Könnunin er villandi því að ESB-viðræðum getur lokið með ýmsum öðrum hætti

Skoðanakönnun sem Fréttablaðið birtir í morgun er dæmigerð fyrir villandi könnun sem gengur út frá því sem gefnu að einungis sé tveggja kosta völ. Það er alrangt. Spurningin er því í eðli sínu afar leiðandi.

 

Blaðið lét spyrja kjósendur: „Hvort myndir þú heldur kjósa: 1) Að draga til baka umsókn um aðild að Evrópusambandinu, eða 2) Að ljúka aðildarviðræðum við Evrópusambandið og halda þjóðaratkvæðagreiðslu um aðildarsamninginn?

 

Staðreyndin er hins vegar sú að margt annað og líklegra getur gerst en þetta tvennt sem spurningin beinist að:

 

Í fyrsta lagi er hugsanlegt að umsóknin sé alls ekki dregin til baka heldur lögð til hliðar, eins og t.d. gerðist þegar Sviss sótti um aðild. Þetta er einmitt sá valkostur sem uppi er í undirskriftasöfnun skynsemi.is  en hún byggist á þrenns konar rökum: „Evrópusambandið hefur breyst frá því Alþingi samþykkti umsóknina og óvissa ríkir um framtíð þess og myntbandalagsins. Aðildarferlið er kostnaðarsamt og dreifir athygli stjórnsýslunnar frá mun brýnni viðfangsefnum.  Skoðanakannanir sýna yfirgnæfandi og vaxandi andstöðu landsmanna við aðild“.

 

Í öðru lagi er hugsanlegt og reyndar líklegt að aðildarviðræðum ljúki án þess að aðildarsamningur sé gerður, einfaldlega vegna þess að ríkisstjórn og meiri hluti Alþingis telji að ekki sé viðunandi samningur í boði. Það er ósvífni að í spurningunni skuli gengið út frá því sem gefnu að viðræðum geti ekki lokið nema með formlegum aðildarsamningi sem samþykktur hafi verið af ríkisstjórn Íslands og Alþingi, ESB og  27 aðildarríkjum þess.

 

Í þriðja lagi er auðvitað bæði hugsanlegt og eðlilegast að þjóðin fái að greiða atkvæði um það hvort samningnum skuli fram haldið, t.d. þegar fyrir liggur hver útkoman er úr samningaviðræðum um sjávarútvegs- og landbúnaðarmál. Hitt að þjóðin fái enga aðkomu að málinu fyrr en allt er klappað og klárt og undirritað með fyrirvara f.h. ríkisstjórnar Íslands, ESB og leiðtoga 27 aðildarríkja er afar ólýðræðisleg aðferð og auk þess ankannaleg í ljósi þess að flest bendir til að hvorki sé meiri hluti fyrir aðild Íslands að ESB í ríkisstjórn, á Alþingi né hjá þjóðinni.

 

Spurning Fréttablaðsins var því bæði leiðandi og villandi en það skýrir einmitt að niðurstaðan skuli vera í svo æpandi mótsögn við aðrar kannanir sem gerðar hafa verið undanfarin tvö ár, en í þessari könnun svöruðu 63,4% játandi og 36,6% neitandi.

 

Það er einkum tvennt í spurningu blaðsins sem þrýstir á um jákvæð viðbrögð meiri hluta svarenda: fólk kýs „að ljúka viðræðunum“ við ESB. Það geta í rauninni allir samþykkt, bæði þeir sem vilja ljúka viðræðunum með aðildarsamningi og eins hinir sem vilja ljúka viðræðunum með þeirri niðurstöðu að samningar hafi ekki tekist.

 

Eins eru allir samþykkir því að þjóðaratkvæðagreiðsla fari fram um ESB-málið. Margir vildu að þjóðaratkvæði yrði viðhaft áður en sótt var um aðild. Þjóðin verður að fá tækifæri til að greiða atkvæði um þetta mál ekki síðar en þegar fyrir liggur að viðræðum sé lokið vegna þess að samningar hafa ekki tekist.

 

Mikill meiri hluti þjóðarinnar vill ekki ganga í ESB, eins og margoft hefur komið fram, og telur að aðild að ESB samrýmist ekki hagsmunum Íslands. Það hlýtur því bráðlega að koma að því að þjóðin fái tækifæri til að staðfesta þann vilja sinn í þjóðaratkvæði.

Ragnar Arnalds

Vilja ljúka aðildarviðræðum

Athugasemdir

[palli (IP-tala skráð) 12.9.2011 kl. 12:01]

Skoðanakönnunin er villandi því það er spurt um aðildarferli. Þetta er aðlögunarferli. Það væri vel að spyrja aftur með spurningum um hvort fólk vildi halda áfram í aðlögunarferli áður en þjóðin kýs, og þá kjósa um áframhaldandi aðlögun skv. samningnum að óumsemjanlegu regluverki ESB.

