 772, en er í dag 913, skuldaálag á Ítalíu var þá 365, en er í dag 506, (þrátt fyrir fréttir um að Kínverjar ætli að koma til til hjálpar) og skuldaálag á Spánverja var þá 362, en er í dag 430.

Svonefnt skuldatryggingaálag er sótthitamælir markaðarins og til marks um það tölfræðilega hversu mikið eða lítið lánstraust er ríkjandi gagnvart einstökum ríkjum og fjármálastofnunum. Því hærra sem álagið er því meira þarf að greiða fyrir tryggingu nýs láns. Þannig endurspeglar álagið traust eða vantraust markaðarins og er ávísun á gjaldþrot ef áfram heldur sem horfir að álagið hækki og hækki.

Sambærilegt skuldatryggingaálag á Ísland fór hæst í rúmlega 1400 punkta í miðju hruninu en hefur sveiflast í sumar milli 230 og 300 punkta. 

Evran sterkari en krónan