Þrúgandi þögn VG um aðildarviðræður

 

ESB-viðræður voru ekki á dagskrá flokksráðsfundar VG nú um helgina og engin ályktun gerð um það mál. Undir niðri er þó mikil ólga og óánægja í flokknum með afskiptaleysi flokksforystunnar sem lætur Össur einan um að ráðskast með þetta örlagaríkasta mál þjóðarinnar og nefnir það varla á nafn, rétt eins og það komi VG ekkert við.

Flokksráðsfundurinn var heldur daufur og tilþrifalítill. Nokkur orðaskipti urðu um aðildarumsóknina og þá einkum um þá þöggun sem umkringir ESB-málið innan flokksins. En lítil svör fengust. Vonandi sér flokksforystan sóma sinn í því að gefin verði skýrsla um aðildarviðræðurnar og aðlögunarferlið á landsfundi VG sem haldinn verður á Akureyri helgina 28. til 30. október n.k.

Frá stofnun VG árið 1999 hefur flokkurinn haft þá stefnu að hagsmunum Íslands sé best borgið utan Evrópusambandsins. Seinasti landsfundur sem haldinn var í mars 2009 nokkrum vikum eftir myndun núverandi ríkisstjórnar og tveimur mánuðum fyrir þingkosningar áréttaði þá stefnu sem fylgt hafði verið í áratug. Landsfundurinn í október n.k. er sá fyrsti sem haldinn er eftir að VG lét Samfylkinguna lokka sig til að standa að aðildarumsókn. VG áskildi sér þó jafnframt rétt til að hafna aðild þegar í ljós kæmi í viðræðunum hvað væri helst í boði.

Löngu er orðið tímabært að þjóðin fái tækifæri til að marka stefnuna í þessu máli. Nú í vetur, rúmum tveimur árum eftir að aðildarumsókn var send til Brussel, er ljóst í öllum aðalatriðum um hvað þetta mál snýst. Því ber Alþingi að taka málið til endurskoðunar og gefa þjóðinni kost á að stöðva aðildar- og aðlögunarferlið enda augljóst að við höfum nóg annað við þá milljarða króna að gera sem þetta tilgangslausa brambolt Samfylkingarinnar kostar skattgreiðendur landsins.

Athugasemdir

[Vendetta, 29.8.2011 kl. 21:18]

Öll VG-forystan er hlynnt aðild að ESB. Allir ráðherrarnir nema Jón Bjarnason. Þeir segja eitt en meina annað.

[Elle_, 30.8.2011 kl. 23:42]

Og engum alþingismanni sem kaus ICESAVE yfir okkur getur verið treystandi.  Þar með talinn Ásmundur E. Daðason.