Vissi Össur hvað hann var að segja?

Nú tveimur vikum eftir þá óskiljanlegu yfirlýsingu Össurar að Ísland þurfi enga undanþágu frá fiskveiðistefnu ESB veit í rauninni enginn hvað hann átti við. En vissi hann það sjálfur? 

Ummæli hans á sjónvarpsstöðinni Euronews 27. júní s.l. voru ekki aðeins mjög fjarstæðukennd, heldur gengu þau beinlínis í berhögg við forsendur ESB-tillögunnar sem Alþingi samþykkti fyrir tveimur árum. Jafnframt er líklegt að orð hans verði til þess að herða andstöðu mótherja Íslendinga við samningaborðið gegn undanþágum í sjávarútvegsmálum.

Það er með öllu óskiljanlegt að Össur sé ekki tafarlaust kallaður fyrir utanríkismálanefnd Alþingis til að svara fyrir ummæli sín eins og stjórnarandstaðan hefur krafist. Hver ber ábyrgð á því? Jú, það er formaður nefndarinnar, Árni Þór Sigurðsson, þingmaður VG, sem var í för með Össuri í Brussel og virðist hafa ákveðið að halda hlífiskildi yfir ráðherranum í þessu máli. En með því bregst Árni því eftirlitshlutverki sem Alþingi hefur falið honum.

Fyrstu viðbrögð Árna voru reyndar þau að sennilega væri ekki rétt haft eftir Össuri og hann þyrfti að skýra mál sitt betur. Það reyndi Össur að gera í viðtali við Morgunblaðið hinn 4. júlí s.l. en útkoman var því miður lítt skiljanleg. Á mbl.is er haft eftir honum "að hann hafi alltaf gert greinarmun á sérlausnum og varanlegum undanþágum. Hann hafi frá upphafi talað fyrir því að Íslendingar leituðu eftir sérlausn hvað sjávarútvegsstefnu varðaði." Í viðtalinu sagðist hann stefna að því að "meðsérlausnum verði unnt að tryggja hagsmuni Íslands gagnvart sjávarútvegsstefnu ESB en Íslendingar þurfi enga sérstaka undanþágu frá sjávarútvegsstefnunni. Hann hafi  alltaf viljað sérlausnir eins og Finnar hafi fengið fyrir heimskautalandbúnað og Maltverjar fyrir veiðar á um 1.000 tonnum á fiski með smábátum umhverfis eyjar sínar í Miðjarðarhafi."Össur hefur jafnframt oft minnt á að Norðmönnum hafi verið boðin sérlausn fyrir sjávarútveg sinn þegar samið var um norska ESB aðild 1994.

Satt að segja hefði Össur eins getað orðað það svo að hann vilji að Íslandi verði boðin einhvers konar "sýndarlausn" í sjávarútvegsmálum. En hvernig hún ætti að vera hafi hann enn ekki gert upp við sig. Hitt er ljóst að einhvers konar "sérlausn fyrir Íslendinga" verður hann að geta veifað framan í kjósendur í fyrirhugaðri þjóðaratkvæðagreiðslu þegar hann kemur heim með samninginn.

Var Norðmönnum boðin ásættanleg "sérlausn" í sjávarútvegsmálum á sínum tíma? Þeim var boðið fjögurra ára aðlögunartímabil. Að sjálfsögðu var það ekkert annað en gervilausn enda voru sjávarútvegsmálin ein helsta ástæðan fyrir því að þeir felldu aldildarsamninginn. 

Var Finnum boðin ásættanleg "sérlausn" í landbúnaðarmálum? Nei! Þeim bauðst að mega styrkja landbúnað sinn meira úr eigin sjóðum en aðildarríkjum sunnar í álfunni leyfist. Þeir létu glepjast og í kjölfar aðildar fylgdi feikilegt atvinnuleysi í sveitum landsins. 

Var Maltverjum boðin ásættanleg "sérlausn"? Jú, en hún var afar smávaxin. Hún fólst í því einu að umhverfis eyjuna í 25mílna lögsögu má einungis veiða fisk á smábátum. Þetta var dæmigerð "sérlausn"í anda Össurar og fól ekki í sér neina undanþágu frá fiskveiðistefnu ESB því að Maltverjar fengu ekki einkarétt til veiða á þessu svæði, en vegna fjarlægðar nenna fiskimenn annarra ESB-ríkja ekki að sækja aflann langan veg á svo litlum bátum. Auk þess var árlegur heildarafli bundinn við 1.000 tonn.

