Sigmundur og Bjarni Ben keppa um forystu í andstöðunni við ESB-aðild

Sú yfirlýsing var ekki fyrr komin frá Bjarna Ben að sjálfstæðismenn ætluðu sér að taka forystuna í andstöðu við ESB-aðild og krefjast þess að umsóknin yrði dregin til baka en Sigmundur Davíð lét hressilega í sér heyra í grein í Morgunblaðinu og ætlar hreint ekki að láta hlut þeirra framsóknarmanna eftir liggja.

Það er því bersýnilega komin upp samkeppni milli sjálfstæðismanna og framsóknarmanna um það hvorir taka forystuna í andstöðunni við ESB-aðild. Báðum er fullljóst að ESB vegferð Össurar og Jóhönnu er með afbrigðum óvinsæl og eftir miklu að slægjast að hafa skýra stefnu í þessu máli. Áður fyrr voru Vinstri grænir ótvíræður forystuflokkur í andstöðu gegn ESB-aðild. En nú eru þeir sem ráðvilltir í ólgusjó stjórnarsamstarfsins og njóta hvorki traust þeirra sem styðja aðild né þeirra sem hafna aðild vegna þess að enginn veit hvaða stefnu flokkurinn ætlar að taka þegar til úrslita dregur.

Sigmundur telur tímann kjörinn til að allir flokkar fallist nú á að leggja aðildarumsókn Íslands til hliðar því ellegar sé hætta á að almenningshagsmunir verði fyrir borð bornir. Hann skrifar m.a:

“Einhverjir kunna að velta því fyrir sér hvort ekki sé best að afgreiða málið, ljúka viðræðunum og fella samning til að losna við umræðuna. Gallinn er að ekki verður kosið um samning á næstunni. Viðræður verða ekki kláraðar fyrr en þeir sem stýra ferlinu telja sig hafa náð meirihluta fyrir jái. Þangað til verður samfélagið undirlagt af Evrópuvegferðinni og síharðnandi deilum.”

Auk þess verði milljörðum sólundað í áróður. Sigmundur hæðist af forystu Samfylkingarinnar og segir að á sama tíma og allt leiki á reiðiskjálfi í löndum Evrópusambandsins haldi nokkrir þingmenn Samfylkingarinnar áfram súrrealískum málflutningi sínum um mikilvægi þess að ganga í sambandið og taka upp evru til að skapa stöðugleika. Kjarninn í boðskap formanns Framsóknarflokksins er:

“Hér er tækifæri til að losa um þá sjálfheldu sem íslensk stjórnmál eru í vegna aðildarumsóknarinnar. Allir flokkar eiga að geta náð saman um að leggja aðildarviðræðurnar til hliðar. Sjálfstæðisflokkurinn kemst þá hjá því að láta landsfund sinn snúast um ESB, Samfylkingin getur áfram átt málið sitt eina og svarað öllum spurningum með þremur bókstöfum. Vinstrigrænir geta vonað að kjósendur gleymi framgöngu þeirra í málinu.”

Sigmundur er sannarlega ekki hrifinn af því “að klöngrast með þjóðina um borð í brennandi skip” og segir í lokin: “Leggjum ESB-umsóknina til hliðar og snúum okkur að mikilvægari verkefnum. Það hentar öllum.”

Athugasemdir

[Vilhjálmur Stefánsson, 18.8.2011 kl. 20:20]

Bara Bjarna Ben snúist ekki hugur eins og forðum..