Jóhanna bauð Bjarna Ben hrossakaup um ESB og nýja stjórn

Ljóst er af leiðara Morgunblaðsins að ákveðnir lykilmenn á vegum Jóhönnu forsætisráðherra hafa með leynd boðið formanni Sjálfstæðisflokksins að endurvekja stjórnarsamstarf flokkanna sem sprakk í loft upp veturinn 2009, skömmu eftir hrun, með því skilyrði að sjálfstæðismenn slái skjaldborg um viðræðurnar við ESB ásamt þeim samfylkingarmönnum. Í leiðara Morgunblaðsins í morgun (þriðjudag16/8) segir hreint út:

"Þær þreifingar sem verið hafa að undanförnu af hálfu lykilmanna í Samfylkingunni gagnvart Sjálfstæðisflokki hafa falið í sér kröfur um að flokkurinn léti aðlögunarviðræður yfir sig ganga fyrir aðgang að ríkisstjórn. Það var þýðingarmikið að Bjarni Benediktsson skyldi taka opinberlega af allan vafa hvað það atriði snertir, það mikilvæga mál sé ekki verslunarvara af hálfu flokksins. Bjarni gaf þvert á móti til kynna að héðan í frá myndi Sjálfstæðisflokkurinn leiða baráttuna gegn aðildarviðræðum að ESB. Og flokkurinn myndi ekki gera neina málamiðlun í þeim efnum."

Í leiðara blaðsins er jafnframt tekið undir orð sem féllu hér á síðunni fyrir fáeinum dögum:

"Lítill vafi er á að Vinstrivaktin í Evrópumálum hefur hárrétt mat á yfirlýsingum formanns Sjálfstæðisflokksins: »Með þeim orðum var hann bersýnilega að senda Samfylkingunni þau skilaboð að í hugsanlegu samstarfi þessara flokka, ef núverandi ríkisstjórn hrykki upp af, yrði engu að síður að afturkalla ESB-umsóknina.« 

En það, að formaður Sjálfstæðisflokksins telji ástæðu til að svara pólitískum þreifingum opinberlega með þessum hætti, ætti að vera þeim,sem nauðugir skjalda Samfylkinguna í eyðimerkurgöngu hennar að ESB, nokkurt umhugsunarefni."

Evrópuvaktin vekur athygli á þessum nýjustu upplýsingum um ástandið á stjórnarheimilinu og sendir jafnframt Steingrími J. Sigfússon, fjármálaráðherra svohljóðandi ráðleggingu:"Formaður VG ætti að lesa seinni leiðara Morgunblaðsins í dag oftar en einu sinni og oftar en tvisvar. Þá áttar hann sig kannski á því, að samstarfsflokkur hans, Samfylkingin, situr á svikráðum við hann sjálfan og flokk hans."  Og Evrópuvaktin bætir við: "Ljóst er að Samfylkingin leitar nú tækifæris til að henda Steingrími J. og hans flokki út úr ríkisstjórn."

Athugasemdir

[Elle_, 17.8.2011 kl. 00:01]

Steingrími og VG var nær að svíkja okkur og vinna gegn okkur fyrir einkahag Jóhönnu og hennar ólýðræðislegasta og yfirgangsmesta flokks í manna minnum: EU, ICESAVE, ránskuldir, etc.   

[Eyjólfur G Svavarsson, 17.8.2011 kl. 00:01]

Það sér hver maður að það þarf að hreinsa til í öllum flokkum, það er engum treystandi!!!!Því miður!!

[Snorri Hansson, 18.8.2011 kl. 00:50]

Þegar Vinstrivaktin og Morgunblaðið talar einum rómi um mál málana!!! Loksins er pólitíkin að fara á vitlegt plan. Mér hlýnar um hjartarætur.