[Haraldur Hansson, 12.9.2011 kl. 12:31]

Það er óþarfi að fjargviðrast út af skoðanakönnun. Frekar að kominn sé tími á að virða leikreglur lýðræðisins og leyfa fólki að kjósa. Þetta er jú stórmál.

Bera ætti upp tillögu til þingsályktunar um að draga umsóknina til baka. Verði hún samþykkt af meirihluta þingmanna ætti að bera þá niðurstöðu undir þjóðaratkvæði. Meirihlutinn ræður. Lýðræði.

Á þingi þyrfti atkvæðagreiðslan að vera skriflega og leynileg, svo ekki sé hægt að endurtaka pólitískt ofbeldið frá júlí 2009. Það munu aðildarsinnar aldrei fallast á af ótta við að lenda í kattasmölum. Þeir óttast lýðræðið.

[Jóhannes (IP-tala skráð) 12.9.2011 kl. 13:33]

Aðlögunarferli eða aðlögunarferli, ég er bæði búinn að lesa og heyra þegar utanríkisráðherrann og fleirri nota þessi orð sitt á hvað svo lítill virðist merkingarmunurinn vera.

 Aðalatriðið er að í þessar ESB viðræður fer allt of mikið af starfsorku og fé hiðs opinbera þegar nauðsyn er á hvoru tveggja hér á landi núna.

[Sleggjan og Hvellurinn, 12.9.2011 kl. 14:46]

Hef aldrei lesið eins mikla þvælu.

[Sleggjan og Hvellurinn, 12.9.2011 kl. 14:50]

Það má ekki gera þessar skoðanakannanir of flóknar.

Ef ekki næst viðunandi samningur í lanbúnaði og sjávarútvegi. Þá mun samningurinn vera kolfeldur.

Það þarf ekki að taka þetta fram í skoðanakönnuninni.

Með því að hafa skoðanakönnun svona flókna þá fyrst verður könnunin ómarktæk.

Það er bara tvær leiðir. klára samning eða hætta við.

"leggja til hliðar"  er einfaldlega að draga umsóknina til baka.

Við hvað eru menn hræddir. Of góðan samning?

Afhverju að svifta rétt þjóðarinnar að kjósa um samninginn þegar liggur fyrir?

[Gísli Ingvarsson, 12.9.2011 kl. 15:29]

Fyrirsögnin hér ætti að vera: Vinstrivakt Styrmis og Björns Bjarnasonar mótmælir sköðanakönnun sem sýnir fylgi þjóðarinnar við aðildarviðræðurnar.

[Sleggjan og Hvellurinn, 12.9.2011 kl. 16:12]

Það heyrðist ekki mikið úr þessari átt þegar það var 51% meirihluti fyrir að draga umsóknina til baka.

Þó af spurningin í könnuninni var alveg eins.

Hentistefna einsog sagt er.

[Eggert Sigurbergsson, 13.9.2011 kl. 05:22]

Við munum öll eftir þessu:

"Meirihluti landsmanna vill að Icesave-samkomulagið sem náðst hefur við stjórnvöld í Bretlandi og Hollandi verði samþykkt samkvæmt niðurstöðum skoðunakönnunar Fréttablaðsins.

Alls vilja 56,4 prósent að samkomulagið verði samþykkt, en 43,6 prósent vilja að því verði hafnað samkvæmt könnuninni, sem gerð var síðastliðið miðvikudagskvöld."

Vísindamenn Fréttablaðsins klikka ekki á því að fá "rétta" niðurstöðu.

[Sæmundur G. Halldórsson , 13.9.2011 kl. 09:53]

Fréttablaðinu er ekki dreift með sama hætti um allt land og það skekkir sjálfsagt eitthvað niðurstöðuna. Höfundur "textans" hér að ofan nefnir þó ekki þennan augljósa annmarka, en kemur í staðinn með ógnarlangan útúrsnúning. Ef þetta óráðshjal er dæmigert fyrir Heimssýnarmenn er ástæða til að óttast um andlegt heilbrigði þeirra.

"Staðreyndin er hins vegar sú að margt annað og líklegra getur gerst en þetta tvennt sem spurningin beinist að".

 Já, rétt: til dæmis gæti halastjarna fallið á Brussel sem myndi þýða endalok Evrópusambandsins. Þá hefðum við engan til að semja við og málið væri dautt. Við reyndar líka, en það skiptir minna máli ekki satt (:

[Sleggjan og Hvellurinn, 13.9.2011 kl. 10:00]

Þetta er marktæk könnun.

Ef það verður farið fram þjóðaratkvæðisgreiða um hvort við eigum að halda áfram aðildaviðræðum þá mun koma svona "já/nei" spuning.

Ekki já, nei,kannski, sæmilega, rugl, veit ekki, hmmm, ha? og svo framvegis.... einsog þetta blogg gefur til kynna.