Áfram eru sex ríki evrusvæðis rúin lánstrausti

Þrátt fyrir nýlegar ákvarðanir valdamestu leiðtoga evrusvæðisins ríkir áframhaldandi vantraust á alþjóðlegum mörkuðum gagnvart skuldastöðu Grikklands, Portúgals, Írlands, Ungverjalands, Ítalíu og Spánar.

Svonefnt skuldatryggingaálag (cds: credit-default swaps) er einskonar sótthitamælir markaðarins og sýnir tölulega hversu mikið eða lítið lánstraust er ríkjandi gagnvart einstökum ríkjum og fjármálastofnunum. Því hærra sem álagið er því meira þarf að greiða fyrir tryggingu nýs láns, og þannig endurspeglar álagið traust eða vantraust markaðarins.

Hálfu ári fyrir hrunið á Íslandi blasti við að engir bankar hér á jörðu bjuggu við annað eins vantraust og þeir íslensku en álagið var þá á bilinu 600 - 800 punktar. Í því fólst að trygging á nýjum lánum til ísl. bankanna myndi fela í sér 6-8% álag sem var að sjálfsögðu miklu hærra en svo að bankarnir gætu endurfjármagnað skuldir sínar á erlendum mörkuðum nema með gífurlegu tapi. Hrun bankanna blasti þá þegar við nema því aðeins að traust til þeirra ykist á ný og staða þeirra skánaði verulega.

Skuldatryggingaálag á íslenska ríkið var einnig í hæstu hæðum á árinu 2008 og fór í 444 í apríl en fór hæst í rúmlega 1400 punkta þegar hrunið varð um haustið. Álagið er nú 261 (1. sept.), sbr. Keldan.is og hefur sveiflast í sumar milli 230 - 304. Er þá miðað við álag á evruskuldir ríkissjóðs til 5 ára.

Álagið á gríska ríkið er nú (1. september) 2200 punktar og hefur sveiflast í kringum þá tölu um skeið. Í Portúgal er álagið 918, á Írland 772, Ungverjalandi 416, Ítalíu 365 og á Spáni 362 skv. upplýsingum cnbc.com

Meðaltalið fyrir 27 ríki ESB var í seinustu viku 345 punktar og er því Ísland bæði verulega undir meðaltali bæði ESB-ríkja og evruríkja.

OECD spáði því í maí s.l. að hagvöxtur á Íslandi yrði um 2,9% á árinu 2012 og er það í takt við spá Seðlabankans en á evrusvæðinu verði meðalhagvöxtur um 2%. Einnig var því spáð að halli ríkissjóðs á Íslandi yrði um helmingi minni en halli ríkissjóða á evrusvæðinu. Atvinnuleysi er nú einnig talsvert minna hér á landi en víðast hvar á evrusvæðinu. Þetta seinasta er þó ekkert nýmæli heldur hefur svo verið um langt skeið. - RA