Pólverjar neita að taka upp evru nema róttækar umbætur verði gerðar

Það er til marks um hversu fráleit evruþrá Samfylkingarinnar er að nokkur ESB-ríki harðneita að taka upp evru þótt þau séu beinlínis skyldug til þess samkvæmt aðildarsamningi. Svíar hafa hafnað því árum saman og nú er það sama uppi á teningnum hjá Pólverjum.

Jacek Rostowski, fjármálaráðherra Póllands, sagði í gær (29. ágúst) við Gazeta Wyborcza, helsta dagblað Póllands að þótt Pólverjum beri skylda til að taka upp evru muni þeir ekki gera það nema gerðar séu ráðstafanir sem duga til að sigrast á skuldavanda evrusvæðisins.

Þetta er þeim mun vandræðalegra fyrir ESB þar sem svo stendur á að Pólverjar eru þar einmitt í forystuhlutverki um þessar mundir, en aðildarríkin skiptast á um forystu fyrir ráðherraráðinu. Pólverjar gengu í ESB fyrir sjö árum en hafa allan tímann frestað því að taka upp evru bæði vegna vandræðanna sem hrannast hafa upp í kringum evrusamstarfið en einnig vegna þess að þeir hafa ekki uppfyllt öll skilyrði Maastricht-sáttmálans samtímis eins og krafist er. Þeir stefna nú að því að skilyrðunum verði fullnægt árið 2015.

En hér á Íslandi láta forystumenn Samfylkingarinnar eins og þeir hafi hvorki séð né heyrt um þau vandamál sem steðja að evrusvæðinu og hamra á því að við eigum og getum tekið upp evru strax og við höfum gengið í ESB, þótt allir sem til þekkja viti, að við eigum langt í land að uppfylla Maastricht-skilyrðin - uppfyllum reyndar ekkert þeirra þessi árin og höfum aldrei uppfyllt þau öll samtímis.

Það er tilgangslaust að stinga höfðinu í sandinn. Stjórnmálamenn á Íslandi verða að gera sér fulla grein fyrir því að komin er upp allt önnur staða varðandi aðildarumsókn Íslands að ESB en hér var fyrir tveimur árum þegar sótt var um aðild.

Sá sannleikur er smám saman að síast út meðal fólksins í landinu þrátt fyrir viðleitni stjórnarflokkanna beggja til að þagga málið í hel. Kjósendur hafa augu og eyru og eru í æ ríkara mæli að átta sig á því, að í dag er engin leið að vita hvernig Evrópusambandið mun líta út að fáum árum liðnum, því að vel getur svo farið að myntbandalagið verði brotið upp og þeim ríkjum fækkað sem aðild eiga að evrunni - eða þá hitt að evruríkin verði að sætta sig við miklu meira og víðtækara valdaframsal til ESB og Evrópska seðlabankans en þau höfðu áður samþykkt.

Krafan er að umsóknin um ESB-aðild verði tafarlaust lögð til hliðar. Sú krafa fær aukinn stuðning með degi hverjum og einmitt á þessu sumri hafa skoðanakannanir sýnt að meirihluti landsmanna vill beinlínis draga umsóknina til baka, m.a. var meiri hluti fyrir því hjá Vinstri grænum, öðrum ríkisstjórnarflokknum. - RA  

Athugasemdir

[Jón Frímann Jónsson, 30.8.2011 kl. 18:04]

Pólverjar uppfylla ekki skilyrðin til þess að taka upp evruna. Þeir eru ekki búnir að vera í ERM-II í tvö ár eins og krafa er gerð um. Þannig að þetta er tilganglaust mas í andstæðingum ESB á Íslandi um Pólland og evruna.

Það þarf einnig að breyta stjórnarskrá Póllands áður en evran verður tekin upp þar í landi.

Hvenar Pólland tekur hinsvegar upp evruna sem gjaldmiðil er hinsvegar ennþá óljóst. Þar sem það veltur á stöðu mála í Póllandi og stjórnmálum þar. Það má þó alveg reikna með að pólverjar taki upp evruna einhverntíman á tímabilinu árunum 2015 til 2025 samkvæmt þessari grein hérna (wiki).

Sú viljandi fáfræði sem er viðhöfð hérna er til skammar eins og allur annar málflutningur andstæðinga ESB á Íslandi, sem ættu að gera íslensku þjóðinni greiða og hætta að láta þetta rugl frá sér fara. Bæði á opinberum vettvangi sem og heima hjá sér.

[Halldór Björgvin Jóhannsson, 31.8.2011 kl. 10:54]

Ekkert af því sem þú segir Jón Frímann breytir nokkru sem er sagt í þessari blog færslu eða "afsannar" eitthvað, þetta sem þarna er skrifað er haft eftir blaði í póllandi þar sem segir að pólverjar hafi engan áhuga á að taka upp evruna í núverandi mynd hvort sem þeir geti tekið hana upp núna eður ei skiptir engu máli á þessum tímapunkti.

Þú vonandi gerir þeir grein fyrir því að það sem stendur á wiki er alls ekki heilagur sannleikur...