Það eru einmitt gervilausnir af þessu tagi sem Össur er að fiska eftir. Hins vegar virðist hann ætla að gefa skít í þau skilyrði sem Alþingi setti, þ.e. að Íslendingar hafi fullt forræði yfir sjávarauðlindinni og 200 mílna lögsagan verði skilgreind sem sérstakt íslenskt fiskveiðistjórnarsvæði.

En ætlar utanríkismálanefnd Alþingis að sætta sig við það þegjandi og athugasemdalaust að ráðherrann hundsi þau skilyrði sem fylgdu samþykktinni um ESB umsókn?   

Athugasemdir

[Helga Kristjánsdóttir, 12.7.2011 kl. 04:51]

     Hvað gerum við  verði það svo? 

[Anna Sigríður Guðmundsdóttir, 12.7.2011 kl. 11:44]

Stundum man Össur eftir sérstöðu strandríkis og stundum ekki. Það er ekki traustvekjandi að fylgjast með framferði Össurar handan hafsins. Ég held meira að segja að Jóhanna Sigurðardóttir sé farin af hafa áhyggjur af stráknum, og hversu dofinn hann virðist vera í þessum samningaviðræðum.

Árni Þór Sigurðsson er svo hinn boðungurinn á þessu hripleka samninga-fleyi. Þeir bæta ekki einu sinni hvern annan upp, því þeir hafa engan áhuga á að vanda viðræðurnar, eftir því sem best verður séð og heyrt. Svona blekkingar koma bara í bakið á þeim sjálfum fyrir rest, þegar þeir geta ekki útskýrt fyrir íslendingum, hvers vegna þeir eru í svo mikilli mótsögn við sjálfa sig, eftir því hvoru megin hafsins þeir eru staddir.

Ég horfði á þátt frá Finnlandi á einhverri norðurlandastöðinni fyrir c.a. tveimur árum síðan um hvernig búið var að drepa niður landbúnað á mörgum býlum með svikum. Bændurnir sátu eftir með tóm gripahús og enga atvinnu, því það stóðst ekki sem lofað var frá ESB. Það var ekki út af engu sem Sannir Finnar sögðust vilja fá leyfi til að mjólka sínar kýr sjálfir, í sveitum landsins.

Þessari hlið er þagað yfir hjá aðildarsinnum. Það er skrifað um landbúnað í fréttablaðinu í dag, og væri fróðlegt að heyra frá Andrési Magnússyni framkvæmdarstjóra Samtaka verslunar og þjónustu um þetta. Og eins hvort hann getur upplýst almenning um hvað verslanir og milliliðir leggja mikið á landbúnaðarvörur? Það er tímabært að birta þær álagningatölur!

Það er merkilegt að fylgjast með þeim, sem fullyrða að þeir vilji auðvitað hafa íslenskar landbúnaðarvörur, en gera sé ekki grein fyrir að þeir eru í raun að gera íslenskum landbúnaði ókleift að lifa af með ESB-aðild. Það er alvarlegt þegar fólk sem ekki hefur vit á hvað það er að tala um, talar svona ábyrðarlaust, um að það sé til bóta fyrir afkomu landbúnaðar að ganga í ESB.

Hvernig getur fólk fengið þá útkomu, að íslenskur landbúnaður standi betur með inngöngu í ESB? Hvaðan og úr vasa hverra koma þessir ímynduðu styrkir, sem þeir trúa að muni fást fyrir ekki neitt frá ESB?

Það er ekkert ókeypis í ESB. Það eru alltaf einhverjir sem þurfa að borga fyrir herlegheitin. Það var 2007-ranghugmyndin, að trúa því að eitthvað geti orðið til úr engu.

Össur og Árni eru í miðri hringiðunni þarna úti, og sjá bara það sem ESB segir þeim. Það er tímabært að kalla þessa drengi heim og láta þá sitja fyrir svörum hjá sínu heimafólki, sem þeir eru í vinnu hjá, og borgar þeim launin.

M.b.kv.